LOBMUNG 141 - Kok Borok (Re-edited) Bible (BSI)

¹ Subraiyung ani thani dakti phai si di, ang nono ring ja-o; ang nono ringmani khorangno khunju kai ja si di.

² Ani surima nini thani satrai motom hai wng thung, tei ani yak pholokma nini thani sarik jorani barokmung hai wng thung.

³ O Subraiyung, ani búkhúgo mwrwknai ton di, ani búkhúkni dugarno mwrwk ja di.

⁴ Samung hamya tangnairok bai gwdalwi samung hamya tangjak ya tẃi khe ani bwkhano mungsa hamya bwkhak ta khek lai rw ja di; bórokni chámung kothokrokno ano ta chá rw ja di.

⁵ Borok kaham ano swprak thung; kók narwknai ano khorai thung. Borok hamyarokni thok bai ani bokhorogo lukhlai chongthar ta chong rw di, tamni hwn ba ang bórokni samung hamyarokno kebengwi suri phlai máng tongo.

⁶ Bórokno buj thumwi majra bernairokni yago yapharjak khe, aphuru khe bórok ani kók le kwtẃi hwnwi saui mannai.

⁷ Charani holongno sukhrubwi páijak tẃi, bórokni bekrengrok kwthwirokni hakhor búkhúgo sa horjaknai.

⁸ O Kaitor, ani Subraiyung; tamo khe ani mokol le nini bwkhak’-no káijak; ang nini thani khorok bom ja-o; ano katimung kwrwi khe yakarwi ta rw ja di.

⁹ Bórok ani bagwi chakmani khẃirokni ano kati rwui ton ja di, samung hamya khlainairok uarai chakmani yakni ano kati rw ja di.

¹⁰ Borok hamyarok bórokni chei-o’-no ma klai thung, aphuru khe ang simi’-no yók langnai. Daud hagurungo tong phuruni kóklob