LOBMUNG 107 - Kok Borok (Re-edited) Bible (BSI)

Kaitorni kahamrokno lobsaui

¹ Subraiyungno hambai rw di, tamni hwn ba bo wng kha kaham; bini pái phlai ya hamjakma mol brúmno tong phlai-o.

² Subraiyung bai phiyókjakrok ahai hwn thung, tamni hwn ba bo digi-sigini phiyók kha

³ tei bórokno ha gwnangwini thum kha, salkabaini tei salthángbaini, salsibai tei salgrani thum kha.

⁴ Bórok siring siring hasing panthoro himgurung lai kha; aro kwrẃngsa-o phano tongthai kami man li ya;

⁵ twi kangwi ok khu-ui bórokni bisingo lengpro kha.

⁶ Aphuru khe bórok bórokni digi-sigi phuru Subraiyungni thani kap lai kha, hakhe bo bórokno digi-sigini yakni phiyók kha;

⁷ borok tongmani kamiyungno bórok sógwi ya sak bo bórokno lama kepleng tẃi tẃi kha.

⁸ Bórok bini pái phlai ya hamjakmungni bagwi, bororokni hamkraini bagwi uanamasingcha samung tangmani bagwi Subraiyungno hambai rw di.

⁹ Tamoni hwn ba bo bórokno manwi kahamrok bai khe bórokni ok khuimani tei kangmano rwui bwkha kochom rw kha.

¹⁰ Baksa bororok mwnakma-o achugwi mokjak, dukhu tei sorduk bai khajagwi tongmani,

¹¹ tamni hwn ba bórok Kaitorni kókrokno kebengwi bacha kha tei kuchuk kuk Kaitorni kókno khna li ya.

¹² Bórokni bwkharok samung kwrak tang rwjagwi swbaijak kha; bórok klai bai kha, khoroksa phano bono chubanai kwrwi kha.

¹³ Bórokni dukhu phuru bórok Subraiyungni thani kap kha, hakhe bo bórokno digi-sigini yakni mwthang kha;

¹⁴ bo bórokno mwnakmani tei kwthwi saklomni kariui tubu kha, tei bórokni khamarokno sachu-ui rw bai kha.

¹⁵ Bórok bini pái phlai ya hamjakmani bagwi bo bororokni hamkrai samung khlaimani bagwi Subraiyungno lob thung.

¹⁶ Tamoni hwn ba bo pitolni duglamno swbai kha, tei sorni berepjaknaino rasu kha.

¹⁷ Baksa baksa khe bórokni sumsok tongmung tongmani bagwi sátokma manjago, tei bórokni samung cha yani bagwi dukhu mano;

¹⁸ bórok jesa chámungno phano naislerjago, tei bórok kwthwi duglam bwkhak sederwi-o.

¹⁹ Aphuru khe bórok digi-sigi phuru Subraiyungni thani kap kha, tei bo bórokno dukhuni mwthang kha;

²⁰ bo bini kókno rohorwi bórokni hamyano ham rw kha, tei bórokno komorma yakni phiyók kha.

²¹ Bórok Subraiyungno bini pái phlai ya hamjakmungni bagwi hambai rw thung, tamni hwn ba bo bororokni bagwi hamkrai samung khlai kha.

²² Bórok hambaini ratharmung yaphar thung, tei bini samungrokno bwkha tongthogwi rwchapmungrok bai khe sakhlai thung.

²³ Baksa-baksa khe rungtor kaui twijlango thángwi twi kotorma-o bepar thwngo;

²⁴ bórok Subraiyungni samungrokno nugo, twi kuthugo bini uanamasingcha tongmungrokno nugo.

²⁵ Tamoni hwn ba bo dagima bai nokbar kotor kasa-o, abo twi aphalrokno chuksa rw-o.

²⁶ Bórok nokha jora kasa-o tei twi kuthuk jora kwlwgwi-o; bórokni bwkha rakmani abo birman manjagwi geleui tháng kha;

²⁷ Bórok chuak phekjak hai khe ninang-chichong wngo, tei bórokni bebak simungrok pái-o.

²⁸ Aphuru khe bórok Subraiyungni thani kap kha, hakhe bo bórokno dukhuni phiyók kha;

²⁹ bo nokbar kotorno thák rw-o tei twijlangni twi aphalroknobo siringcha khlai-o.

³⁰ Aphuru bórok bwkha tongthokjago tamni hwn ba kwchang kwchang khe bo bórokni muchungma rung bathakthai-o bórokno tubu-o.

³¹ Bórok Subraiyungno bini pái phlai ya hamjakmungni bagwi hambai rw thung, bo uanamasingcha khe bororokni hamkrai khlaimani bagwi hambai rw di.

³² Bórok bórokni kuthum thani bono kuchuk khlaiwi lobsa thung tei chakrarokni motha-o bo bono lob thung.

³³ Bo hasing panthoro twima bo rwui rw kha, twimuk chersa rwui ransajak ha kwranno misi kha,

³⁴ bwthái tháinai hano khibijak sóm kwprap ha khlai rw kha, tamni hwn ba aro borok hamyarok tongo.

³⁵ Bo hasingkhongo tiyari snamo, ha kwrano twimuk chersa rw-o.

³⁶ Bo aro ok khuijakrokno tono, tei bórok aro tongnani bagwi kamiyung snamo;

³⁷ bórok kheto-o bwchlwi kái-o, angur kái-o, tei bwthái kwbángma thái-o.

³⁸ Bórok bini hamarini jarwi belai khe ero, tei bo bórokni mal-mataroknobo kisa wngna rw ya.

³⁹ Bórok kusupjagwi káduljagwi kisa wngwi jwngjalo klai-o tei dukhu mano,

⁴⁰ bo naikini khlainairokni saka-o lachimung lukhlai rw-o, tei bórokno lama kwrwi panthoro himgurung rw-o;

⁴¹ phiya ba bigrarokno dukhuni phiyógo, tei bórokni núkhungno mera bodol hai khlai-o.

⁴² Borok kahamrok abono nugwi bwkha tongthokjago; tei joto borok hamyarok búkhúk muthupjago.

⁴³ Siyan gwnang bororok omono tẃi uansugo tei bórok Subraiyungni pái phlai ya hamjakmano tẃi mokol kai-o. Kebengnai Arirokno Kebengna bagwi Chubamung sanwi Surima