LEKHAMUNG 32 - Kok Borok (Re-edited) Bible (BSI)

Jordanni salka bwkhak tong bainai dopharok

¹ Tabuk Rubenni bwsarok bai Gadni bwsarokni kwbángma musukrok tong bai-o. Bórok Jaserni hano tei Giliad hano musuk mwrwgwi chá rwjaknai haphar kaham khe nuk kha.

² Hakhe Gadni bwsarok bai Rubenni bwsarok Musi bai Eliasar ochai tei lukurokni tẃiphangrokni thani phai laiwi sa lai phai kha.

³ Atarot, Dibon, Jaser, Nimra, Hesbon, Eleale, Sebam, Nebo tei Beon.

⁴ “Israil bororokni bwskango Subraiyung mechenmani harok wng kha musuk mwrwknani bagwi haphar kaham, tamni hwn ba nini selengrokni khe mal-matarok tong ja-o.

⁵ Bórok teibo sa kha, Nwng chajak kha hwn khe chwngno o hano rw ja di. Chwngno Jordanni ayang naro ta tlang ja di.”

⁶ Phiya ba Musi Gadni bwsarok bai Rubenni bwsarokno hai hwnwi sa kha, “Norokni takhukrok khe choba-o thángnai tei norok khe oro achugwi tong lai sinai hai de?

⁷ Subraiyung bai yapharjakmani ha-o bárwi thángnani bagwi tamni Israil bororokni bwkhano swbai lai tong?

⁸ Nwphasongbo o hano naiwi phai di hwnwi Kades Barniani rohorjak phuru obo haino khlai bai kha.

⁹ Bórok hakchalma Eskol harung jora thángwi a harokno nugwi Subraiyung yapharmani ha-o thángnani Israil bororokni bwkhano swbai rw lai kha.

¹⁰ Subraiyung a salo jolijagwi tei bo swmai tangwi sa kha,

¹¹ ‘Ang Abraham, Isak tei Jakobno rwnani hwnwi swmai tangmani ha-o Ijip hani nongkhorwi phai bainai nokha bisiknwichi tei omoni slái okra kukrok khoroksa phano nugwi man ya wngnai, tamni hwn ba bórok ani kókno bwkha rwui khna ya.’

¹² Kenisa Jephuneni bwsla Kaleb bai Nunni bwsla Josua bórok khoroknwi simi se omono nuknai, tamni hwn ba bórok bwkha rwui Subraiyungni kókno khna-o.

¹³ Hakhe Subraiyung Israilrokno belai jolijak kha tei nokha bisi brwichi jora, Subraiyungni bwskango sumsok khlainairok komorwi tháng bai ya sak, bórokno hasing panthoro kiting rwui ton bai kha.

¹⁴ Nai di, Israilrokni saka-o Subraiyungni thamchi ka rwnani bagwi norokni bupharokni thani-o, teibo sumsok gwnang borok bacha kha.

¹⁵ Norok Kaitorno yakar phi kha hwn khe, bo haino hai Israilrokno o hasing panthoro yakarnai tei bebak bororokno sokomor bainai.”

¹⁶ Hakhe bórok bini gana-o phaiwi hai hwnwi sa phai kha, “Chwng oro chini merarokni bagwi mera batham tei chini chwrai khonairokni bagwi kamiyung tang lai sinai.

¹⁷ Tei chwng khe Israil bororokno bórokni thai-o tubu ya sak sílai-patham yago naui bórokni bwskang bwskang thángnai, o hani bororokno kirimani bagwi chini chwrairok simino kamiyungo tong bainai.

¹⁸ Israil bwsarok sak sakni manthai-o achuk lai bai ya sak chwng tei chini nogo kiphil li ya.

¹⁹ Chwng khe Jordanni ayang naro bórok bai baksa tei ha banta na lai li ya, tamni hwn ba chini manthaino chwng oro Jordanni saka bwkhago’-no manẃi pái kha.”

