LOBMUNG 104 - Kok Borok (Re-edited) Bible (BSI)

Snamnaisano lobwi

¹ O ani rangma Subraiyungno lob di. O Subraiyung ani Kaitor nwng belai kotor. Nwng bórom bai suarno chumjak,

² pohorno rí hai khe kanjak. Nwng nokhano rí swngma hai khe swngwi phehel kha,

³ nwng nini chuknohani thonglano twirokni saka-o khe kái kha, chumuino malkhung snam kha, nokbarni bwkrango khe nwng tháng-láisu khlai-o,

⁴ nwng nokbarno nini kók tunnai snamo, hórjlaino khe nono monnairok khlaiwi snam kha.

⁵ Nwng hani yaphang lu-o, hakhe abo tei ninangwi man ya.

⁶ Nwng abono twi bai kholop kha, twirok hathái saka-o bathagwi tong kha.

⁷ Nwng damrok khe abórok ma khár kha; nini phirangni khorang bai bórok thángwi ma pái kha.

⁸ Abórok hathái jora chuksa kha, nwng chongwi ari boma jora abórok harung jora sógwi kha.

⁹ O hano haino hai lomsa rwui pái ya tẃi khe nwng abórokno láiwi tháng ya tẃi khe ari boui rw kha

¹⁰ Nwng harungo twimuk yor rw-o; abórok hatháirokni kwchar tẃi yoro,

¹¹ hakhe ha sakani bebak mal-matarokno twi khan rw-o; bolongni korairok abo bai twi kangma hamo.

¹² Abórokni rukungo nokhani tokrok bothop thum lai-o; bórok bedekrogo tongwi pung lai-o.

¹³ Nini chukha tongthaini simi nwng hatháirogo twi lukhlai-o; nini samungni bwthái bai o ha bwkha kochomjago.

¹⁴ Nwng yabrwirokni bagwi sam achai rw-o, tei bororokni bagwi mai-khul achai rw-o, ha saka-o chámung rwna bagwi bo abo hai khlai-o,

¹⁵ borokni bwkhano tongthok rwna bagwi angur bwtwi tei mwkhang chẃng rwna bagwi thok, tei bwkha rak rwna bagwi chámung rw-o.

¹⁶ Subraiyungni buphangrokno bo Lebanonno kaima sidarphangrokno kwbángma khe twi lu kha.

¹⁷ Aro toksarok bórokni bothop thum lai-o; saipras phango aligrani bothop.

¹⁸ Hathái kuchukrogo moskorongrokni tongthai; holongdaprogo khe sonuarok tongo.

¹⁹ Nwng mol, jora sini rwnani bagwi talno snam kha; salbo bini thángna jorano si-o.

²⁰ Nwng mwnakno snam kha, hakhe hor wngo, aphuru khe bolongni manwirok himgurungo.

²¹ Kaitorni thani bórokni chámung naiwi singho sikla mui romna bagwi sokromo.

²² Sal kasa khe bórok bórokni gurungo kiphilwi thángwi thu-ui-o.

²³ Bororok haba-o thángwi sal hap ya sak jora bórokni samung tang lai-o.

²⁴ O Subraiyung, nini samungrok bwswk se dal-bidal! nwng nini elem bai abórokno snam bai kha; swngcharo nini snamjak manwi bai kupulung.

²⁵ Iko kuarma, kotorma twijlang, aro kotor-ste hámung sini ya kwbángma, twini manwirok tongo.

²⁶ Aro rúng kotorrok thángo-phai-o, aro nwng a twijlango thwngna bagwi snammani Lebiathon tongo.

²⁷ Nwng jora-o abórokno chámung rw thung hwnwi abórok bebakno naisingwi tong lai-o;

²⁸ nwng rw khe bórok khocha-o; nwng yak phiyok khe bórok manwi kahamrok bai kupulung wngo.

²⁹ Nwng nini mwkhang hui khe bórok ámang-chímang wngo; nwng bórokni hamano rosa khe bórok thwi-o, tei hadlwi’-ono kiphilwi tháng phiro.

³⁰ Nwng nini phola rohor khe bórok snamjak kha; tei nwng hano kwtal khlai phiro.

³¹ Subraiyungni chẃngsacha mol brúm brúm tong thung; Subraiyung bini yakni samungrokni bagwi bwkha tongthok thung

³² bo swngchar naisik khe abo kwlwibra-o, bo hatháirokno tang khe hoku duphung sa-o.

³³ Ang kwthang tong sak Subraiyungno lobwi rwchapnai; ang tongsakno ani Kaitorno lobwi rwchapnai.

³⁴ Ang bono tẃiwi uansukma bono tongthok rw thung; tamni hwn ba ang Subraiyungo tongthogo.

³⁵ Sumsok gwnangrok ha sakani komor lang thung, borok hamyarok gaija bai thung. o ani rangma Subraiyungno lob di. Subraiyungno lob di.