LEKHAMUNG 15 - Kok Borok (Re-edited) Bible (BSI)

Yapharmungni raida

¹ Subraiyung Musino hai hwnwi sa kha,

² Israilsarokno hai hwnwi sa di, ang norokno rwmani ha-o sók phai phuru khe,

³ norok Subraiyungni thani sógwi yaphar mungrok ma yaphar bainai, omo wng kha hór bai sógwi yapharmani musuk eba mera ma sa, norokni chakmano supungnani bagwi, khá phurwi yapharmani, chongjak jorani yaphar mungni bagwi Subraiyung motomjakmani tẃi khe yaphar di.

⁴ Subraiyungno yapharnai khe bo maichlam epha kaisani chi-o kaisa, hin kaisani banta brwi-o bantasa thok bai buljak auan kwsap kaham ma yapharnai.

⁵ Mera bwsa masa bai khe sógwi yaphar mung tei yaphar mungni bagwi hin kaisani banta brwi-o bantasa angur bwtwi nungjaknai ma yapharnai.

⁶ Phiya ba mera yaphar phuru khe chámung yapharmung hwnwi hin kaisani brwi-o kaitham thok bai buljak auan kaham epha kaisani chi-o kainwi tiyar khlai di.

⁷ Tei hin kaisani kwtham o kaisa angur bwtwi nungjaknai Subraiyungni thani-o motom sa rwui ma yapharnai.

⁸ Nung Subraiyungni thani chakmani tei hamkraini bagwi sógwi yaphar mung tei yaphar mungni bagwi musuk bwsa masa ma yapharnai.

⁹ Aphuru musuk bwsa bai baksa chámung epha kaisani chi-o kaitham auan kaham hin kaisani khak sa thok bului ma yapharnai.

¹⁰ Norok Subraiyungni thani-o yaphar phuru khe hin kaisani khak sa angur bwtwi nungjaknai, hór bai motomsa rwui ma yapharnai.

¹¹ Omo hai khe máng musuk, mera, eba mera bwsa tei punjua yaphar phuru khe ma khlainai.

¹² Norok kwbángma yaphar phano masa masano omo hai khe máng khlai di.

¹³ Bebak Israil ha-o achainai bebak bororok Subraiyungni thani-o motomsa rwui hór bai yaphar phuru omo hai khe tiyar ma khlai bainai.

¹⁴ Tei khoroksa swk phatar hani borok kusu norokni thani-o tong phai khe bo Subraiyungni thani-o motomsa rwui hór bai yaphar phuru khe o borokbo norok khlaima haino ma khlainai.

¹⁵ Norokni dophani bagwi tei norokni bisingo tongnai phatarsarokni bagwi raida kaisa’-no wngnai, omono norokni kusung kusungni raida wng sinai norok phano wng thung, phatarsa phano wng thung, Subraiyungni thani-o bebakno baksa.

¹⁶ Norok bai norokni bisingo tongnai phatarsarokni bagwi raidabo kaisa tei khlaithaibo kaisa’-no wng sinai.

¹⁷ Subraiyung Musino hai hwnwi sa kha,

¹⁸ “Israil bororokno sa di, norok ang tlangmani ha-o sók phai phuru khe,

¹⁹ tei o hani chámungno chá phuru khe Subraiyungno bo aroni kaisa yapharmung yaphar lai di.

²⁰ A ha-o manmani swkangni auanno tei mai manmano thái kwtalno Subraiyungni thani yaphar di.

²¹ Norok puilano kusung kusungo o hani chámung bwthái manmano Subraiyung thani ma yaphar bainai.

²² “Phiya ba norok Koróui Subraiyung Musino samani aswk dagimarokno khlai ya hwn khe,

²³ bebakno Musini bising tẃi Subraiyung dagiui rwmani salni simi phai kusung kusung jora,

²⁴ omono lukurok si yaui khlaijak twrwng khe hakhe bebak lukurok musuk dudu-kolom masa Subraiyungni thani motomsa rwui sógwi ma yapharnai tei abo bai baksa chámung tei nungmung, raida tẃi khe punjua masa sumsokni bagwi ma yapharnai.

²⁵ Tei ochai bebak Israil bororokni bagwi ma súchanai, aswk khlai khe bórok nakarjak bainai, tamni hwn ba omo kaisa korómani se, bórok súchajakmani bagwi yapharmung, Subraiyungni thani-o hór bai khe, bórokni sumsokni bagwi ma yaphar kha.

²⁶ Israilni bebak lukurok bai phatarsarok nakarjak bainai tamni hwn ba bebakno oro Koróma-o duljak bai kha.

²⁷ “Tumungno khoroksa swk khá ka yaui sumsok khlai khe, bo bisi kaisani punjwkno bini sumsokni bagwi ma yapharnai.

²⁸ Ochai Subraiyungni bwskango korónai borokni sumsokni bagwi ma súchanai, bo súchajak bai khe nakarjak sinai.

²⁹ Koróui sumsok khlaimani abo bebakni bagwi raida kaisa’-no wngnai. Bo Israil phano wng thung eba phatarsa phano wng thung.

³⁰ Phiya ba khoroksa swk sakni hani borok eba khe phatarni borok phano wng thung yak tisaui sumsok khlaiwi Subraiyungno hamya sa khe—o borok khe bini sakni bororokni aroni norwi rohorjaknai.

³¹ Tamni hwn ba bo Subraiyungni kókno sak nang ya wngwi kerong swbaimani klai-o, o borok khe sói-sói norwi rohorjak sinai, bini cha ya bini saka’-ono klainai.”

Sabat sal swbainai borok

³² Israilrok hasing panthoro tong bai phuru khoroksa borokno Sabat salo bol thumwi tongmani nuk lai kha,

³³ hakhe bono bol thumwi tongmani nuknai borok bono Musi bai Aron tei bebak lukurokni bwskango tubu lai kha.

³⁴ Bórok bono chobwi ton lai kha. Tamni hwn ba bono tamo khlaijaknai srai-srai wng ya kho.

³⁵ Hakhe Subraiyung Musino, “O borok ma thwinai, bebak lukurok bono bathamni phataro tlangwi holong bai khitarwi ma butharnai,” hwnwi sa kha.

³⁶ Subraiyung Musino dagimani hai’-no bebak lukurok bono bathamni phataro tlangwi holong bai khitarwi buthar lai kha.

Rí buchugo khutwng buthup khamani raidarok

³⁷ Subraiyung Musino hai hwnwi sa kha,

³⁸ nwng Israil bororokno hai hwnwi sa di, “Norokni kusung kusungo’-no bórokni rí buchugo khutwng buthup khe kha di, o khutwngni buchugo khe kosom kwkhrang narwk di.

³⁹ Norok muitu mannani bagwi o khutwngno ma ton sinai, hakhe norok Subraiyungni bebak dagimarokno muitu khlai manna tẃi tei norokni sakni bwkha muchungma tei mokol bai naina muchungma lama-o phérwi tháng ya tẃi khe omono khlai di.

⁴⁰ Hakhe norok muitu khlaiwi bebak ani dagimarokno khlaiwi norokni Subraiyungni bwskango kwthar khe tongwi manna tẃi khe khlai di.

⁴¹ Ang Subraiyung norokni Kaitor, norokni Kaitor wngnani hwnwi norokno Ijip hani kariui tubunai Ang’-no norokni Subraiyung Kaitor.”