LEKHAMUNG 20 - Kok Borok (Re-edited) Bible (BSI)

Kadeso patimarok

¹ Israilni bebak lukurok puilani talo Jin hasing panthoro phaiwi sók phai kha tei bórok Kadeso tong lai kha tei Miriam aro thwiwi phobjak kha.

² Lukurokni bagwi aro twi nungnani bagwi twi kwrwi kha, hakhe bebak lukurok Musi bai Aronni thani kuthum laiwi tentai lai kha.

³ Bórok Musi bai uálai laiwi hai hwnwi sa lai kha, “Chini takhukrok Subraiyungni bwskango thwi bai phuru-o, chwngbo tamni bagwi thwi li ya wng lang?

⁴ Tamni norok Subraiyungni lukurokno o hasing panthoro chwng tei chini mal-matarokno butharnani ma tubu bai lang?

⁵ Tamni chwngno Ijip hani kariui aswk hamya ma ha-o ma tubu lang? Oro mai-khulrok, angurrok, bwtháirok mungsa hamya tei nung lainani twi suda se kwrwi!”

⁶ Hakhe Musi bai Aron lukurokni bwskangni kagwi tháng laiwi kuthumma rínok duglamo pwtapsa ha-o khlaiwi mwkhang bomson lai kha hakhe Subraiyungni chẃngsacha aro phaiwi sók phai kha.

⁷ Hakhe Subraiyung Musino hai hwnwi sa kha.

⁸ “Nwng raidang khochaui na di tei nwng bai nini takhuk Aron lukurokno kwrẃngsa khe kuthum rwui bórokni bwskango, o holongno twi tikhlai di hwnwi sa di, aswk kheno twi chersaui phai anw, omo hai khe nwng bórokni bagwi o holongni twi kariui lukurokno tei bórokni mal-matarokno khanwi man anw.”

⁹ Aphuru khe Musi Subraiyung dagimani hai khe’-no bini bwskangni dangno khochaui na kha.

¹⁰ Tei Musi bai Aron bebak lukurokno kwrẃngsa khe holong bwskango kuthum rwui bórokno, “Khna bai di kebengnairok, chwng ba o holongni da norokni bagwi twi ma kari sinai?” hwnwi sa kha.

¹¹ Hakhe Musi bini yak tisaui raidang bai holongno uáinwi swprak kha tei twi kwbángma chersaui phai kha, lukurok tei bórokni mal-matarok twi nung bai kha.

¹² Phiya ba Subraiyung Musi bai Aronno hai hwnwi sa kha, “Norok Israil bororokni bwskango ano kwthar khe bórom khlai yani, ani kókno poito chá ya wngmani bagwi ang bórokno ha rwmano, norok o lukurokno hap rwui man glak.”

¹³ Oroni twi khe Meriba hwnjago, tamni hwn ba Israil bororok Subraiyungno kengai lai khe bo sakno bórokni bisingo kwthar khe phunuk kha.

Idomni habugra Israilrokno lái rw ya wngmani

¹⁴ Musi Kadeso tong twtwi Idomni habugrani thani kóktun rohorwi hai hwnwi sa hor kha, “Nini takhuk Israil sa ja-o, chwng oro aswk tekto manmano nwng saui mano.

¹⁵ Chini chuchusong bahai khe Ijip ha-o tháng kha, chwng a ha-o kwdwkma tongwi kha tei Ijiprok chwng bai chuchusongno tong kesep khlai kha.

¹⁶ Tei chwng Subraiyungni thani chirigwi kap lai kha, bo chini khorangno khna kha tei suari khoroksa rohorwi chwngno Ijip hani kariui tubu kha, tabuk chwng nini hani ari Kades kami kotoro tong laija-o.

¹⁷ Tabuk chwngno nini ha tẃi lái thángnani rw ja di, chwng nini panthor eba angur bari tẃi tháng ya tei nini twikhorni twino bo nung lai ya, chwng habugrani lama kotor tẃi se tháng lai anw, chwng nini hano láiwi tháng bai ya sak yagra eba khe yaksi uphil lai glak.”

¹⁸ Tamo khe Idom bono hai hwnwi sa kha, “Nwng ani ha tẃi láiwi thángwi man ya, wng ya khe seng khochaui nwng bai choba se nang lainani phainai.”

¹⁹ Israil bororok bono hai hwnwi sa kha, “Chwng lama kotor tẃi se tháng lai anw, ang tei ani mal-matarok nini twino nung twrwng khe, aswk khe ang rang su-ui rwnai tei mungsa buya, ano yakung bai himwi thángnani simi se rw ja di.”

²⁰ Hai phano bo, “Norok thángwi man glak,” hwnwi sa kha. Aswk kheno Idom borok kwbángma tlangwi phan khe bórok bai nang lainani nongkhorwi tháng lai kha.

²¹ Omo hai khe Idom Israilrokno bini ha tẃi lái tháng rwnani gosi li ya. Aboni bagwi Israil bini aroni uphil kha.

Aron thwimani

²² Israil bororok tei bebak lukurok Kadesni kutulwi Hor hachuk o sók phai lai kha.

²³ Aphuru Idomni ha ari Hor hachugo Subraiyung Musi bai Aronno hai hwnwi sa kha,

²⁴ “Aron ma thwi sinai bo tei Israil bororokno ang rwmani ha-o habwi man glak, tamni hwn ba Meriba twi-o ani dagimano kebeng kha.

²⁵ Aron bai bini bwsla Eliasarno Hor hachugo tubu-ui phai di.

²⁶ Tei Aronni ríno khuk rwui bini bwsla Eliasarno chum rw di, Aron bini búchusong bai tháng sinai tei bo arono ma thwi sinai.”

²⁷ Musi Subraiyung dagimani hai’-no khlai kha, bórok Hor hachugo bebak lukurokni bwskang kasaui tháng lai kha.

²⁸ Hakhe Musi Aronni rírokno khuk rwui bini bwsla Eliasarno chum rwui rw kha. Aron aroni hachuk buchugo thwi kha tei Musi bai Eliasar hachukni nongkhorwi phai lai kha.

²⁹ Bebak lukurok Aronno thwimani nuk khe Israilrok Aronni bagwi talsa jora khá khamwi tong lai kha.