LOBMUNG 143 - Kok Borok (Re-edited) Bible (BSI)

¹ O Subraiyung ani surima khna di; ani koimano khunju kai ja di; nini kók narwkmarok bai ani surima khna ja di.

² Nini selengno bujo ta bu di, tamni hwn ba nini mokolo khoroksa phano borok kaham kwrwi.

³ Kebengnai arirok ano riphrik kha, ano bukhrubwi ha-o khiklai kha, thwinano naisingwi tongnairok hai khe bo ano mwnakma-o achuk rw kha.

⁴ Aboni bagwi ani bwkha báiwi lengpro kha; ani bwkha bisingo borsa kha.

⁵ Ang bini lái thángjak kók kwchamrokno muitu mano; nwng khlaimarokno tẃi uansugo, nini yakni samungrokno muitu khlai-o.

⁶ Ang nini thani yak pholokja-o; ha kwran twi kang tẃi ang nono kangwi tongo. Sela

⁷ O Subraiyung ani sanmano dakti khna ja di; ani bwkha bái laha. Nini mwkhangno ani oroni ta hui ja di, wng ya khe ang hakhoro thángnairok hai wngnai se.

⁸ Phung aidrobo nini pái phlai ya hamjakma kók khna rw di, tamni hwn ba nini thani ang bwkha bera kha. Ano himnani lama phrwng ja di, tamni hwn ba ang nini thani bwkha rwui suri kha.

⁹ Kena arirokni yakni ano phiyók ja di, o Subraiyung, ang nini thani khorok bom phai ja kha.

¹⁰ Ano nini muchung tẃi tongna phrwng ja di, tamni hwn ba nwng se ani Kaitor ba. Nini phola kaham bai ano sói khe yapri sé rw di.

¹¹ O Subraiyung nini mungni jarwi ano mwthangwi ton ja di. Nini kaham bai ano jwngjalni phiyógwi tubu ja di.

¹² Nini pái phlai ya hamjakma bai ani kena arirokno swkwmaui pái di, tei ani bebak kebengnai arirokno sokomor di, tamni hwn ba ang le nini seleng ja ba. Daudni