LEKHAMUNG 14 - Kok Borok (Re-edited) Bible (BSI)

Bororok cha ya hwnwi samani

¹ Hakhe bebak bororok’-no hopung chirik laiwi kap lai kha.

² Tei Israilni bebak bororokno Musi bai Aronno hamya saui hai hwnwi sa lai kha, “Tamni chwng Ijibo thwi li ya wng lang de! eba khe o hasing panthoro bo thwi li ya wng lang!

³ Tamni Subraiyung ba chwngno seng bai butharnani hwnwi o ha-o ba ma tubu lang? Chini bihik bwsarok kwma bainai kha, chwng Ijibo kiphilwi thángmani se ham kuk kha mun.”

⁴ Bórok khoroksa bai tei khoroksa, “Phai di, chwng khoroksa ojama songwi Ijibo kiphilwi tháng lai anw,” hwnwi sa lai kha.

⁵ Hakhe Musi bai Aron bebak aro kuthum laijak Israil bororokni bwskango ha-o mwkhang ma bom bai kha.

⁶ Tei hano naichomwi phai lainairokni bisingo Nunni bwsla Josua bai Jephuneni bwsla Kaleb bórokni rírokno sichik laiwi khá kham kha.

⁷ Tei bebak Israilsarokno hai hwnwi sa lai kha, “Chwng nai laiwi phaimani ha omo le belai’-no kaham.

⁸ Subraiyung chwngno kubui’-no hamjak khe chwngno o ha-o tubunai tei dut bai piya bwtwi yorjak hano chwngno yapharnai.

⁹ Norok Subraiyungno ta kebeng lai si di, tei o hani bororoknobo ta kiri di, tamni hwn ba bórok chini monokjaknai se wng kha; bórokni kasunai bórokni aroni norjak kha tei Subraiyung baithang chwng bai pal tongo bórokno ta kiri bai di.”

¹⁰ Phiya ba bebak bororok bórok khoroknwino holongthai bai khitarwi buthar bai si di hwn lai kha. Aphuru khe Subraiyungni chongmari aro tong bainai bebak Israilsarokni kuthum laima rí nogo sók phai kha.

Musi bororokni bagwi suri sanmani

¹¹ Subraiyung Musino hai hwnwi sa kha, “O bororok ano tei bwswk nor sinai? Ang bórokni bwskango kwbángma soidomni samung phunugui bo bórok ano poito chá li ya wng bai lang?

¹² Ang kirimasingcha bemuk bai bórokno buthar bai sinai tei o hanobo rw yaui tong sinai tei ang nono simi bórokni slái dopha kotor tei phan gwnang khlai sinai!”

¹³ Phiya ba Musi Subraiyungno hai hwnwi sa kha, “Omo hai khe Ijiprok o kókno khna bainai tamni hwn ba bórokni bisingni se nini phankrak phan bai o bororokno tubu-ui phai kha,

¹⁴ tei bórok o ha-o tong bainai bororokno bo sa bai anw, bórok o kóknobo khna bai kha, ‘O Subraiyung, nwng o bororokni bisingo tongo tei nwng bórok bai dak-dak khe nukjago tei nini chumui bórokni saka-o tongo tei nwng salo khe chumui bodol bai horo khe homchang bai khe bórokni swkang swkang thángo.’

¹⁵ Tabuk nwng o bororokno khoroksa borok hai khe buthar khe nini aswk samung kaham khlaimani kókno khnanai dopharok hai hwnwi sa lai anw.

¹⁶ Subraiyung o bororokno kaisa hano rwnai hwnwi swmai tangmani, bórokno a ha-o tlangwi man liyani bagwi se hasing panthoro bórokno butharwi ma pái kha.

¹⁷ Aboni bagwi ang tabuk suri ja-o, nwng swmai tangmani hai’-no Subraiyungni phan nukjak si thung, nwng ba ahai hwnwi samani bla!

¹⁸ ‘Subraiyung khe doui joli ya, hamjakma kwbáng, cha ya bai deramano nakarnai, hwn ba bo sumsok khlainairokno khe buphasongni sumsokni bagwi bwsarokni thani-o kusungtham kusungbrwi jora majra man rwnai.’

¹⁹ Ang koija-o, nini hamjakma kwbángma tongmani bagwi tei nwng o bororokno Ijip hani simi tabuk jora nakarwi phaimani hai khe, bórokno nakar ja si di.”

²⁰ Hakhe Subraiyung hai hwnwi sa kha, “Nini kók tẃi’-no ang nakar bai kha.

