LOBMUNG 147 - Kok Borok (Re-edited) Bible (BSI)

Phan gwnangsa Kaitorno lobsaui

¹ Subraiyungno lob di! chini Kaitorno lobwi rwchapma bwswk se kaham; tamni hwn ba omo wng kha kaham, lobwi rwchapjakna chúkjak.

² Subraiyung Jerusalemno tisa-o; bo Israilni basijakrokno kwrẃngsa khe thumo.

³ Bo bwkha báijakrokno ham rw-o, tei bórokni kwsarokno khapungwi rw-o.

⁴ Bo athukirirokno lekha-o, abórok bebakno’-no mung khu-ui ringo.

⁵ Chini Subraiyung wng kha kotor tei bini phanbo kwrak; bini simung saui pái man ya.

⁶ Subraiyung khiklaiwi káduljakrokno tisa-o; bo borok hamyano ha-o khiklai-o.

⁷ Subraiyungno hambai rwui rwchap di; khnathok khe chongpreng tamwi Kaitorno lobwi rwchap di.

⁸ Bo se nokharokno chumuirok bai khe bólo, hani bagwi uatwi tiyar khlai-o, tei bo se hachugo samphangrok achai rw-o.

⁹ Bo se yabrwirokno chámung rw-o, tei tokha bwsa pung phuru bo chámung rw-o.

¹⁰ Koraini phan bai bo bwkha kochomjak ya, khabrumnaini yaphatwkni phanno bwkha kochomjak ya;

¹¹ tamo khe Subraiyungno bórom rwui kirinairokno tei bini pái phlai ya hamjakmano khatungnairokno tẃiwi bo bwkha kochomo.

¹² O Jerusalem, Subraiyungno lob di! o Siyon nini Kaitorno lob di!

¹³ Tamoni hwn ba bo nini dugar berebwi sojaknairokno rak rw-o; bo nwng bai tongnai nini bwsarokno hamari rw-o.

¹⁴ Bo nini hani ari gwnangwi’-no kwchang-kwchang khlai-o; tei skahamkuk gomrok nono supungwi rw kha.

¹⁵ Bo ha-o bini dagimungrok rohoro; bini a kókrok doui khlaijago.

¹⁶ Bo mera buikhumu hai kothor kwsap rohoro; bo thapla hai khe pantwino saro.

¹⁷ Bo kothorno auang hai khe swkagwi rohoro, bini kwchang rwmano sabo soiwi mannai?

¹⁸ Bo bini kókno rohorwi abórokno gele rw-o; bo nokbar sip rw-o hakhe twirok yor khlai-o.

¹⁹ Bo Jakobno bini kókno saui man rw kha, bini tongmung bai chongmano Israilno rw kha.

²⁰ Bo tei kubun dopharokno omo hai khlai li ya; bini kerong-raidarokno bórok saui man ya. Subraiyungno lob di! Norok Subraiyungno lob di.