LOBMUNG 19 - Kok Borok (Re-edited) Bible (BSI)

Kaitorni snamjak manwi-o bini chẃngsacha

¹ Nokharok Kaitorni chẃngsachano sakhlai-o; nokha bini yakni samungrokno phunugo.

² Sal brúm brúm bo sakhlai-o, hor brúm brúm bo bini simungno sakhlai-o.

³ Kók kwrwi, kókthái kwrwi; bórokni khorang khna ya;

⁴ hai phano bórokni khorang ha gwnangwi sógwi-o, ha yaphang buchuk bórokni kókrok sógwi-o. Bo nokharogo salno ton kha,

⁵ chamari kwtal bini noksingni ongkhorwi phai tẃi khe bo phan gwnang hai khe bo khachikma lama-o tongthogwi tongo.

⁶ Abo nokharokni páithakni simi kasa-o, tei kitingwi tei babaisa phaising thángo; bini tungma-o mungsa phano huijagwi tongwi man ya.

⁷ Subraiyungni kerong khe kaham, abo langmano thangcha rw-o; Subraiyungni kók sama katswi sói, abo sutrangrokno sinai snamo;

⁸ Subraiyungni dagimungrok wng kha chajak; abo bwkhano srang rw-o. Subraiyungni dagimung wng kha kwthar tei abo kha sinai khlai-o;

⁹ Subraiyungno kirimung wng kha kwthar, abo mol brúm brúm tong phlainai; Subraiyungni dagimungrok wng kha sói tei kubui.

¹⁰ Abo rangchakni sláibo, tei rangchak kahamni sláibo manna khatungjak kugo, piya bwtwini sláibo kwtẃi tei bwlapni chorom khlai tongo.

¹¹ Abórok bai nini seleng ragdama khlaijago; abono tẃi tong khe sokat kaham mano.

¹² Tamo khe sabo bórokni cha yarokno romnai? Ani bisingni huijak cha yarokno srai-srai khe rw di.

¹³ Nini selengno kung chugui sumsok ma khlainani yakni hakchal khe ton ja di; abórok ano kobolwi ta mechen thung. Hakhe ang khait kwrwi wngnai, tei kirimasingcha sumsokni kwthar wngnai.

¹⁴ Ani khukni kókrok tei bwkhani uansukma nwng bai yachakjakna chúk thung, O Subraiyung, ani holongthai ani mwthangnai. Rwchapmung tẃithernaini bagwi Daudni rwchapmung.