LOBMUNG 10 - Kok Borok (Re-edited) Bible (BSI)

Bujsóini bagwi surimung

¹ O Subraiyung tamoni nwng hakchal khe bachaui tong? Digi-sigi nang phuru tamo nwng nukjak ya khe tong?

² Borok hamyarok kung chugui kwrwirokno sátogo bórokni hamya chapmarogo bórok kwcha thung.

³ Tamoni hwn ba borok hamyarok bórokni bwkha-o muchungmarokno tẃiwi kung chugo, a khámainairok bórok manna bagwi Subraiyungno swrai-o tei yakaro.

⁴ Borok hamyarok kung chugui sak nang ya wngma bai bono naituk lai ya; “Kaitor kwrwi” hwnwi se bórokni uansukmarok tongo.

⁵ Bórok hamchamungrokni bwkhak máng swkangwi thángo; nini bujrokno le bórok nuk hor ya, tamni hwn ba abo bo bai kwchal; bini kebengnai arirok bórokno mwnwi lai-o.

⁶ Bórokni bwkha-o uansuk lai-o; “Ang ninang glak; kusung kusung romwi ano kebengwi arirok bacha glak.”

⁷ Bini búkhúk swraimungrok, tatalrok tei sátokmung bai kupulung; bini bwslai tola-o hamya sitra tongo.

⁸ Bo kamirogo butharna bagwi naisingsogwi tongo; huijagwi tongwi bo borok kahamrokno butharo, Bini mokol khairok susukrokno choprokna bagwi naichomo;

⁹ bo singho hai khe huijagwi naisingo; kwrwirokno romna bagwi bo naisingwi tongo; bo kwrwirokno bini chei-o kwcha rwui romo.

¹⁰ Bórok báiwi klai-o, klai súgwi thángo; o khairok susukrok bini yapha-o klai-o.

¹¹ “Kaitor pokjak kha, bo bini mwkhang kholop kha, bo tei nuk phlai glak kha” hwnwi bo sak sakno sa-o.

¹² Bacha di, o Subraiyung; O Kaitor nini yak tisa si di; sátokjaknaino ta pok ja di.

¹³ Tamoni bagwi borok hamya Kaitorno kebengwi “Tamo khlai kha khlai ya hwnwi nwng ano sẃng glak” hwnwi bwkha bising bising sa lai?

¹⁴ Tamo khe nwng nugo! Ao, yak rwnani bagwi digi-sigi klaijak tei bwkha hilikjakrokno naikhlai kha; khairok susukrok sakno nini thani bwkha bera-o; nwng se ma-pha kwrwirokno chuba-o.

¹⁵ Borok hamya tei samung sitra tangnairokni yakrokno swbaiwi rw di; kaisa kwrwi tẃi man bai ya sak bini hamyarokno rutuk di.

¹⁶ Subraiyung se mol brúm brúmni bagwi Bubagra; Dopharok bórokni hani komornai.

¹⁷ O Subraiyung, koinenerok naimano nwng khnanai; bórokni bwkhano nwng rak rwnai, bórok kapmano nwng khnanai,

¹⁸ ma-pha kwrwirok tei kusupjakrokni bujsói khlainai, hakhe o hani borok bórokno tei sikiri-sokoro khlai glak. Rwchapmung tẃithernaini bagwi Daudni rwchapmung