LOBMUNG 132 - Kok Borok (Re-edited) Bible (BSI)

Nok kwtharno lobsaui

¹ Subraiyung, Daudno tei bini bebak dukhurok manjakmarokno muitu khlai di;

² bo Subraiyungni thani omo tẃi khe swmai tang kha, Jakobni phankraksani thani omo hai khe swmai tangwi chak kha,

³ “Ang ani nogo hap glak, eba ani thuyamobo kasa glak;

⁴ Ang ani mokolno muktrwi tháng rw glak; eba múkurno murumna rw glak,

⁵ Subraiyungni bagwi tongthai kaisa man ya sak Jakobni phan kwraksa tongthai man ya sak.”

⁶ Nai di, chwng a kókno Iphratha-o khna kha, Jarni hapharo abono man kha.

⁷ “Phai di chwng bo tongmani nogo tháng lai anw; bini yakungo khulum lai anw.”

⁸ O Subraiyung bacha di, nini lenglathai-o phai di, nwng tei nini phanni swmai bokhok phai di.

⁹ Nini ochairok kahamno chum thung, tei nini kók narwgwi tongnairok tongthogwi rwchap thung.

¹⁰ Nini seleng Daudni jarwi nini chongthar chongjak borokni aroni bumkhang ta uphil ja di.

¹¹ Subraiyung Daudni thani kwrak khe swmai tang kha bo abono narwk ya wng glak: “Nini sakni sajla khoroksano ang nini achukthayungno rwnai.

¹² Tumungno nini nwsarok ani kerong rákhok khe tei ang bórokno phrwngmarokno khna khe, bórokni bwsarokbo mol brúm brúm nini achukthayungo achuknai.”

¹³ Tamoni hwnma le Subraiyung Siyonno chong kha; bo abono bini tongthai khlaina muchungjak kha:

¹⁴ “Obo ani mol brúmni lenglathai; ang arono tongnai, tamni hwn ba abono ang muchungmani.

¹⁵ Ang kwbángma khlaiwi bini nangmarokno rwui hamari rwnai; ang aroni bigrarokno ok supungwi kochom rwui chámung chá rwnai.

¹⁶ Ang bini ochairokno mwthangmungni chummung chum rwnai tei bini kók narwgwi tongnairok tongthokma bai khe sotonwi rwchap lai anw.

¹⁷ Ang aro Daudni bagwi bokorong kongsa achai rw anw; ang ani chongthar chongjakni bagwi chati tháisa khlai kha.

¹⁸ Bini kena arirokno ang lachimungno chum rwnai, tamo khe bini bokhorogo khe motok chẃngsanai.” Daudni