LOBMUNG 109 - Kok Borok (Re-edited) Bible (BSI)

¹ O Kaitor ani lobjaknaisa tei siring siring khe ta tong si di.

² Tamoni hwn ba borok hamyarok tei bandiui tatal sanairok ano kebengwi hamya sana bagwi khua kha, ano tatal khe bórok kebengwi sa lai-o.

³ Bórok ano naislerma kók saui ano gerep lai kha, tei kwrwi-kwrwi’-no ano swprak lai-o.

⁴ Ang bórokno hamjakma rwma se bórok khe uphilwi ani kena wng kha, yang, ang le bórokni bagwi suri sanwi se tongo.

⁵ Hakhe bórok ani kaham khlaimano bórok hamya bai tei ang hamjakma-o naislerma bai se yagul su si-o.

⁶ Bono kebengwi borok hamyano chong di; bono bernaisa bini yagra-o bachaui tong thung.

⁷ Bo buj thumjak phuru, majra berjak thung; bini surima sumsok hwnwi romjak thung.

⁸ Bini ayuk bara thung; bini barjano bui man thung.

⁹ Bini bwsarok pha kwrwi wng thung, tei bini bihik ran di wng thung.

¹⁰ Bini bwsarok orondi chaui ma bír thung; bórok tongmani nok kwbairokni aroni hakchalo búkhlai rohorjak thung.

¹¹ Bini tong kwrwi tẃi sekpronairok bórokni segwi na bai thung; borok sini yarok bórokni samungni bwtháino ma chá thung.

¹² Bono khoroksa khairoknai phano ta tong thung, bini pha kwrwi bwsarokno khoroksa phano ta khairok thung.

¹³ Bini thinangni bosongrok khibijak thung; thinangni bosongni jora-o bórokni mung hu-ui páijak thung.

¹⁴ Bini chuchusongni samung hamyarokno Subraiyung muitu ton thung, bini bumani sumsok ta hujak thung.

¹⁵ Bo bórokni mukumuno o hani swkwmaui manna tẃi khe bórok Subraiyungni bwskango khe máng ma tong thung!

¹⁶ Tamoni hwn ba bo khairokna kókno muitu khlai ya, ahai wng yaui basra borok tei bigrarokno se sátogo.

¹⁷ Bo swraina hamjago; bini saka-o swraimung klai thung. Bo hamari rwnano hamjak ya; abórok bo bai chal thung.

¹⁸ Bo swraimungno rí hai khe kano, abo bini sago twi hai khe tei bini bekrengrogo thok hai khe hap thung.

¹⁹ Bini thani a swraimung rí hai kubulwi tong thung tei bwchangni rí hai khe sal brúm khajak máng khe tong thung.

²⁰ Ano kebengwi kók hamya sanairok omo tẃi kheno Subraiyungni aroni swraimungno man thung.

²¹ Tamo khe o Subraiyung ani Subraiyung, nini mungni jarwi ano naikhlai jaba di; tamni hwn ba nini pái phlai ya hamjakma khe kaham tei ano phiyógo.

²² Tamni hwn ba ang le borok basra tei bigraja se ani bwkha bisingo kwsa wng kha.

²³ Sarikni sampili hai khe ang kwmaui thángo; ang kuksarok hai khe yang yang béngjago.

²⁴ Chá ya tongma bai ani yáskú bel kha; ang bwsak rampra súk kha.

²⁵ Ano mwnwinairokni thani ang mwnwijaknai se wng si-o; ano nuk kheno bokhorok jangri lai-o.

²⁶ O Subraiyung ani Kaitor, ano chuba ja di! Nini pái phlai ya hamjakma bai ano mwthang ja di.

²⁷ Bórok omo nini yak o Subraiyung nwng’-no omo khlai-o hwnwi saui man thung.

²⁸ Bórok bati rw thung, nwng khe hamari rw thung. Ano kebengwi bachanairok lachimung man thung; tamo khe nini seleng khe bwkha srang thung.

²⁹ Ani kenarokno lachimung bai koboljak thung; lachimung bórokni sago kubulwi tong thung.

³⁰ Ang ani khúk bai Subraiyungno belai khe hambai rwnai; ang borok kwbángma-o nono lobnai.

³¹ Tamni hwn ba bo, biyalo klaijakrokno butharnairokni yakni mwthangna bagwi bo borókni yagra bwkhak bacha-o. Daudni rwchapmung