LEBI 23 - Kok Borok (Re-edited) Bible (BSI)

Tongtharni terrok

¹ Subraiyung Musino hai hwnwi sa kha,

² “Israilrokno hai hwnwi sa di Subraiyungni mungwi chongjak terrokno kwthar hwnwi sakhlai rw di ani chongjakmarok wng kha omo hai;

³ nokha sal dok jora nwng samung tangnai; tamo khe nokha salsnini Sabat sal khe lenglanani bagwi; abo khe kwthar khe malai laimani sal; nwng a salo samung ta tang di, jethani tongwibo a sal Subraiyungni bagwi Sabat sal.

⁴ “Omorok wng kha Subraiyungni chongjak terrok, omorok kwthar, omorokno nwng sal kwthar hwnwi sakhlai rw di.”

Yókma ter tei auang bánglani ter

⁵ “Talni puilani nokha sal chibrwini sanja-o khe Subraiyungni yókma ter.

⁶ A talo’-no sal chibani salo khe Subraiyungni auang bángla ter; nwng nokha salsni auang bángla chá di.

⁷ Nokha salsnini puilani salo khe kwthar kuthum laimung kuthum di, nwng a salo samung kwrak ta tang di.

⁸ Phiya nwng nokha salsni Subraiyungni thani hóro sógwi yaphar di, tamni hwn ba nokha salsnini a sal wng kha kwthar, nwng a salo samung kwrak ta tang di.”

⁹ Hakhe Subraiyung Musino hai hwnwi sa kha,

¹⁰ “Israilrokno hai hwnwi sa di, ang nono rwna hwnmani ha-o sók phaiwi hukba-habani mai khul ra phuru nwng abórokni chopsa ochaino rw phai di.

¹¹ Bo abono Subraiyungni bwskango homwi ma yapharnai abo hai khe nwng yachakjaknai, Sabat salni teini salo ochai abono ma homnai.

¹² Hakhe nwng a maitang bochopno homwi yapharmani salo Subraiyungno nokha bisi sa umorni khait kwrwi mera chwla masa sógwi ma yapharnai.

¹³ Tei aboni logi-o bwthái bwchlwini yapharmungno aboni epha kaisani chi-o kwnwi thok bai sabuluwi Subraiyungni thani sógwi yaphar di, báhai motom sar rwi khakbrwini khaksa khe angur bwtwi ma yapharnai.

¹⁴ Norok Subraiyungni thani yapharmungrok yaphar ya sak auang sóngjak bwthái bumuk, eba kwthwng chámungrok ta chá di, norok tong thani kusung kusungni bagwi omorok norokni khlaithai raida wngnai.

Bwthái bwchlwi yapharma ter

¹⁵ “Sabat salni teini salni simi-o maichopno homwi yapharma salni simi chengwi nokha sal chisni supungwi lekha di,

¹⁶ abo tẃi kheno uáisni sabat lekhaui aboni teini salo khe sal bachino lekha di; hai khe nwng aphuru Subraiyungni thani mai kwtalno yaphar di.

¹⁷ Norok norokni tongthaini sak sakni homwi yapharnani bagwi epha kaisani chi-o kwnwi khe lepnwi auang tubu di; abono auan kwsap kaham bai khe ma snamnai tei chuan bai ma bulnai abono chuan bai bului ma sernai. Subraiyungni thani thái kwtal yaphar tẃi khe abono ma yapharnai.

¹⁸ Tei norok a auang bai baksa khe khait kwrwi mak sni mera bwsa, musuk chwla masa tei maknwi mera sógwi Subraiyungni thani yaphar di, abórok bai baksa bwthái bwchlwi yapharmung tei nungjaknai yapharmungrok Subraiyungni thani motomsa rwui yaphar di.

¹⁹ Aboni yagulo nwng punjua masa sumsokni yapharmungni bagwi, maknwi umor nokha bisi sani mera bwsa maknwi khakchangma yapharmung yaphar di.

²⁰ Hakhe ochai a auangno tei mera maknwino, thái kwtalrokno homwi yapharma hai khe Subraiyungni thani ma yapharnai, abórok ochaini bagwi Subraiyungni thani kwthar wngnai.

²¹ Nwng a salo’-no sakhlaimung sakhlai di; norokni kwthar kuthum laimungo kuthum rw di; omo norokni bagwi kusung kusung tong phlainai kerong wngnai.

