LOBMUNG 140 - Kok Borok (Re-edited) Bible (BSI)

¹ O Subraiyung borok hamyarokni yakni ano phiyók ja di; ano thamchi kutung bororokni yakni kati rw ja di,

² bórok bwkha-o hamya uansugo tei choba nang lai rw máng tongo.

³ Bórok chibuk hai khe bwslai buk rw lai-o, tei bórokni bwslai bisingo chibuk phepuni bis tongo. Sela

⁴ O Subraiyung, borok hamyani yakni ano kati rw ja di; ano khiklaina bagwi chapmung chapnai bororokni yakni ano kati rw ja di.

⁵ Kung chuknairokni banta tepsa khe khẃi thonwi ton kha, buduk bai khe chei chagwi ton kha, lama gana-o bórok ani bagwi lama-o khẃi thon kha. Sela

⁶ Ang Subraiyungno sa kha, “Nwng se ani Kaitor; o Subraiyung ani koimarokno khna ja di.”

⁷ O Subraiyung Kaitor, ani phankrak mwthangnaisa, nwng ani choba phuru nwng ani bokhorokno kholobwi kati rwui ton kha.

⁸ O Subraiyung, borok hamyarokni muchungmano ta wng rw ja di; bórokni uansukma hamyano ta cha rw di. Sela

⁹ Ano kitingnairok bórokni bokhorokrok tisa lai-o; bórokni khukni kók bai hamya khlaimani abo bórokni saka-ono klai thung!

¹⁰ Bórokni saka-o hokhi jolo-jolo klai thung! bórokno hakhor kuthugo khiklaijak thung tei ta bacha phi thung!

¹¹ Hamya sanairok ha-o yarwng su-ui ta man thung; buino sátoknairokni utung utung hamya riphrik phlai tong thung!

¹² Ang saui mano Subraiyung sátokjakrokni tei kwrwirokni manthaino chongwi rwnai.

¹³ Au, borok kahamrok nini mungno hambai rwnai; borok sutrangrok nini bwskango khe tongnai. Daudni