LOBMUNG 111 - Kok Borok (Re-edited) Bible (BSI)

Subraiyungno lobsaui

¹ Subraiyung lobjak thung! Ang borok sutrangrokni kuthum thani tei motha-o, ani bwkha rw súgwi Subraiyungno lobnai.

² Subraiyungni samungrok kotor, abono hamjaknairok abono kaichomwi uansugo.

³ Bini samung chẃngsacha tei bórom bai kupulung, tei bini kaham mol brúm tong phlai-o.

⁴ Bo bini uanamasingcha samungrokni bagwi muitu khujaknai wng kha; Subraiyung khairokmung hamjakmung bai kupulung.

⁵ Bo bono kirinairokno chámung rw-o; bo bini swmaino bwkha-o ton phlainai.

⁶ Buini dopharokni manthai hano bórokno rwui bo bini bororokno bini samungni phan phunuk kha.

⁷ Bini yakni samungrok kubui tei chamani; bini bebak dagimarok poito khlaijakna chúkjak.

⁸ Kubui tei sutrang bai khe abono khlaijakma bagwi abórok mol brúmno kwrak wngwi tong phlainai.

⁹ Bo bini bororokni thani mwthangmano rohor kha; bo dagimung dagiui mol brúmni bagwi bini swmaino rw kha. Bini mung wng kha kwthar tei kwmamsingcha.

¹⁰ Subraiyungno kirima’-no elemni chengsagrama; abono khnaui tongnairok khe kaham khe buchinai gwja. Bo lob phlaijak máng tong thung.