²⁰ Hakhe Musi bororokno hai hwnwi sa kha, “Norok o samungno tang khe tei sílai-patham naui Subraiyungni bwskango choba-o tháng lai khe,

²¹ tei bini arirokno bini bwskangni rwkhlaiwi rohor bai ya sak, norok sílai-patham naui Subraiyungni swkango Jordan bár khe,

²² tei Subraiyungni bwskango hano segwi na bai khe, norok kiphilwi phai mannai tei Subraiyung bai Israilrokni thani-o norokni khlaithai tongmani yóknai. Tei Subraiyungni bwskango o ha norokni’-no wngnai.

²³ Tamo khe norok omo hai khlai ya wng khe, nai di, norok Subraiyungni thani-o sumsok khlaima klai kha. Tei o kókno muitu narwk di, nini sumsok nono rutugwi karinai.

²⁴ Norokni chwrairokni bagwi kamiyung tei merarokni bagwi mera-batham tang lai si di tei norok swmai tangmani hai khe rwkhlai di.”

²⁵ Gadni bwsarok bai Rubenni bwsarok Musino hai hwnwi sa kha, “Chini bugra dagimani haino nini selengrok khlai sinai.

²⁶ Chini chwrai khonairok, chini bwrwirok, chini merarok tei chini bebak musukrok oro Giliadni kamiyungo’-no tong bainai.

²⁷ Phiya ba nini selengrok, Subraiyung dagimani hai khe chobani bagwi tiyar wng kha. Borok matheno choba nang lainani bagwi tháng lainai.”

²⁸ Hakhe Musi Eliasar ochaino Nunni bwsajla Josuano tei Israil lukurokni bosongni bokhorokrokno omo hai khe dagi kha;

²⁹ Musi bórokno hai hwnwi sa kha, “Gadni bwsarok tei Rubenni bwsarok chobani bagwi tiyar wngjak, borok matheno norok bai baksa Subraiyungni bwskango Jordan bár lai khe tei norokni bwskango hano mechenwi man khe norok bórokno Giliad hano ha banta khe rw di.

³⁰ Phiya ba bórok Jordan bár lai ya hwn khe, norok bai baksa Kanan ha-o ha banta mannai.”

³¹ Gadni bwsarok bai Rubenni bwsarok hai hwnwi sa lai kha, “Subraiyung bini selengno samani haino chwng khlainai.

³² Chwng chobani bagwi tiyar wngwi Subraiyungni bwskango Jordan bárwi Kanan ha-o tháng lainai tei chini ha banta manthai man khe Jordanni salka bwkhago’-no tongnai.”

³³ Ulo Musi, bórokno, Gadni bwsarokno tei Rubenni bwsarokno tei Josepni bwsla Manaseni khaksa bosongrokno Amorni habugra Sihonni ha tei Ogni Basanni habugrani ha, aroni ha tei kamiyungrokno, aroni ha kitingwi bebak kamiyungrokno rw bai kha.

³⁴ Hakhe Gadni bwsarok khe kamiyung Dibon, Atarot, Aroer

³⁵ Atrot-sophan, Jaser, Jogbeha,

³⁶ Betnimra tei Bet-haran nok kwrak tei merarokni batham tang lai kha.

³⁷ Rubenni bwsarok khe kamiyung Hesbon, Eleale, Kiriathaim

³⁸ Nebo, Balmeon tei Sibma-o kamiyungrokno tang baiwi bórok a kamiyungrokni mungno pharwi rw lai kha.

³⁹ Makirni busuk tei Manaseni bwsarok Giliado thángwi aro tong bainai Amorsarokno mechenwi segwi naui bórokno rwkhlaiwi rohor kha.

⁴⁰ Musi Manaseni bwsa Makirno ha Giliadno rw kha. Tei bo aro’-no tong kha.

⁴¹ Manaseni bwsla Jair khe thángwi aroni kamirokno na baiwi “Habut-jair,” hwnwi mung phar kha.

⁴² Tei Noba khe thángwi Kenat ha bai aroni kamirokno na khe tei omo sakni bumung hai khe Noba hwnwi mung phar kha.