²¹ Tei kubui’-no, ang kwthang se tei bebak hayung gwnangwi Subraiyungni chẃngsacha bai kupulung wngnai,

²² haini bagwi khoroksa swk ani chẃngsachano Ijip ha-o tei hasing panthoro soidomni samung khlaimarokno nuk bainairok hai phano ano uáichi chánaiwi nainairok tei ani kókno khna yarokno,

²³ ang bórokni búchusongni thani-o swmai tangwi ha rwnai hwnmani, bórok a hano nugwi glak tei ano nornai bororok abono nuk glak.

²⁴ Phiya ba ani seleng Kaleb khe buini slái juda kuk khe uansukmung tongo tei bwkha rw súgwi ang bai tongmani bagwi bo yapri káui phaimani ha-o bono hap rwnai tei bini bosongrok abono mannai.

²⁵ Tabuk Amalekrok bai Kananrok aroni harungo tong bai-o, khwna-o norok uphilwi twijlang kwchakni lama tei hasing panthor bwkhak lam rw bai di.”

Kaitor bororok cha ya sa laima bagwi sátokmani

²⁶ Subraiyung Musi bai Aronno hai hwnwi sa kha,

²⁷ “Tei bwswk balogwi o borok khechrarok ani thani kengai lai sinai? Ang Israil bororok kengai laimano khna kha.

²⁸ Bórokno hai hwnwi saui di, ang Subraiyung kwthang omono sa-o, ‘norok ano samani khnama hai’-no, ang norokno khlainai;

²⁹ norokni mang kwthwi hasing panthoro klai tong rwk bainai, norokni bisingo lekhamani nokha bisi nwichi tei omoni slái kwbáng kuk ano hunu-hanai sa lainairok,

³⁰ ang swmai tangwi norokno hano rwnai hwnmani-o Jephuneni bwsla Kaleb bai Nunni bwsla Josua o khoroknwino karwi tei khoroksa phano aro habwi man glak.

³¹ Norokni chwrairok hanang-pinang wng bainai hwnwi norok sa laimani ang bórokno-o ha-o tubunai, norok normani ha-o bórok ma tháng bainai.

³² Hai phano norokni mang kwthwi khe o hasing panthoro’-no klai tong bainai.

³³ Norokni bwsarok khe nokha bisi brwichi jora-o hasing panthoro mera ma mwrwknai, norokni poito kwrwini bagwi norok pái súgwi hasing panthoro thwi bai ya sak bórok tekto manẃi tongnai.

³⁴ Norok nokha sal brwichi jora hano naichom lainani thángmani, o sal bai baksa nokha bisi brwichi jora, salsani bisi kaisa khe norokni cha yano ma ruju bai sinai, bisi brwichi norok ang chajak ya wngmano manjaknai.

³⁵ Ang Subraiyung Kaitor sa-o, ano kuthumui kebengwi bachanai bebak khechrarokni thani ang omorokno sóino khlainai, o hasing panthoro’-no bórok pái bainai, orono ma thwi bainai.’ ”

³⁶ Haino naichomwi phai di hwnwi Musi rohormani bororok tei bórok kiphilwi phaiwi o hani kókno hamya khe sa phaiwi bebak bororokno khá swbainairok,

³⁷ omo hai khe hamya kók sa phainairok Subraiyungni bwskango bok manjagwi thwi bai kha.

³⁸ Phiya ba bórokni bisingo Nunni bwsla Josua bai Jephuneni bwsla Kaleb khe kwthang tong rwk kha.

Puila ha sekna nai gramani

³⁹ Musi bebak Israilsarokno o kókno saui khna rw bai khe aswk khe bórok bwkha nang súgwi kap lai kha.

⁴⁰ Ulo bórok aichugo bacha laiwi hathái kami bochlongo kasa laiwi hai hwnwi sa lai kha, “Nai di, chwng tabuk oro tongo, Subraiyung swmai tangmani ha-o chwng tháng lai sinai, tamni hwn ba chwng sumsok khlai kha.”

⁴¹ Tamo khe Musi hai hwnwi sa kha, “Tamni norok Subraiyungni kókno khna ya ba, tabuk chwng man glak?

⁴² Norok ta tháng lai khru di, Subraiyung norok bai kwrwi wng ya khe norokni arirok bai mechenjak bainai.

⁴³ Amalekrok bai Kananrok norokni bwskango tong bai-o, norok bórokni yago klai bainai, tamni hwn ba norok Subraiyungno uklogo khlai bai kha, Subraiyung norok bai tong glak.”

⁴⁴ Hai phano bórok sakni phan bai hathái kami bochlongo kasa lai kha. Subraiyungni Swmai bokhok tei Musi khe bathamni nongkhor li ya.

⁴⁵ Hakhe aro hathái kami-o tong bainai Amalekrok bai Kananrok phaiwi bórokno mechen kha tei Horma jora bórokno rwkhlai rohor bai kha.