LOBMUNG 130 - Kok Borok (Re-edited) Bible (BSI)

Chubachu sanwi surimani

¹ O Subraiyung, belai kuthukma-o tongwi ang nono ring kha.

² Subraiyung, ani khorang khna ja di! Ani koimano nwng khunju kai ja di.

³ O Subraiyung tumungno nwng cha yarokno rom khe, hakhe o Subraiyung sabo bachaui mannai?

⁴ Tamo khe bororok nono kirima gwnang khe bórom khlaina tẃi khe nini thani nakarmung tongo.

⁵ Ang Subraiyungno naisingwi tongo, ani khápang naisingwi tongo, tei bini kógo khatungwi tongo;

⁶ horo mwrwknairok phung ainano naisingwi tongmani sláibo ani khápang Subraiyungno naisingwi tongo.

⁷ O Israil, Subraiyungni thani bwkha beraui tong di! tamni hwn ba Subraiyungni thani pái phlai ya hamjakmung tongo tei bini thani phiyókna bagwi phankrak phan tongo.

⁸ Bo’-no Israilno bebak samung hamyarokni yakni phiyóknai. Daudni rwchapmung