LEKHAMUNG 23 - Kok Borok (Re-edited) Bible (BSI)

¹ Balam Balakno, “Ani bagwi oro háyá kaisni snam di tei ani bagwi maksni musuk bai maksni mera bwsa oro tubu di,” hwnwi sa kha.

² Balak Balam samani haino khlai bai kha. Tei Balak bai Balam háyá brúmno musuk masa tei mera bwsa masa yaphar lai kha.

³ Hakhe Balam Balakno hai hwnwi sa kha, “Oro nini sógwi yapharmani samo bachaui tong di, ang tháng grana, Subraiyung ang bai nukjakna phano tongo, bo ano phunukmarokno ang nono sa phainai.” Hakhe bo saichung hachuk bochlongo kasaui tháng kha.

⁴ Tei Kaitor Balam bai malai phai khe Balam bono hai hwnwi sa kha, “Ang háyá kaisni snamwi, kaisa kaisa háyá-o musuk masa tei mera bwsa masa yaphar kha.”

⁵ Subraiyung Balamni búkhúgo kók rwui, “Nwng Balakni aro kiphilwi thángwi o kókno saui di,” hwnwi sa kha.

⁶ Hakhe bo kiphilwi thángwi Balakno Moabni bebak tẃiphangrok bai baksa bini sógwi yapharmani samo bachajak khe nugwi kha.

⁷ Aphuru Balam bini kók diyari hai hwnwi sa kha, “Balak ano Aram hani tubu-ui phai kha, Moabni habugra salka bwkhak hachukni tubu-ui phai kha, phai di ani wngwi Jakobno swrai phai di, tei Israilrokno hamya sa phai di!

⁸ Kaitor se swrai ya hwn khe, ang bahai khe swraiwi mannai ba? Subraiyung se hamya tháisa phano sa ya, hwn khe ang bahai khe hamya saui mannai ba?

⁹ Ang hachuk sakani bórokno nuk hor kha, hathái bochlong sakani bórokno naikhlai kha; Nai di, o bororok dopha kaisa khe tong lai-o, Bórok tei kubunni dopharok bai gwdal lai ya.

¹⁰ Jakobni hadlwino sabo lekhaui mannai tong? Israilni khak brwi brwino sabo lekhaui mannai? Borok kahamrok hai khe angbo thwi kaham ma thwi si thung. Bórokni hai kheno ani bo pái si thung!”

¹¹ Aphuru khe Balak Balamno hai hwnwi sa kha, “Nwng ano tamo khlai ma klai lang? Ang ba nono ani arirokno swrai lang thung hwnwi se tubumaniba, nwng ba bórokno hamari simi se rw si bla.”

¹² Bo hai hwnwi sa kha, “Subraiyung ani búkhúgo kók rwmano simi ang ma sa ya diba?”

Balam uáinwi kók diyari samani

¹³ Balak bono hai hwnwi sa phi kha, “Tei kwrẃngsa-o ang bai baksa phai di, aroni bórokno kisa nukhur anw, bebakno nuk hor glak. Aroni khe ani wngwi bórokno swrai phai di.”

¹⁴ Hakhe bo Balamno Sophim panthorni Pisga hathái bochlongo tlangwi háyá kaisni snamwi musuk masa tei mera bwsa masa háyá mathe’-no yaphar kha.

¹⁵ Balam Balakno, “Oro nini sógwi yapharmani samo bachaui tong di, ang Subraiyung bai malai grana,” hwnwi sa kha.

¹⁶ Hakhe Subraiyung Balam bai malai laiwi, bini búkhúgo kók rwui, “Nwng Balakni aro kiphil thángwi o kókno saui di,” hwnwi sa kha.

¹⁷ Hakhe bo kiphilwi thángwi Balakno Moabni tẃiphangrok bai baksa bini sógwi yapharmani samo bachajak khe nugwi kha. Tei Balak bono sẃng kha, Subraiyung bono tamo sa kha?

¹⁸ Aphuru Balam hai hwnwi kók diyari sa kha, “Bacha di, Balak, ani kók khna di, O Jiporni bwsla, ani kókno khunju kaichomwi khna di,

¹⁹ Kaitor le borok ya, tatal sanai, khoroksa borokni bwsa ya, bini bwkha sláinani. Bo sakhlai mano tei khlai ya da tongno? Bo swmai tangmano tei khlai yaui de tongnai.

²⁰ Nai di, ang hamari rwnani dagima man kha, Bo hamari rwmano tei ang sláiwi man li ya.

²¹ Jakobni saka-o hamya nuk li ya. Israilni saka-o bo tekto klai man li ya. Subraiyung bórokni Kaitor bórok bai pal tongo tei bo’-se bórokni habugra hwnwi chirigwi lob lai kha.

²² Kaitor bórokno ha Ijipni kariui tubu kha. bolongni musuk hai bórokni phan tongo.

²³ Jakobni bagwi mungsa swraimung nang ya, Israilni bagwi mungsa diyari karwi. Tabuk khe Jakob bai Israilno sajaknai, ‘Nai di Kaitor bórokno tamo khlai kha!’

²⁴ Nai di, o bororok singho bwrwi hai bacha kha, tei singho hai khe sichaui phai kha. Bo masa swkno romwi ma chá ya sak tei, kwthwirokni thẃi ma nung ya sak lengla glak.”

²⁵ Hakhe Balak Balamno, “Nwng bórokno tabo ta swrai di, hamari bo ta rw si di,” hwnwi sa kha.

²⁶ Tamo khe Balam Balakno, “Subraiyung bebak samano ang le ma khlainai hwnwi ang ba nono sa ya diba?” hwnwi sa phi kha.

Balam uáitham kók diyari samani

²⁷ Ulo Balak Balamno hai hwnwi sa phi kha, “Phai di, tabuk ang nono tei kwrẃngsa-o tlang anw, aroni phano ani wngwi bórokno swrainani Kaitor chajagwi mano.”

²⁸ Hakhe Balak Balamno Peor hatháini bochlongo tlang kha, aroni khe hasing panthorno nuk khlai-o,

²⁹ Balam Balakno, “Oro kaisni háyá snam di tei ani bagwi musuk mak sni tei mera bwsa mak sni tubu di,” hwnwi sa kha.

³⁰ Balak Balam bai sajakmani hai’-no khlai bai kha tei musuk masa, mera bwsa masa háyá brúm’-no yaphar lai kha.