LEKHAMUNG 36 - Kok Borok (Re-edited) Bible (BSI)

Káijak bwrwirok manthai manmani

¹ Giliad núkhungni bokhorokrok, Makirni bwsa tei Manaseni busuk, Josep bosongni bororok Musini bwskango tei tẃiphangrokni bwskango, Israil núkhungni bokhorokrokni thani phaiwi bórok

² hai hwnwi sa lai phai kha, “Subraiyung chini bugrano Israil bororokni bisingo pat karwi ha banta khe rw di hwnwi dagi kha tei chini takhuk Selophehadni bwsajwksongroknobo ha banta khe rw di hwnwi Subraiyung chini bugrano dagi kha.

³ Tamni hwn ba bórok Israil bororokni bisingo bosong kaisa bai káijak khe bórokni manthai a bosongni’-no wngnai, omo hai khe baksa hano khagwi tlangjaknai.

⁴ Israilrokni Jubili bisi sók phai phuru khe, bórokni ha banta khe bórok káijakmani a bosongni’-no wng sinai, chini chuchusongni aroni bórokni manthai kháiklaijagwi tháng sinai.”

⁵ Omo tẃi khe Subraiyung dagimani hai khe Musi Israil bororokno hai hwnwi sa kha, “Josepni bwsarok samani kók sóino.

⁶ Omo hai kheno Subraiyung Selophehadni bwsajwksongrokno tẃiwi hai hwnwi kók samani, ‘Bórok muchungmani borok bai káijagwi mano hwn ba bórokni bosongni bisingo simi se ma káijaknai.

⁷ Israil bosongni ha bantano kaisa bosongni tei kaisa bosongno rwjak glak, bebak sak sakni manthaino man bainai.

⁸ Ha banta man bainai Israil bwrwirok bórokni bosong bisingo’-no ma káijaknai, omo tẃi khe se buphani ha bantano manẃi tongnai.

⁹ Hakhe khoroksa swkni bosongni manthaino tei khoroksano rwjak glak, bebak Israil sakni manthaino’-no manẃi tong bainai.’ ”

¹⁰ Subraiyung Musino dagima haino Selophehadni bwsajwksong khlai kha.

¹¹ Mahala, Tirja, Hogla, Milka tei Noa Selophehadni bwsajwksong bukhrani bwslasong bai káijak lai kha.

¹² Bórok Manaseni bwslasong, Josepni busuk bai káijak lai bai kha tei bórokni ha banta bórokni bosong bisingono tong kha.

¹³ Omo raidarokno Subraiyung Musini bising tẃi Israil bororokno Moabni ha panthor Jerikoni Jordan twima rukungo dagimarok.