LOBMUNG 116 - Kok Borok (Re-edited) Bible (BSI)

Thwimani ma yóknai borok Kaitorno lobmani

¹ Ang Subraiyungno hamjago, tamni hwn ba bo ani khorang bai koimano khna-o.

² Tamoni hwn ba bo ano khunju kai kha aboni bagwi kwthang tong sak ang bono ringnai.

³ Kwthwi dwkhwi ano phánwi bul kha; kwthwi hakhorno kirima ano sikirisa kha; ang tong kesep tei dukhu-o klai kha.

⁴ Ang aphuru Subraiyungni mungno hai hwnwi ring kha: “O Subraiyung ang koi sa ja-o, ani langmano mwthang ja di!”

⁵ Subraiyung wng kha khairokma gwnang tei kaham; chini Kaitor wng kha khairoknai.

⁶ Subraiyung borok koinenerokno kati rwui tono; ang kwlwk phuru bo ano mwthang kha.

⁷ O ani rangma, kwchang-kwchang wng phi di, tamni hwn ba Subraiyung kwbángma nini kaham khlai kha.

⁸ Tamoni hwn ba nwng ani pholano thwimani yakni mokolno muktwini tei yakungno thutainani yakni phiyók kha.

⁹ Ang kwthangrokni ha-o Subraiyungni thani tháng-láisu khe tongnai.

¹⁰ “Ang belai khe digi-sigi-o klai kha” hwnwi sa phuru phano ang poito khlaiwi tong kha.

¹¹ Ang bwkha udru mudru wng phuru “Bebak bororokno tatal,” hwnwi sa kha.

¹² Subraiyung ano aswk kaham khlaimani ang bono tamono rw phinai?

¹³ Ang mwthangma khurino romwi tisanai tei Subraiyungni mungno ringnai.

¹⁴ Ang Subraiyungno ani bebak chakmano bini bororokni bwskango rwnai.

¹⁵ Subraiyungni mokolo bini kók khnaui tongnai borok thwimani belaino kotor.

¹⁶ O Subraiyung, ang nini seleng se; nini seleng, nini selengjwkni bwsa. nwng ang khajagwi tongmani kheng kha.

¹⁷ Ang nono hambaini ratharmung rwnai, tei Subraiyungni mungwi ringnai.

¹⁸ Ang Subraiyungno ani chakmarokno bini bororokni bwskango’-no rwnai,

¹⁹ Subraiyungni nok bwskango, O Jerusalem nini kwcharo’-no rw bainai. Subraiyungno lob di.