LEKHAMUNG 22 - Kok Borok (Re-edited) Bible (BSI)Habugra Moab Balamni bagwi rohormani 1 Hakhe Israil bororok aroni kutul laiwi ha panthor Moab tẃi khe Jordan twi nar Jeriko-o batham kha lai kha. 2 Jiporni bwsla Balak aswk Israilrokno Amorrokno khlaimani bebakno nuk kha. 3 Tei Moab khe bórokno borok kwbángma nugwi belai kirijak kha, Israilrokno nugwi Moab ámang-chímang cha kha. 4 Moabrok Midianni okra chakrarokno hai hwnwi sa kha, “Musukrok panthorni jabrano uáproui chámani hai khe o bororok chwng oro bebak tongnairokno chá bainai kha.” Hakhe aphuru Moabo habugra cháui tongnai Siporni bwsla Balak 5 Beorni bwsla Balamno tubunani bagwi bini borokno Amau hani Uphratis twima samo Pethoro rohorwi hai hwnwi sa hor kha, “Nai di, ha Ijipni bororok nongkhorwi phaiwi bórok o ha-o kupulung se wng si-o, tabuk bórok ani samo sók phai kha. 6 Ang bórokno mechenwi ani hani rohorwi manna tẃi khe tabuk phaiwi o bororokno swrai phai ja gra di, bórok ani slái phan gwnang wng kha. Tamni hwn khe ang saui mano, nwng hamari rwmani bororok hamari mano tei nwng swraimani bororok swraimung kupulung wngo.” 7 Hakhe Moabni okrarok bai Midianni okrarok bórokni thani sema nai rwmani rangrok tlangwi Balamni thani-o tháng laiwi Balak samani kókno sa lai kha. 8 Balam bórokno, “Tini horo aro tong lai di, Subraiyung ano samani kókno norokno sa phai anw,” hwnwi sa kha. Omo hai khe Moabni tẃiphangrok Balamni aro tong lai kha. Kaitor Balamni aro phaiwi, 9 “Nini oro tongnairok sabo?” hwnwi sa phai kha. 10 Balam Kaitorno hai hwnwi sa kha, “Moabni habugra, Siporni bwsla Balak bórokno ani thani-o omo hai khe saui rohor kha. 11 ‘Nai di, Ijip hani nongkhorwi phai bainai bororok o ha saka-o kupulung wng bai kha ang bórok bai choba nang laiwi, bórokno rwkhlai rohorwi manna tẃi khe, hakhe tabuk nwng phaiwi bórokno swrai phai di.’ ” 12 Kaitor Balamno, “Nwng bórok bai ta tháng di, nwng bororokno ta swrai di, tamni hwn ba bórok hamari manjak,” hwnwi sa kha. 13 Hakhe Balam phungo bachaui Balakni tẃiphangrokno hai hwnwi sa kha, “Norokni ha-o kiphilwi tháng lai si di, Subraiyung ano norok bai pal rohornani gosi li ya.” 14 Hakhe Moabni tẃiphangrok Balakni aro kiphilwi tháng laiwi Balam chwng bai pal phainani gosi li ya hwnwi saui lai kha. 15 Tei uáisa Balak borok kwbáng kuk tei bórom gwnang kukrokno rohor phi kha. 16 Bórok Balamni thani phaiwi hai hwnwi sa lai phai kha, “Jiporni bwsla Balak hai hwnwi saui rohoro, ‘Ani oro phainani mungsa ta wngjak di,’ 17 ang nono bórom kotor rwnai tei nwng samani haino khlainai, nwng tabuk phaiwi o bororokno ani wngwi swrai phai di.” 18 Phiya ba Balam, Balakni selengrokno hai hwnwi sa kha, “Balak ano bini nokni rangchak bai rukphai kupulung khe rw phano se ani Subraiyung Kaitor dagimano láiwi ang kotoi phano, kotor phano khlainani thángwi man ya. 19 Tini horobo oro’-no tong lai gra di, Subraiyung ano tei tamobo sanani tong khna gra anw.” 20 Hakhe Kaitor Balamni thani horo phaiwi, “Bororok nono ringnani phai kha ba, bórok bai tháng di, phiya ang samani tẃi se khlai di,” hwnwi sa phai kha. 21 Hakhe teini phungo bini korai chirka naui Moabni tẃiphangrok bai tháng kha. Balam bai bini koraichirka 22 Tamo khe bo thángmani bagwi Kaitor jolijak kha tei Subraiyungni suari bini lama-o kasu-ui bacha kha. Bo khe korai chirka saka-o kasaui tong kha tei bini seleng khoroknwirok bo bai pal tongo. 