LOBMUNG 18 - Kok Borok (Re-edited) Bible (BSI)

¹ O Subraiyung ani phan ang nono hamjago.

² Subraiyung ani holongthai, ani katima nok ani mwthangnaisa, ani Kaitor, ani katijaknai ani holongthai ani phui, ani mwthangnai bokorong ani nok kwrak.

³ Ang Subraiyungno ringnai, bo se lobjaknani chúgo; hakhe ang ani kebengnai arirokni yakni phiyókjaknai.

⁴ Butharnai budukrok ano kubulwi phánsa kha; sokomornai arirok ano kochok rwui sokomorna bagwi doui phaisa kha;

⁵ kwthwi hani buduk ano kubulwi tongmani; tei butharnai khẃi ani bwskango bachajak.

⁶ Ani tong kesep phuru ang Subraiyungno ring kha; ani Kaitorno ang chubachu sanwi ring kha. Bini nok kwtharo tongwi bo ani khorang khna kha, ani kapmani khorang bini khunju-o klai kha.

⁷ Aphuru ha jangrijak kha tei kwlwi kha; hatháini yaphang kwlwibraui jangrijak kha, tamni hwn ba bo jolijak kha.

⁸ Bini bukung bwlamni hoku ongkhor kha, búkhúk bisingni kham rwnai hór ongkhorwi phai-o; bini aroni hokhi jolo-jolo ongkhorwi phai-o.

⁹ Bo nokharokno bom rw-o tei ongkhor rw kha; mwnakma bini yakung yaphango tongmani.

¹⁰ Bo Cherubni saka-o kasa-o tei birsa-o; bo nokbaro bwkrang bai bir kha.

¹¹ Bo mwnakno bini huijak thai khlai kha; chumui rwjama bai twi bono kitingjak.

¹² Bini bwskangni chẃngsajakni chumuini kothor bai hokhi ongkhorwi phai kha,

¹³ Subraiyung bo nokharogo phirang kok kha, kwplaini kwplaisa bo bini khorang khna rw kha.

¹⁴ Bo bini chakhlarokno rohorwi bórokno pisa-piring khlai kha; bo nokha philiksa rwui bórokno ámang-chímang khlai kha.

¹⁵ Aphuru twijlangrokni yaphangno sijak rw kha, nwng kulsamani bagwi hani yaphang dak-dak khe nukjak kha, o Subraiyung nini jolima bai nini bukungni hama bai.

¹⁶ Bo kuchukni yak rohorwi ano rom hór kha; twi kwbángmarokni bo ano socha kha.

¹⁷ Bo, ano naislernai kwrak arirokni yakni tei ano naislernairokni yakni phiyógo; bórok ani bagwi belai kwrak se.

¹⁸ Ang bel súgwi tong phuru bórok ano choprok kha; tamo khe Subraiyung ano songchaui ton kha.

¹⁹ Bo ano phlang-phlango tubu kha; bo ano phiyók kha, tamni hwn ba bo ano bwkha phurjak kha.

²⁰ Subraiyung ani kahamno naiwi ano sokat rw kha; ani yak derama kwrwi bo ano yaphar kha.

²¹ Tamoni hwn ba ang Subraiyungni lamano yakar li ya, tei hamya wngwi ani Kaitorno khibi li ya.

²² Tamoni hwn ba bebak bini raidarok ani bwskango, tei ang bini elemno khibi li ya.

²³ Ang bini mokolo kaham khe ton kha, tei sakno samung hamya bai hakchal khe ton kha.

²⁴ Aboni bagwi Subraiyung ani kahamno naiwi ano sokat rw kha, bini mokolo ani samung kahamno nuk tẃi khe.

²⁵ Nwng kók khnanaini kókno khna kha; majra kwrwino nwng majra kwrwi khlai kha;

²⁶ srai-srai bai nwng srai-srai khe tong kha; nwng phatrarok bai khe abo hai kheno tong kha.

²⁷ Tamoni hwn ba nwng koinenerokno mwthango, tamo khe kung chukjakrokno khe nwng kong rw-o.

²⁸ Nwng se ani chatino mwchẃngo; Subraiyung ani Kaitor ani mwnakno chẃngsa rw-o.

²⁹ Nini phan bai ang sengkrak bodolno kádulwi mano, tei ani Kaitor bai’-no ang chokdeualno bársaui lái-o.

³⁰ Kaitorni lama le katswi sói se; Kaitorni kókrok kubui hwnwi phunugo; bo bono bini thani bwkha beranairokni phui.

³¹ Subraiyungno karwi sabo Kaitor tong? Chini Kaitorno karwi tei sabo holongthai tong?

³² Kaitor se ano phan rwui ani bwchangno kha-o, tei ani lamano kirina kwrwi khlai kha.

³³ Bo ani yaprino mwswini yapri hai khlai kha, tei ano kuchukrogo tonwi kirina kwrwi khe ton kha.

³⁴ Bo ani yakno choba nang laina phrwngo, aboni bagwi ang ani yak bai pitolni badukhungno thonwi mano.

³⁵ Nwng ano nini mwthangmungni phuino rw kha tei nini yagra yak ano romwi tono; nini chubachu ano kotor khlai kha.

³⁶ Nwng ano yapri séna bagwi kuar yapri berathai rw kha, hakhe ani yakung kásle li ya.

³⁷ Ang ano kebengnai arirokno riphrik kha tei bórokno rom kha; bórokno chensuk ya sak ang kiphil li ya.

³⁸ Tei bachaui man ya tẃi khe ang bórokno sukhrup kha, bórok ani yakung yaphango klai kha.

³⁹ Tamoni hwn khe nwng ano chobani bagwi phan bai khe ani bwchangno khaui rw kha; nwng ani kebengnai arirokno ani yapha-o khiklai kha.

⁴⁰ Nwng ani kebengnai arirokno ani oroni uphil rwui khár rw kha, tei ano naislernairokno ang sokomor kha.

⁴¹ Bórok chubachu sanwi chirik kha, tamo khe khoroksa phano bórokno mwthangnai kwrwi; bórok Subraiyungno ring kha tamo khe bo abono khna li ya.

⁴² Ang bórokno nokbar hadlwino swprak tẃi khe panjalwi swprak kha; ang bórokno lamani harpek hai khe khibiui rw kha.

⁴³ Nwng ano kók báng laikrak bororokni yakni phiyók kha; nwng ano dopharokni bokhorok snam kha; ang, sini ya abo tẃi bororok ano mon kha.

⁴⁴ Ani kók khna kheno bórok ani kók na kha; phatarsarok ani bwskango bom kha.

⁴⁵ Phatarsarok bwkha báijak kha, tei bórok huijagwi tongmarokni kwlwibra tw tẃi ongkhorwi phai kha.

⁴⁶ Subraiyung kwthang! ani holongthai hamchajak, tei ani mwthangnai Kaitor kuchuk wng thung,

⁴⁷ Kaitorno ani bagwi yagul su-o tei lukurokno ani yapha-o khiklai-o;

⁴⁸ bo ano ani kebengnai arini yakni phiyógo; au nwng ano kebengnai arirokni slái kuchuk khlai kha; nwng ano borokni hamyarokni yakni phiyók kha.

⁴⁹ O Subraiyung aboni bagwi ang nini mungno dopharokni thani ham bai rwnai tei nini mungno lobwi rwchapnai.

⁵⁰ Bo bini bugrano kwplaima khlai-o, tei bini chongjakrokno bo hamjago, Daud tei bini bosongno kusung kusungo.