LEKHAMUNG 30 - Kok Borok (Re-edited) Bible (BSI)

Swmai tangmani raida

¹ Musi Israil bosongrokni bokhorokrokno hai hwnwi sa kha, “Omo hai khe se Subraiyung dagi-o:

² Borok khoroksa Subraiyungni thani chak kha hwn khe tei swmai tangwi mungsa swk khlainani chong khe, bo bini kókno ta swbai si thung, bini búkhúk bai samani hai’-no khlai thung.

³ Bwrwi khoroksa swk bini buphani nogo tong phuru Subraiyungni thani-o chagwi mungsa swk samung khlainani chong khe,

⁴ bini bupha bini swmai tangwi samung khlainani hwnwi chongmano khna khe tei bono mungsa swk hwn khe bo bebak bini swmai tangmarokno ma khlai bainai.

⁵ Hwn ba bini bupha omorokno khnamani salono chajak ya wng khe, bini aswk swmai tangmani yakni yóknai. Subraiyung bono nakarnai, tamni hwn ba bini bupha chajak ya wng kha.

⁶ Khoroksa bwrwi swmai tangwi, mungsa swk khlainani hwnwi khúk perwi páimani yagulo káijagwi pái khe,

⁷ bini bwsai omono khnaui mungsa sa ya hwn khe bini khá chongmarokno ma khlai bainai.

⁸ Hwn ba bini bwsai omorokno khnamani salono chajak ya wngwi, bwrwini swmaino gosi ya wng khe Subraiyung bono nakarnai.

⁹ Hwn ba khoroksa swk randijwk bwrwi eba kakjak bwrwi bini bwkha-o swmai tangmano ma khlainai.

¹⁰ Khoroksa bwrwi bwsai tong phuru swmai tangwi chakmani tong khe,

¹¹ bini bwsai omono khnaui mungsa sa ya hwn khe bini swmai tangmarok bai chakmarokno ma khlai bainai.

¹² Hwn ba bini bwsai omorokno khnaui chajak ya wngwi kasu khe, bo aswk swmai tangmarok tong glak, Subraiyung bono nakarnai.

¹³ Bihikni swmai tangmarokno khlai rwnai, khlai rw ya omo bwsaini chajakmani haino wngnai.

¹⁴ Hwn ba bini omorokno khnaui mungsabo kasu ya wng khe, bini bebak swmairokno ma khlai bainai. Tamni hwn ba bo khnamani salono mungsa khe phano kasu li ya ba.

¹⁵ Tamo khe bo omorokno khna baima yagulo haino hai kasu phi khe bini majra bini saka-o klainai.”

¹⁶ Omorokno Subraiyung Musini khúk tẃi dagimani borok khoroksa bini bihikni bisingo tei khoroksa bupha bai bini nogo tongnai bwsajwkni raida khlaijak kha.