LOBMUNG 29 - Kok Borok (Re-edited) Bible (BSI)

¹ O chukhani phankrakrok Subraiyungno baju di, Subraiyungni chẃngsacha kwtharno tẃi baju di.

² Subraiyungni mungni chẃngsachano baju di; bini kwthar naithokma bai khe Subraiyungno khulum di.

³ Twi saka-o Subraiyungni khorang; chẃngsacha Subraiyung phirangrok kogo, twi kwbángma saka-o Subraiyung phirang kogo.

⁴ Subraiyungni khorang le phan gwnang; Subraiyung khorang suar bai kupulung.

⁵ Subraiyungni khorang sidar buphangrok swbai-o; Subraiyung Lebanonni sidarphangrok swbai-o.

⁶ Bo bórokno dega bwsa hai khe bathrong bársa rw-o, Sirionno mothwna bwsa hai khe bahar rw-o

⁷ Subraiyungni khorang hórjlai bacha rw-o.

⁸ Subraiyungni khorang hasinglwngno jangri-o; Subraiyung Kadesni hasinglwngno jangri-o.

⁹ Subraiyungni khorang bai mwswi bwrwirokno bwsa bá rw-o, tei bolongrokni bwlái bai bedek kwrai thángo; bini noktharrok bebakno bono “Chẃngsacha!” hwnwi sa-o.

¹⁰ Subraiyung twi kotoro achugwi tongo; Subraiyung mol brúmni bagwi bugra wngwi achukjak.

¹¹ Subraiyung bini bororokno phan rw thung! Subraiyung bini bororokno bwkha kwchang rwui hamari rw thung! Noktharno yaphar phuru Daudni rwchapmung