LOBMUNG 139 - Kok Borok (Re-edited) Bible (BSI)

¹ O Subraiyung nwng ano kaham khe chánaiwi nai kha tei ano saui man kha.

² Nwng ani achukma bachama saui mano; hakchalo tong tw tẃi’-no nwng ani uansukmano si-o.

³ Nwng ani samungno tei lenglamano naichomo, ani lamarokno nwng kaham kheno saui mano.

⁴ O Subraiyung ang mungsa swk sanani swkang se nwng abono pái súgwi kaham kheno saui mano.

⁵ Nwng ani uklok-bwskango gerepsaui rom kha tei nini yak ani saka-o ton kha.

⁶ O elem ani thani belai uanamasingcha; abo aswk khe kuchuk, abono ang yasuk ya.

⁷ Ang nini pholani biyang thángnai? Eba ang nini bwskangni biyang khárnai?

⁸ Tumung ang nokha-o kasaui thángwibo arobo nwng’-no; ang kwthwi ha-o thuyam bouibo arobo nwng’-no tongo.

⁹ Tumung ang phung-aini bwkrang bai hakchalni twijlango thángwi tongwi phano,

¹⁰ arobo nini yakno aro béngnai, tei nini yagra yak ano kwrak khe romnai.

¹¹ Tumung ang “Au mwnakma ano kholobwi páinai kha, ani yang-ayang pohor tongmani hor hai khe mwnaksanai kha,” hwnwi sa khe,

¹² hai phano a mwnakmabo nini thani le mwnak ya; hor sal hai kwchẃng se; pohor bai mwnak nini thani baksano.

¹³ Nwng se ani mang bisingni aswk tongmarokno snamo amani oksingo nwng se ano chabwi snamo.

¹⁴ Ang nono lobo; tamni hwn ba ang kirimasingcha tei uanamasingcha khe snamjak. Nini samungrok kwmamsingcha; ang abono kaham kheno saui mano.

¹⁵ Ang huijak sijak ya khe snamjagwi tong thani, amani oksingo ani mangno kaham khe snamjagwi tong phuru ani sakduk nini thani huijak ya.

¹⁶ Nini mokol ang thẃi-dul wng ya sini’-no nuk kha. ani bagwi nwng chongjak sal tongmarok cheng yasini swkangno nini bijabo abórok swijak tongo.

¹⁷ O Kaitor, ani bagwi nini chongmani bwswk se nangmani! Abórok bwswk se kwbáng!

¹⁸ Ang lekhana naiwi abórokno hasingsani sláibo kwbáng nuk kha; ang sicha kheno nwng bai’-no tongo.

¹⁹ O Kaitor, nwng borok hamyarokno butharnai, o Kaitor, thẃi kochok rwna hamjaknairok ani oroni tháng thung,

²⁰ nini hamya sanairok nono kebengwi nini hamya khlaina bacha sa kha!

²¹ O Subraiyung, nono naislernairokno ang naisler ya diba? nono hamya khlaina bachanairokno ang joli ya diba?

²² Ang kubu-kubui’-no bórokno katswi naislero; ang bórokno ani ari hwnwi romo.

²³ O Kaitor ano chánai nai di; ani kháno saui man di; ano chánaiwi naiwi ani uansukmarokno naiwi nai di.

²⁴ Ani thani hamyarok da tong-tung lang naiwi nai ja di, ano tong phlainai lama tẃi tẃi ja di. Daudni