LOBMUNG 30 - Kok Borok (Re-edited) Bible (BSI)

¹ O Subraiyung nwng ani pholano thwiwi hakhoro ma klainairok hai khe ma klainani yakni phiyók kha.

² O Subraiyung ani Kaitor, nini thani ang kabwi san khe nwng ano ham rw kha.

³ O Subraiyung nwng ani pholano kwthwini mwthangwi tisa kha, mwthangwi tisa kha, thwiwi hakhoro ma klainairokni bisingni nwng ano mwthang kha.

⁴ O Subraiyungni kók khnaui tongnairok bono lobwi rwchap di, bini mung kwtharno hambai rw di.

⁵ Tamoni hwn ba bini jolima srapsa se; bini hamjakma le langma tongsakni bagwi. Hopung ma kap phano, phung ai khe tongthokma phai-o.

⁶ Gwnang wngwi tong phuru ang hai hwnwi sa ka, “Ang uáisabo ninang glak.”

⁷ Subraiyung nini khairokma bai’-no nwng ano hathái hai kwrak khe bacha rw kha; nwng mwkhang hui khe ang bwkha báijak kha.

⁸ O Subraiyung nini thani’-no ang kap kha, tei o Subraiyung ang nini thani’-no koija kha:

⁹ “Ang thwiwi hakhoro tháng khe ang tamo manma tongnai? Hadlwirok da nono lobnai? Abo da nini kubuino sanai?

¹⁰ O Subraiyung khna di, ano khairok di! Subraiyung ani chubanai wng di!”

¹¹ Ang swlwgwi ma tongmani se nwng ano tongthogwi mwsa rw kha; ani rí kichik khengwi tongthokmungno chum rw kha,

¹² siring siring tong yaui tamo khe ang nono bwkha bai lobwi tongwi manna tẃi khe nwng abo hai khlai kha. O Subraiyung ani Kaitor, ang nono hambai rwui tong phlainai. Rwchapmung twithernaini bagwi: Daudni rwchapmung