LOBMUNG 149 - Kok Borok (Re-edited) Bible (BSI)

Lobmung rwchapmung

¹ Subraiyungno lob di! Subraiyungni thani kwtal rwchapmung rwchap di, bini kók khnanairok pal kuthum thani bono lob di.

² Israilrok bono snamnaisani thani tongthok di; Siyonni bwsarok bórokni bugrani thani tongthok di.

³ Bórok mwsamung bai khe bini mungno lob thung, kham lapsa tei chongpreng bai khnathok khe bono lobwi rwchap di.

⁴ Tamoni hwn ba Subraiyung bororokno tẃiwi tongthok jago; bo koinenerokno kwplai bai naithok rwnai.

⁵ Kók khnaui tongnairok chẃngsacha khlaiwi lob thung; bórok bórokni thuyamrogo tong twtwi sotonwi rwchap thung.

⁶ Bórokni khugo Kaitorno lobma tei yago khe babainwi kubuk sengrok tong thung,

⁷ hakhe bórok bórokni kebengnai arirokno yagul sunai tei a bororokno sátoknai

⁸ hakhe bórokni habugrarokno sorduk bai khe tei borok kotorrokno sorni hatrai bai khaui mannai,

⁹ tei bórokni bagwi swiwi sa khlaijak buj khlaijak buj thumjak tongmano khlainai. Omorok bebakno bini kók khnaui tongnairokni bagwi chẃngsachani kók. Subraiyungno lob di!