LOBMUNG 34 - Kok Borok (Re-edited) Bible (BSI)

¹ Ang Subraiyungno hambai rw máng tongnai; ani búkhúgo bini lobmung máng tongnai.

² Ani langma Subraiyungo kung chuk máng tongnai; abono khnaui koinenerok bwkha tongthokjak thung.

³ Ang bai baksa Subraiyungno chẃngsacha khlai di, phai di chwng pal khe bini mungno tor rw lai anw.

⁴ Ang Subraiyungno san kha hakhe bo ani ringmano khna kha, tei ani bebak kirimarokni yakni phiyók kha.

⁵ Bono naisik di tei kipir wng di; hakhe nini mwkhang tei sókjak glak.

⁶ O talikha hamyasa ring khe Subraiyung khna kha, hakhe bo bebak digi-sigini phiyók kha.

⁷ Subraiyungni suarirok bono kirinairokno kitingwi tongo, tei bórokno phiyógo.

⁸ Chánaiwi nai di Subraiyung bwswk se kaham; bono bwkha beranai bororok bwkha tongthogwi tongo.

⁹ O bini kwthar bororok Subraiyungno kiri di, tamni hwn ba bono kirinairokni biyal wng ya.

¹⁰ Singho bwsarokbo mui biyal wngjagwi ok khuijago, Subraiyungno nainairokni le manwi kahamrok biyal wng ya.

¹¹ Phai di, o angsarok, ani kók khna di; ang norokno Subraiyungno kirina phrwng anw.

¹² Norokni bere sabo thangwi tongnano hamjak, tei kaham kwrwng khe tongna bagwi umor kolok khatung?

¹³ Nini bwslai bai kók hamya samani, tei nini búkhúk bai kók tatal samarok mwthak di.

¹⁴ Hamya bai kak di tei samung kaham khlai di; kwchang kwchangno nai tuk di tei abo hai kheno tongna khlai di.

¹⁵ Subraiyung tongmung kaham tongnairokno naikhlaiwi tongo, tei bórokni kapmano bo khunju kai-o.

¹⁶ Samung hamya tangnairokno Subraiyung naisik ya, bo bórokno ha sakani pok rwui páinai.

¹⁷ Borok kahamrok chubamung sanwi kap khe, Subraiyung abono khna kha, tei bórokno bórokni bebak digi-sigini yakni phiyógo.

¹⁸ Subraiyung bwkha kwbairokni samo tongo, tei bwkha kwbairokno mwthango.

¹⁹ Borok kahamrok dukhu kwbángma mano, tamo khe Subraiyung abórokni yakni bono phiyógo.

²⁰ Bo bini bebak bekrengrokno kaham khe narwgo; abo kongsa phano bái glak.

²¹ Borok hamyano hamya’-no butharo, tei tongmung kaham tongnaino naislernairok khe majra ma chánai.

²² Subraiyung bini selengrokni langmano phiyogo; bini thani tongthai na phainai khoroksano phano bo khibiui rw glak. Daudni rwchapmung