²² “Nwng nini hani mai ra phuru panthor busuni maino pái rwui ta ra di tei ra baiwi páiwi tong rwkma maitangrokno ta thum di; abórokno kwrwirok tei phatarni bororokni bagwi kabu di. Ang’-no Subraiyung nini Kaitor.”

Bisi kwtalno rwgwi ter khlaimani

²³ Hakhe Subraiyung Musino hai hwnwi sa kha

²⁴ “Israilsarokno hai hwnwi sa di, nokha talsni talni, puilani salo nwng kwchang kwchang khe lengla di tei totrorok tamwi muitu khlaima bai kwthar kuthum laimung kuthum di.

²⁵ Nwng samung kwrak ta tang di, tamo khe, Subraiyungno sógwi yapharmung yaphar di.”

Súchajakma sal

²⁶ Subraiyung Musino hai hwnwi sa kha,

²⁷ “A nokha talsni talni salchini sal khe kwthar khlaima sal; a salo nwng kwthar kuthum laimung kuthumui sak sakni khá-o dukhu wng di tei Subraiyungni thani sógwi yapharmung yaphar di.

²⁸ A salo sak sakno khá dukhu phnang yarok bórokni bororok bai swkakjaknai.

²⁹ A salo khoroksa swk mungsa swk chámung chá khe bo Kaitorni bororok bai kháirokjak glak.

³⁰ A salo khoroksa swk phano samung tang khe ang a borokno borokrokni bisingni sokomorwi páinai.

³¹ Nwng mungsa samung phano ta khlai di, omo kusung kusung romwi nwng tong thani nini bagwi mol brúmni bagwi kerong wngnai.

³² A sal norokni bagwi lenglajaknai Sabat sal wngnai, nwng a salo sakno khá dukhu ma phnangnai a talni salchukuni salni sanjani simi nwng lenglama salno ma khlainai.”

Bathakthairogo ter khlaimung

³³ Subraiyung Musino hai hwnwi sa kha,

³⁴ “Israilrokno hai hwnwi sa di, a nokha talsni talni sal chiba jora nokha salsni romwi Subraiyungni thani kainok ter khlai di.

³⁵ Puilani salo khe kwthar kuthum laimung kuthum di; nwng mungsa swk samung kwrak ta tang di.

³⁶ Nokha salsni romwi nwng Subraiyungno hór bai khlaiwi yapharmung yaphar di, nokha salcharni salo khe kwthar kuthum laimung kuthum di tei Subraiyungni thani hóro sógwi yapharmung yaphar di; omo kaisa khulum laimung ter; nwng mungsa swk samung kwrak ta tang di,

³⁷ “Omorok wng kha Subraiyung bai chongjak ter, nwng a salrokno kwthar hwnwi sakhlai di tei sal brúmni khlaithairokno abo hai kheno Subraiyungni thani hóro sógwi yapharmungrok yaphar di, bwthái bwchlwirok chámungrok sógwi yaphar di, ratharmungrok nungjaknai yapharmungrok sói salo khe yaphar di.

³⁸ Abórokno karwi Subraiyung sabatno tei nini yapharmungrokno karwi chakmungrok yapharmungrok tei khá phurwi yapharmungrok Subraiyungno yaphar di.

³⁹ “Nokha talsni talni sal chibani salo norokni ha-o tháimani mai-khulrok raui pái khe nwng Subraiyungni bagwi nokha salsni romwi ter khlai di, puilani salo khe kwchang kwchang khe lengla di, tei salcharni salo nwng kwchang kwchang khe lengla di.

⁴⁰ Puilani salo khe nwng buphang kahamni bwtháirok, khajuri bokorongrok, buphang bwlái gwnang bedekrok twi rukungo barnai samphangrokno tubu-ui nini Subraiyung Kaitorni bwskango salsni tongthok di.

⁴¹ Norok bisi-o nokha salsni Subraiyungni bagwi ter khlai di; omo norokni bagwi kusung kusungni kerong wngnai; abono nokha talsnini talo khlai di;

⁴² norok salsni kainogo tong di; Israilsarok bebakno kainogo ma tongnai,

⁴³ abo bai norokni thinangni bosongrok ang Israilsarokno Ijipni kariui tubu-ui bahai khe kainogo ton kha abono saui mannai; ang nini Subraiyung Kaitor.”

⁴⁴ Abo tẃi khe Musi Subraiyung chongmani salrokno borokrokni thani sakhlai rw kha.