LOBMUNG 146 - Kok Borok (Re-edited) Bible (BSI)

Mwthangnaisa Kaitorno lobsaui

¹ Subraiyungno lob di! O ani rangma Subraiyungno lob di!

² Kwthang tong sak ang Subraiyungno lobnai; kwthang tong sak ang ani Kaitorno lobwi rwchapnai.

³ Nwng thwiblang borokni bokhorokrokno bwkha ta bera di, bórok chubaui man ya.

⁴ Bórokni rangma thángwi pái khe bórok ha-o kiphilwi thángo; a salo’-no bórokni chapmarok pái-o.

⁵ Jakobni Kaitor bai chubajaknai bororok hamchajak, Subraiyung bórokni Kaitor se bórokni khatungma,

⁶ bo se nokha tei hano, twijlang bai aro tongnairokno snamo; bo mol brúmno kók narwgwi tongo;

⁷ bo sátokjaknairokno bujsói khlai-o; ok khuijaknairokno bo’-no chámung rw-o. Khajakrokno Subraiyung se khengo;

⁸ Subraiyung’-no mokol nuk yano nuk rw-o. Subraiyung dupkhlaiwi tongjakrokno tisa-o; borok kahamno Subraiyung hamjago.

⁹ Subraiyung phatarsarokno naisigwi tongo; bo ma-pha kwrwi tei randijwkrokno naikini khlai-o, phiya ba borok hamyani lamano komor thai-o tlango.

¹⁰ Subraiyung mol brúmno bugra wngwi tongnai; o Siyon, nini Kaitor kusung kusung bugra tongnai. Subraiyungno lob di!