LOBMUNG 21 - Kok Borok (Re-edited) Bible (BSI)

¹ Nini phan bai habugra khápang tongthokjago, o Subraiyung, nini chubamungni bagwi bo bwswk se tongthokjak!

² Nwng bini bwkha-o muchungmano rw kha, bini búkhúk bai sanmano khna ya wng li ya. Sela

³ Tamoni hwn ba nwng bebak hamari kahamrok rw kha; nwng bono rangchak kahamni motok khorogo thup rwui rw kha.

⁴ Bo nono langma sanwi suri kha; nwng bono mol brúmni bagwi langma kolokma rw kha.

⁵ Nini chubamungni bagwi bini chẃngsacha wng kha; nwng bono chẃngsacha bai bórom rw kha.

⁶ Nwng bono mol brúmni bagwi hamari rw kha; bo bai tongwi nwng bono tongthokmung rw kha.

⁷ Tamoni hwn ba habugra Subraiyungni thani bwkha bera-o, tei kuchukni kuchuksani khairokmungni jarwi bo ninang glak.

⁸ Nini yak bebak nwng nini kebengnai arirokno tikhlai anw; nini yagra yak nono naislernairokno tikhlai anw.

⁹ Nwng nukjak phuru bórokno thapani hokhi hai khlainai. Subraiyung bórokno jolima bai kham rwui páinai, hór bórokno mwlagwi pái anw.

¹⁰ Nwng bórokni bwsa-bẃtẃirokno sokomor anw, borokni bwsarokni aroni bórokni bwchlwino sokomornai.

¹¹ Tumung bórok nono kebengwi hamya chap lai khe, tumung bórok hamya chap lai phano, bórokni chapmungrok cha glak.

¹² Nwng bórokno kiphil rwnai, nwng bórokni bwkhak naharwi nini badukhung harnai.

¹³ O Subraiyung, nini phanni bagwi nwng kuchuk wng thung! Chwng nini phankrak phanno lobwi rwchapnai. Rwchapmung tẃithernaini bagwi Daudni rwchapmung