LOBMUNG 14 - Kok Borok (Re-edited) Bible (BSI)

¹ Butuarok bwkha bising bising hai hwnwi sa-o, “Kaitor kw se kwrwi.” Bórok tongmung hamya, bórok selengmasingcha samungrok tango; khoroksa phano samung kaham tangnai kwrwi.

² Subraiyung chuknoha-o tongwi o hani borok khoroksa swk sinai tei Kaitorno naituknai de tong hwnwi naikhlaiwi nai kha.

³ Bebakno cha ya lama-o phér bai kha, bebakno hamya wng bai kha; khoroksa phano samung kaham khlainai kwrwi, khoroksa phano ya.

⁴ Samung hamya tangnairok kisa phano si ya da? bórok mai chá tẃi khe ani bororokno cháui pái kha, bórok Subraiyungno surina uansuk ya.

⁵ Bórok aro belai kirinai, tamni hwn ba Kaitor borok kahamrokni bisingo tongo.

⁶ Nwng kwrwirokni chapmungrokno sukrugo, tamo khe Subraiyung le bórokni katijaknai.

⁷ Israilni mwthangma Siyonni phai thung! Subraiyung bini bororokno phiyógwi tubu khe, Jakob tongthokjak anw, Israil bwkha srang anw. Daudni rwchapmung