LOBMUNG 16 - Kok Borok (Re-edited) Bible (BSI)

¹ O Subraiyung ano kati rw ja di, tamni hwn ba nini thani ang tongthai na ja-o.

² Ang Subraiyungno hai hwnwi sa kha, “Nwng se ani Subraiyung; nono karwi ani bagwi tei kaham kwrwi.”

³ Tamoni hwn ba hani Kwtharsani bororok se borok kahamrok, bórokno tẃi se ani tongthokmarok le.

⁴ Kubun mwtairokno rwktharnairok khe sakni dukhurok báng rw-o; bórok thẃi nungjaknai barokmarogo ang tong glak tei ang o mwtairokni mungno ang khu glak.

⁵ Subraiyung se ani saijak banta ani nungmungni khuri; nwng’-no ani talikhano romwi tonnaisa.

⁶ Ano arini boui rwmani abo kwchangdodo ha-o klai kha; Ani man banta le belaino kaham.

⁷ Ang Subraiyungno hambai rwnai bo se ano tẃithero; horobo ani bwkha ano phrwngo.

⁸ Ang Subraiyungno ani bwskango khe máng tono; tamni hwn ba bo se ani yagra-o tongo, ang ninang glak.

⁹ Aboni bagwi ani khápang tongthogo; ani sak-mang kirimung kwrwi khe lengla-o.

¹⁰ Tamoni hwn khe nwng ano kwthwirokni ha-o khibiui kabu ya, Phiya, nini borok kwtharno Hakhorno phunuk ya.

¹¹ Nwng ano thangnani lamano phunugo. Nini bwskango’-no tongthok súgwi mano, nini yagra yago mol brúmni tongthokma. Daudni surimung