LOBMUNG 26 - Kok Borok (Re-edited) Bible (BSI)

¹ O Subraiyung ano sutrang hwnwi sakhlai di tamni hwn ba ang sói khe tong kha, tei Subraiyungni aroni yang ayang lama phér yaui tong kha.

² O Subraiyung, ano amjogwi nai di, ano nai ja di; ani bwkhano tei muchungmarokno amjogwi nai di.

³ Tamoni hwn ba nini pái phlai ya hamjakma ani mokol bwskango nugo, tei ang kubui khe nini thani himwi tongo.

⁴ Ang tatal sanairok bai achuk ya, tei phatrarok baibo tong ya;

⁵ Ang samung hamya tangnairokni bodolrokno naislero, ang borok hamyarok bai achuk glak.

⁶ Ani majra kwrwi saui ang yak súnai, tei nini háyáno kitingnai o Subraiyung,

⁷ khorang tisaui hambai rwnai tei nini uanamasingcha samungrokni kókrokno sanai.

⁸ O Subraiyung, ang nini tongma nokno tei aro nini bórom tongmano hamjago.

⁹ Sumsok gwnangrok hai khe ano ta sátok ja di, borok butharnairok bai pal khe ano ta khop ja di,

¹⁰ bórokni yakrok hamya samung bai kupulung, tukjakna bagwi bórokni yak hal-hal wngo.

¹¹ Tamo khe ang le sói khe tongnai; ano phiyók ja di ano khairok ja di.

¹² Ani yakung ha miligo bachaui tongo; motha bodolo ang Subraiyungno hambai rwnai. Daudni rwchapmung