LEKHAMUNG 24 - Kok Borok (Re-edited) Bible (BSI)

¹ Tabuk Kaitor Israilrokno hamari rwnani bagwi chajago hwnwi Balam saui man khe swkang phuruni hai khe danda-baji khlaina tháng li ya tei hasing panthor bwkhak mwkhang uphil kha.

² Hakhe Balam khorok tisaui nai ba Israilrok bosong bosong khe tong laijak nuhur kha tei Kaitorni phola bini saka-o phai sók phai kha

³ tei bo o kók diyari sanani ma cheng kha, “Beorni bwsla Balam sakhlai-o, Mokol phiyogwi tongnai borok o kókno sa-o,

⁴ Kaitor samani kókno khnanai o kókno sa-o, bo phan gwnang Kaitorno nuknai, bo klai phano, bini mokol phiyokjak,

⁵ Nini rínokrok o Jakob. Nini tongthairok bwswk naithok, o Israil.

⁶ Harungrok hakchalo pholokjak hai, twima rukungni tháiblwng hai, Subraiyung káimani Aloi buphangrok hai. twi rukungo Sidar buphangrok káijak hai.

⁷ Bini golarokni twi pungwi kwsarnai, tei bini bwchlwirok twi kwbángma tongmani ha-o káijaknai. Bini habugra Agagni slái kuchuk wng kuknai. Bini ha kotorma khe phuarjaknai

⁸ Kaitor bono ha Ijipni tubu kha. Bono bolongni musuk hai phan gwnang; Bo bini ari dopharokno monogwi pái bainai bórokni bekrengrokno swkrai pái bainai. Tei chakhlarok bai bórokno kok bainai.

⁹ Bo singho hai uákhrupnai tei rokoui tongnai, tei singho bwrwi hai, sabo bono sochaui mannai? Nono hamari rwnai, bo’-bo hamarino mannai, Nono swrainai, bo’-bo swraimung kupulung wngnai.”

¹⁰ Hakhe Balak Balamno belai khe joliui bini yak bai yakno swpragwi Balamno hai hwnwi sa kha, “Ang nono ani arirokno swrai lang thung hwnwi ringhormani se nai di, omo bai khe nwng uáitham bórokno hamari rw kha.

¹¹ Aboni bagwi tabuk nini nogo tháng si di. Ang nono hili kwbángma rwnani chongmani, tamo khe Subraiyung se nono kasu kha.”

¹² Balam Balakno hai hwnwi sa kha, “Ang ba nwng rohormani tẃitunrokni bwskango sa ya da,

¹³ Balak ano bini nok kupulung rangchak bai rukphai rw phano, ani muchung tẃi khe Subraiyungni kókno norwi man ya, Subraiyung samani kókno simi se ang le ma sa sinai?”

Balam páithak kók diyari samarok

¹⁴ Tabuk nai di, “Ang ani bororokni thani-o kiphilwi thángnai, phai di o bororok norokni thinangni salo tamo khlainai ang nono phunuk anw.”

¹⁵ Hakhe bo hai hwnwi kók diyari sana cheng kha, “Beorni bwsla Balam sa-o, Mokol bai nugwi o kókno sa-o,

¹⁶ Kaitorni kókno khnaui tongnai o kókno sa-o, Kaitor kuchuk kukni elem gwnang borok o kókno sa-o. Phan gwnang Kaitor bai phunukjagwi nuknai borok sa-o, bo klai phano bini mol phiyokjak

¹⁷ Ang bono nugwi mano. Hwn ba tabuk ya kho Ang bono nai kha, hwn ba abo thinango. Kaisa athukiri Jakobni aroni phai anw; Israilni raidang kaisa bacha anw. Bo Moabni kwpalno sukhrup bainai, tei Setni bebak bwsarokno swbai baiwi mano.

¹⁸ Idom mechenjakmano, bini ari Seirbo mechenjakmano, hwn ba Israil khe teibo phan wng anw.

¹⁹ Jakobni khoroksa bugra phai anw, kamiyungo kwthang tongnairok sokomorjak bainai!”

²⁰ Hakhe Balam Amalekno nuk khe hai hwnwi kók diyari sa kha, “Amalek bebak dopharokni slái phan gwnang tongmani, phiya páithago khe sokomorjak páinai.”

²¹ Bo Kenisarokno nuk khe hai hwnwi kók diyari sa kha, “Norok tongmani ha khe arirok bai hakchal.

²² Norokni bothop khe hathái saka-o tonjak. Phiya ba Asur norokno khaui tlang phuru khe norokni bathamrok sokomorjak bainai?”

²³ Balam hai hwnwi bini kók diyari sa phi kha; “O Kaitor yak rw phuru khe sabo kwthang tongwi mannai?

²⁴ Kitimni rung kotorrok phaiwi sók phainai, Bórok Asur bai Eberno mechennai, hwn ba, bórok bo, komor suknai.”

²⁵ Hakhe Balam bachaui bini nogo kiphilwi tháng kha tei Balak bo bini lama-o tháng kha.