LOBMUNG 148 - Kok Borok (Re-edited) Bible (BSI)

Hayung bai nokhayungno Kaitorno lobnani dagimani

¹ Subraiyungno lob di! Chuknoha-o tongwi norok Subraiyungo lob di; nokhayungrogo tong tw tẃi bono lob di!

² O bebak bini suarirok bono lob di; bini bebak sengkrakrok suarirok bono lob di!

³ O sal tei tal norok Subraiyungno lob di; o chẃngnai athukirirok bono lob di.

⁴ O kuchukni chuknoha bono lob di, o nokha sakani twirokbo bono lob di!

⁵ Bórok bebak Subraiyungni mungno lob thung, tamni hwn ba bo dagima bai se abórok bebak wng bai-o.

⁶ Mol brúmni bagwi bo abórokni tongthai-o khe ton kha; bo raida khaui rwmano swbaiwi man ya.

⁷ Ha saka-o tongwi Subraiyungno lob di, o twijlang kuthukni kotor-kotor malrok Subraiyungno lob di,

⁸ hór tei kothor, kothor kwsap tei siyari, nokbar kotor bini kókno khna-o.

⁹ Hatháirok tei hachukrok, bwthái tháinai buphangrok tei sidarphangrok!

¹⁰ Bolongni yabrwirok tei nogo rimani yabrwirok, khaklap bai malnai tei birnai tokrok!

¹¹ Hani habugrarok tei bebak bororok, naikini khlainairok tei bebak hani buj thumnairok!

¹² Chwla siklarok tei bwrwi siklarok, chakrarok tei chwrairok jotono!

¹³ Bórok Subraiyungni mungno lob thung, tamni hwn ba bini mung simi se kuchuk; bini chẃngsacha, ha bai nokhani slái se kuchuk.

¹⁴ Bo bini bororokni bokorongno tisa kha, bini kók bebak narwknairokni bagwi, bini gana-o tongnai bini borok Israilni bagwi bono lob di. Subraiyungno lob di! Norok Subraiyungno lob di.