LOBMUNG 105 - Kok Borok (Re-edited) Bible (BSI)

Kaitor tei bini bwsarok

¹ Subraiyungno hambai rw di, bini mungwi ring di, bororokno bini samungrokno saui man rw di.

² Bini thani rwchap di, bono lobwi rwchap di; bini bebak uanamasingcha samungrokno sa di.

³ Bini mung kwthar chẃngsa thung; Subraiyungno naituknairokni bwkha tongthok thung.

⁴ Subraiyungno phiya bini phanno saui mannani chaitok di; bini mwkhangno nai phlai máng tong di.

⁵ Bo uanamasingcha samung khlaimarokno muitu khlai di, bini soidomni samungrokno tei bini khukni buj sakhlaimarokno muitu khlai di.

⁶ O bini seleng Abrahamni bosongrok, o Jakobni bwsarok, bini chongjakrok.

⁷ Bo se chini Subraiyung Kaitor; bini buj ha gwnangwi’-no tongo.

⁸ Bo bini swmaino mol brúm muitu narwgo, bini a dagimani kókrokno piri sai-saini bagwi dagimarokno,

⁹ Bo Abraham bai o kók kha lai kha, Isak bai a swmaino tang kha,

¹⁰ bo abono Jakobni bagwi kerong hwnwi phiya Israilni bagwi mol brúmni swmai hwnwi sakhlai kha.

¹¹ Bo hai hwnwi sa kha, “Ang norokno Kanan hano norokni manthai banta khe rwnai.”

¹² Aphuru bórok borok báng tha ya; bórok kisichano tongmani tei aro phatarsa wngwi tongmani,

¹³ bórok kaisa dophani aroni tei kaisa dophani aro tháng lai kha, kaisa hani tei kaisa bororokni thani thángo,

¹⁴ bo kaisa bai phano bórokno hamya khlai rwna rw li ya, bo habugrarokno bórokni bagwi khorai-o,

¹⁵ bo hai hwnwi sa-o, “Ani chongjakrokni sak ta tang di; ani diyarirokni mungsa hamya ta khlai di.”

¹⁶ Bo ha-o chacharara tubu-ui chámung manthok ya khlai khe,

¹⁷ bo bórokni slái swkang baira borok khoroksa Josepno rohor kha, bo seleng wngna bagwi phalwi rohorjago.

¹⁸ Bini yakung sorni hatrai bai dukhu man kha, nini gwdna sorduk bai khajak kha;

¹⁹ bini kók nang phai ya sak, Subraiyungni kók bono amjogwi nai kha.

²⁰ Bugra borok rohorwi bono khengwi rw kha; bororokno naikini khlainaisa bono phiyógwi rw kha.

²¹ Bo bono bini nokni bokhorok snam kha, tei bini tong kwrwini barja rw kha,

²² bini muchung tẃi khe bini naikini khlainairokno kók khna rwnani tei bini okrarokno elem phrwngna bagwi bono ber kha.

²³ Aphuru khe Israilbo Ijip ha-o sók phai kha; Jakob khe Hamni ha-o phatarsa wngwi tong kha.

²⁴ Tei Subraiyung bini bororokno belai khe er rw kha, tei bo bórokno bórokni kebengnai arirokni slái rak rw kha,

²⁵ aphuru khe bo bórokni bwkhano bórokni selengrok bai chokoi-phokoi wng rwui bórokni bororokno naisler rw kha,

²⁶ Bo bini chongjak bini seleng Musi bai Aronno rohor kha.

²⁷ Bo bórokni thani bini soidomrokno phunuk kha, tei phiya Hamni ha-o uanamasingcharok khlaiwi phunuk kha.

²⁸ Bo mwnakno rohorwi hano mwnak rw kha; bórok bini kókrokno kebengsaui bacha kha.

²⁹ Bo bórokni twirokno thẃi snam kha, tei árokno buthar kha.

³⁰ Bórokni ha yonglarok bai supungjak kha, bórokni habugrani khotolo suda yonglarok habwi kha.

³¹ Bo dagi khe, dal-bidal yóngsarok phai kha, tei ha gwnangwi thampuimarok ha gwnangwi kupulung wng kha.

³² Bo bórokno uatwi rw yaui kothor rw kha, tei bórokni ha gwnangwi phirang kogwi jiliksa rw kha.

³³ Bo bórokni angur phangrokno tei khwichang buphangrokno buphre bai kha, tei bórok aroni buphangrokno swbai bai kha.

³⁴ Bo dagi khe kúkthorarok phai bai kha tei abórok bwswk se báng saui man ya;

³⁵ abórok ha gwnangwini mai-khulrok chá bai kha tei bwthái-bumukroknobo mwlagwi pái rw kha.

³⁶ Bo bórokni hani bebak swkang sakrano kosonwi buthar baiwi bórokni phan bubakno swbai kha.

³⁷ Ulo khe bo bórokno rangchak bai rukphai bai khe tikhlaiwi tubu kha, bórokni dopharokni bisingo khoroksa phano lengwi klai tongnai kwrwi.

³⁸ Bórok lam rwui ongkhor lang khe Ijipsarok tongthokjak kha, tamni hwn ba bórok bórokno khencheneui kirijak kha.

³⁹ Bo saklom rwna bagwi chumui kobol rw u kha, tei horo chẃngna bagwi hór rw kha.

⁴⁰ Bororok tok san khe, bo dokrokno tubu-ui rw kha, tei chuknohani chámung bai ok kochom rw kha.

⁴¹ Bo holongthaino phiyok kha tei twi chersaui phai kha; abo hasinglwngo twisa hai khe boui kochok kha.

⁴² Tamoni hwn ba bo bini swmai kwtharno muitu khlai kha tei bini seleng Abrahamnobo muitu khlai kha.

⁴³ Hakhe bo bini bororokno bwkha srang rwui bini chongjakrokno bwkha tongthokma rwui tikhlai tubu kha.

⁴⁴ Bo bórokno dopharokni hano rw kha tei bórokni kolomtwi khiklai manmani bwtháino bórok na kha,

⁴⁵ bórok bini raidarok tẃi thung tei kerongrokno rákhok thung hwnwi se bo omo hairok khlai-o. Subraiyungno lob di!