LEKHAMUNG 6 - Kok Borok (Re-edited) Bible (BSI)

Najaritrokni raida

¹ Subraiyung Musino hai hwnwi sa kha,

² Israilni bororokno sa di, khoroksa chwla eba bwrwi sakno Najarit wngnani bagwi swmai tangwi Subraiyungni thani-o yaphar khe,

³ bo arak tei bwtwk yakarwi ma tongnai. Bo angurni eba khe angur kwranni snamjak arak ma nung glak.

⁴ Bo Najarit wngwi tong sak angurni tei angur bwchlwi eba khe bukurni chámung snammano cháui man glak.

⁵ Bo Najarit wngmani swmai-o tong sak bini bokhorokni bwkhnai silwi man glak. Bo Subraiyungni thani o swmai tangmani jora pái ya sak bo kwthar khe ma tongnai, bo bini bwkhnai kolok khe ma tongnai.

⁶ Subraiyungni bagwi bini sakno yapharwi tong sak bo mang kwthwirokni samo ma tháng glak.

⁷ Bini buma phano, bupha phano eba khe bini takhuk phano, bukhuk phano thwi khe bini sakno kusum khlai man glak tamni hwn ba bo Kaitorni thani kwrak khe tangmani le bini bokhorok bai se.

⁸ Bo Najarit wngwi tong sak bo Subraiyungni thani o kwthar se.

⁹ Bini samo khoroksa swk achomsa khe thwi khe bo bini yapharjak bokhorok summani klai-o; hakhe bo nokha salsni sal ulo bini bwkhnai silwi kwthar ma wngnai.

¹⁰ Salcharni salo bo tokthu maknwi tei pharuk maknwi ochaini thani ríni nokni kuthum lai duglamo ma tubunai.

¹¹ Ochai kaisa khe sumsokni yapharmung tei kaisa khe sógwi yapharmung ma yapharnai hakhe bono kwthar ma khlainai tamni hwn ba bo mang kwthwi bai nangwi sum kha. A salo’-no bo bini bokhorokno kwthar ma khlainai,

¹² tei bini sakno ma yapharnai, Najarit tong sak jorani bagwi kwtal khe ma yaphar phinai tei bisi kaisani mera chwlano ma yapharnai; swkang bo kwthar khe tongmani tei lekhajak glak kha tamni hwn ba bo sakno yapharmani abo sum kha.

¹³ Najaritni raida khe omo hai, bo swmaini pái khe, ríni nokni kuthum laimani duglamo ma thángnai.

¹⁴ Bo Subraiyungni thani nokha bisi kaisani khait kwrwi maktham mera chwlano sógwi yapharmung tei masa mera bwrwino sumsokni yapharmung tei mera bwsa masano khakchang yapharmung ma yapharnai,

¹⁵ tei chuan kwrwi urasa auang ma yapharnai, olib thok bai buljak auang, auang kahamrok tei chuan kwrwi auang thok buljak tei mai bai arak yapharmungrok ma yapharnai.

¹⁶ Ochai a borokno Subraiyungni bwskango tubu-ui sumsokni tei sógwi yapharmung ma yapharnai.

¹⁷ Bo Subraiyungni thani o mera bwsano khakchang yapharmung tei chuan kwrwi auang urasa ma yapharnai. Hakhe ochaibo bwthái bwchlwi tei arak yapharmung ma yapharnai.

¹⁸ Hakhe Najarit bini bokhorokno ríni nokni duglamo silwi khibinai tei bini bwkhnaino khakchang yapharmani hóro tonnai.

¹⁹ Hakhe ochai merani bangorano naui ruknai tei urani chuan kwrwi auang lepsa naui Najaritni yago bini bwkhnai silmani ulo ma yapharnai.

²⁰ Ulo ochai tisaui narwknai Subraiyungni bwskango phehemmani abo bai biya yapharmarok kwthar, omorok ochaini banta omoni yagulo Najarit arak nungwi mannai.

²¹ Omo hai khe se chakmano tei Najaritni raida teibo Najaritni wngwi chakmano tẃi’-no ma yapharnai, bo yapharwi manmani-o yak beranai, Najaritni raida tẃi bo chagwi yapharnaino ma srwngnai.

Ochaini hamari

²² Subraiyung Musino hai hwnwi sa kha,

²³ “Aron bai bini bwsarokno sa di, norok omo hai khe se Israilrokno hamari ma rwnai;

²⁴ Subraiyung norokno hamari rw thung tei nono tong kwchang rwui tong thung.

²⁵ Subraiyungni mwkhang bini saka-o chẃng thung tei nono khairok thung.

²⁶ Subraiyungni mwkhang nini saka-o kuchuk wng thung tei nono khakchang rw thung.”

²⁷ “Omo hai khe bórok Israil bwsarokni saka-o ani mungno tonnai tei ang bórokno hamari rwnai.”