LOBMUNG 28 - Kok Borok (Re-edited) Bible (BSI)

¹ O Subraiyung ang nono ringo; ani holongthai, ani sanmano khna ya wngwi ta tong ja di, nwng siring siring tong khe ang hakhoro thángnairok hai wngo.

² Ani koiwi sanmani khorangno khna ja di, ang kabwi nini thani chubamung sano, ang ani yakrokno nini háyá kwthar bwkhak suhorwi tisa ja-o.

³ Borok hamya bai samung hamya tangnairok bai baksa ano ta sopre di, bórok bórokni nok arirok bai kiching halokni kók sa lai-o, aile bórokni bwkha-o khe hamya chapmarok máng se.

⁴ Bórokno bórokni samung tangma tẃi’-no tei tongmung sitra tongma tẃi’-no bórokno manjak rw di; bórokni yak bai samung tangma tẃi’-no bórokno manjak rw di, bórokni hamya bórokni saka-ono klai rw di.

⁵ Tamoni hwn ba bórok Subraiyungni samungno tei bini yakni samungrokno gwnda khlai ya, bo bórokno swbai bainai tei tisa glak.

⁶ Subraiyung hamchajak, tamni hwn ba bo ani koimani khorang khna kha.

⁷ Subraiyung se ani phan tei ani phui; ang bini thani ani bwkha bera-o, tei ani bwkha rwchapmung bai khe bono hambai rwui rwchabo.

⁸ Subraiyung se bini bororokni phan; bo bini chongjakni mwthangnai phan.

⁹ Nini bororokno mwthang ja di; bórokni mwrwknai wng ja di, tei bórokno mol brúm brúm tẃither di. Daudni rwchapmung