LOBMUNG 112 - Kok Borok (Re-edited) Bible (BSI)

Borok kahamni tongthokmung

¹ Subraiyung lobjak thung! Subraiyungno kirinai borok bo hamchajak, bo bini dagimarokno tẃiwi belai khe khápang srangjago.

² Bini bosongo ha-o phankrak wngnai; sutrangrokni bosongrok hamari mannai.

³ Bini nogo rang-rírok tongnai tei bini kaham tong phlainai.

⁴ Borok sutrangrokni bagwi mwnago pohor kasa-o; Subraiyung wng kha khairokma tei hamjakma gwnang.

⁵ Khairoknai, solok rwnai tei bujsói khlainai samung tangnaini kaham wngo.

⁶ Tamoni hwn ba borok sói khe ninang phlai glak; bo mol brúmno muitu khlaijaknai.

⁷ Bo kóktma hamya khna phano kiri glak; bo Subraiyungni thani bwkha butharjak tei khom-khom wngjak.

⁸ Bo bini kena arirokno bini bwkha muchung tẃi khe nuk ya sak bini bwkha kwrak khe songchajak; bo kiri ya.

⁹ Bo yak bigrarokno yak kuar khe bagwi rw kha; bini kaham tong phlainai; bini bokorong bórimung manwi kuchuk wngnai.

¹⁰ Borok hamya abono nugwi jolijak kha; bo bini ua hul kha tei geleui tháng kha; borok hamyarokni muchungma chúk ya wng kha.