LOBMUNG 144 - Kok Borok (Re-edited) Bible (BSI)

¹ Ani Subraiyung ani phan hamchajak, bo ani yakrokno choba phrwngo, ani yasirokno choba nang laina phrwngo;

² bo se ani pái phlai ya hamjakma bai hamjaknai, ani katijaknai nok kwrak ani phanni yaphang tei phiyóknaisa, ani phui, bini thani se ang khorok bomo, bo ani bororokno ani tola-o khe tono.

³ O Subraiyung, borokrok le tamo ba nwng bono aswk mokol ma rw? Bo le tamo ba bono tẃi aswk ma uansuk?

⁴ Bórok ba rangma simi se; bini umor kutulwi thángnai sampili hai.

⁵ O Subraiyung nini nokharokno kongson rwui ongkhorwi phai di; hoku kasana tẃi khe hatháirokno tang di.

⁶ Nwng nokha philik rwui bórokno pisa-piring khlai di; nini chakhlarokno kok horwi bórokno ubrum-jabrum khlaiwi di.

⁷ Kuchuk sakani simi nini yak sukhlai hor di; twi kotorni yakni tei phatarsarokni yakni ano phiyók ja di,

⁸ bórokni búkhúkrok kók tatal bai kupulung; tei bórokni yagra yakrok bai tatal khe swmai tango.

⁹ O Kaitor, nini thani ang rwchapmung kwtal rwchapnai; buduk twngchi gwnang tamjaknai tamwi rwchapnai,

¹⁰ nwng’-no habugrarokno kwplai khlainai, bini seleng Daudno phiyóknaisa.

¹¹ Khairokma kwrwi sengni yakni ano mwthang ja di, tei phatarsarokni yakni ano phiyók ja di, bórokni khugo kók tatal máng, bórokni yakrokno tisaui swmai tatal tang lai-o.

¹² Chini bwsa chwlarok chasloksa phuru buphang bwsa hai khe torsa thung, chini bwsa bwrwirok khe habugrani noyungni tankhurwi snamjak thongla hai wngnai.

¹³ Chini rwbamrogo dal-bidal chámungrok bai kupulung wng thung; chini merarok sula-o sai-re sai, chisai-re chisai bwsa bá thung,

¹⁴ chini musuk erwi bwsa kwbángma wng thung. bwsabo ta chokhrai thung tei bwsa darok yarok ta wng thung, chini lamarogo bwkha dukhu nangjagwi kapmarok ta tong thung.

¹⁵ Omo tẃi hamarirokno mannai dopharok bórok hamchajak; Subraiyung se bórokni Kaitor hwnnai dopharok bórok hamchajak. Daud lobwi rwchapmani