23 Subraiyungni suari yago seng tẃiwi lama-o bachaui tongmani korai chirka nuk khe korai chirka lama sóino yakarwi kheto tẃi nongkhorwi tháng kha. Balam lama sói tẃi him rwnani bagwi korai chirkano swprak kha. 24 Subraiyungni suari babainwi angur barini chokdeual rwjak lama kesebo bacha kha. 25 Subraiyungni suarino korai chirka nuk phi khe chokdeual bwkhak tháng kha, Balamni yakung chokdeualo huprejak kha, hakhe bo korai chirkano swprak phi kha. 26 Subraiyungni suari kisa swkang tháng phiui lama kesep katiui thángthok ya-o bachaui tongwi kha. 27 Subraiyungni suarino korai chirka nuk khe Balamni tola-o klai rw kha, Balam jolijakmani tei tongwi se man li ya, bini raidang bai korai chirkano swprak kha. 28 Aphuru khe Subraiyung korai chirkani búkhúkno phiyogwi rw khe korai chirka Balamno hai hwnwi sa kha, “Ang nono tamo khlai kha ba, ano omo bai uáitham ma swprak lang?” 29 Balam korai chirkano, “Nwng ba ano thw se thwng si bla, ani yago seng tong khe ang tabuk nono butharwi se pái kha mun,” hwnwi sa kha. 30 Hakhe Koraichirka Balamno hai hwnwi sa kha, “Ang nini korai chirka ya diba, tini jora nwng ani saka-o máng kasaui tong ya diba? Ang omo hai khe nono uáisa swk phano khw de khlai kha ba?” Tei bo, “Khlai ya,” hwnwi sa kha. 31 Aphuru khe Subraiyung Balamni mokolno phiyogwi rw kha; bo Subraiyungni suarino yago seng tẃijak khe lama-o bachajak nuk kha. Hakhe bo ha-o pwtapsa klaiwi khulum kha. 32 Subraiyungni suari bono hai hwnwi sa kha, “Tamni nwng ba nini korai chirkano omo hai khe uáitham ma swprak lang? Nai di, ang nono kasunani ma phai kha, tamni hwn ba nwng lama phérwi tong kha. 33 Korai chirka ano nugwi, bo uáithamno lama phérna nai kha. Bo lama phér ya khe ang nono butharwi pái kha mun tei bono kwthang narwk kha mun.” 34 Hakhe Balam Subraiyungni suarino hai hwnwi sa kha, “Ang sumsok khlai kha, nwng ano kasu-ui lama-o bacha-o hwnwi ang saui man li ya. Haini bagwi tabuk omo nini bwskango hamya’-no hwn khe ang kiphilwi tháng phi sinai.” 35 Subraiyungni suari Balamno, “O bororok bai tháng phano, ang sa di hwnmani kókno simi se ma sanai,” hwnwi sa kha. Hakhe Balam Balakni tẃiphangrok bai pal tháng kha. Balak Balamno lamjaksokmani 36 Balamno phaiwi tongo hwnwi Balak khna kheno bo bai malainani hwnwi Moabni kamiyungo tháng kha. Omo ha ari páithak Arnono klai-o. 37 Balak Balamno hai hwnwi sa kha, “Nono na rwhornani ang ba borok rohor ya de? Tamni nwng ba ani thani-o phai li ya wng lang? Ang ba nono bórom khlainani chúk ya de?” 38 Balam hai hwnwi sa kha, “Nai di ang nini oro phaiwi sók phai kha, tabuk ang Kók tháisa swk sanani chú de chúk ba? Kaitor ani búkhúgo kók rwmano simi se ang ma sanai.” 39 Hakhe Balam Balak bai baksa Kiriat-hujotho phai lai kha. 40 Balak musukrok bai merarokno ratharwi Balam tei bini pal tẃiphangrokni thani-o rohor kha. Balam puila kók diyari samani 41 Teini phungo Balak Balamno Bamotbal saka-o tubu-ui phai kha, aro tong twtwi Balam Israil bororokno kisa nuk hor kha. |
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
Bible Society of India