LEBI 14 - Kok Borok (Re-edited) Bible (BSI)

Bukurni bemuk manjakma yagulo kwthar khlaimani

¹ Subraiyung Musino hai hwnwi sa kha,

² “Biyadi chájak borokno kwthar khlaimani salo khlaijaknai raida omo hai wngnai. Bono ochaini thani tubuna nangnai;

³ tei ochai bathamni phataro thángnai tei bono amjogwi nainai tumungno a biyadi manjaknai ham khe

⁴ ochai bórokno a kwthar khlaijaknaini bagwi maknwi tok kwthar tei satrai buphang tei chaksru-sru buikhumu tei hisop tubu-ui ma phainai.

⁵ Ochai bórokno a tokrokni masano twi yorjago hani manwi-o ma ratharnai, hwnwi dagi kha.

⁶ Bo a tok kwthangno sidar buphang bai tei buikhumu chaksru-sru tei hisop bai khe naui, a twi kochokjago ratharmani a tok kwthangno thẃi-o ma chomsanai.

⁷ Tei bo uáisni a thẃino a biyadini kwthar khlaijaknaini saka-o ma sarnai, hakhe bo bono kwthar hwnwi sakhlainai tei a tok kwthangno khe hapharo phiyógwi rwnai.

⁸ Tei a kwthar khlaijaknai bo bini ríno súnai tei bo khorokni bwkhnai silwi ma páinai tei bo twi ma tukunai, hakhe bo kwthar wngnai tei aboni ulo khe bo bathamo phainai tamo khe bo salsni jora bini rínokni phataro ma tongnai.

⁹ Tei salsni salo bo bini khorokni bwkhnai silwi ma páinai. Bo sengkari khochai ma silnai tei mokolbori ma silnai tei bwsakni bebak buikhumu ma silnai hakhe bo nini rí-chumrokno ma súnai tei twi ma tukunai hakhe bo kwthar wngnai.

¹⁰ “Tei salcharni salo bo khait kwrwi mera chwla naui tei khait kwrwi bisi kaisani mera bwrwi naui kilo kwtham bini auan kwsap thok kaham bai sablu-ui uásúngsa thok lu-ui ma dalnai.

¹¹ Ochai a kwthar khlaijaknai borokno a manwirokno tẃiwi rínokni bwskang Subraiyungni thani ma tubunai.

¹² Tei ochai mera chwla masa naui tei abono majra yapharmungni bagwi a thok uásúngsa bai khe yapharnai tei abono Subraiyungni thani sibmung yapharmungni yapharma wngnai.

¹³ Tei bo a merano sumsokni yapharmung tei sógwi yapharmani a kwtharno ma ratharnai, tamni hwn ba majrani yapharmung bo sumsokni yapharmung haino ochaini banta, omo kwthar kuk.

¹⁴ A ochai majrani yapharmungni kisa thẃi naui a kwthar khlaijaknaini yagrani khunjubago tei bini yagra yakni yasima tei o yagra yakungni yasima-o ma phulnai.

¹⁵ Hakhe ochai yaksi yapha-o o uásúngni thok kisa naui bini yaksi yakungni yapha-o lukhlainai,

¹⁶ ulo ochai bini yagra yakni yasino bini yaksi yapha-o tongmani thogo chomsanai tei Subraiyungni bwskango bo bini yasi bai a thokno uáisni sarchanai.

¹⁷ Hakhe ochai bini yago thok bára tong rwkmano a kwthar khlaijaknai borokni yagra khunju bago tei yagra yakni yasima-o tei yagra yakungni yasima-o, majra yapharmungni a thẃino ma phulnai.

¹⁸ Tei bini yago tong rwkmani thok barano a ochai kwthar khlaijaknai borokni bokhorok saka-o phulnai hakhe ochai a borokni bagwi Subraiyungni bwskango súchanai.

¹⁹ Ochai a kwthar khlaijaknai borokno súchana bagwi sumsokni yapharmung yapharwi aboni ulo khe sógwi yapharmungni bagwi ratharnai;

²⁰ hakhe aphuru ochai sógwi yapharmung bai bwthái bwchlwi yapharmungno háyá-o yapharnai. Abo hai khe se ochai a súchajaknaino súchanai tei borok kwthar wngnai.

²¹ “Tumungno a borok chúk ya bigra hwn khe bo sakno súchana ratharmungni bagwi mera bwsa masa tei bwthái bwchlwi gram sara auan tei thok uásúng ma tubunai.

²² Tei bengpharuk maknwi eba pharuk bwsa maknwi bini yak chúk tẃi ma tubunai masa khe sumsokni yapharmungni bagwi tei masa khe sógwi yapharmungni bagwi.

²³ Tei salcharni salo bo abórokno tẃiwi sak kwthar wngna bagwi rínokni bwskango Subraiyungni thani yapharna bagwi ochaini thani ma tubunai.

²⁴ Ochai a majrani yapharjaknai mera bwsano tei thok uásúng naui ochai abórokno Subraiyungni bwskango narwi Subraiyungni thani narwi yapharjaknaino yapharnai.

²⁵ Tei bo a Majrani yapharmungni merano ratharnai tei ochai majra yapharmungni thẃino naui a kwthar khlaijaknaini yagra khunjubago tei yagra yakni yasima tei yagra yakungni yasima-o phulwi rwnai.

²⁶ Tei ochai bini baithangni yaksi yakni yapha-o kisa swk thok lukhlai rwnai;

²⁷ tei bo bini yagra yakni yasi bai bini yaksi yakni yapha-o tongmani thokno Subraiyungni bwskango uáisni sarnai.

²⁸ Tei ochai bini yakni thokno kisicha naui a kwthar khlaijaknai borokni yagra khunjubago tei yagra yakni yasima bai yagra yakungni yasima-o majrani yapharmungni thẃi ma phulnai;

²⁹ hakhe abórokno Subraiyungni bwskango súchana bagwi a ochai bini yakni thok tong rwkmano a kwthar khlaijaknai borokni khorogo phulwi rwnai.

³⁰ Hakhe bini chúkma jora tẃi bo tokthu eba pharuk bwsa yapharnai,

³¹ bwthái bwchlwi yapharmung bai baksa bo masa khe sumsokni yapharmungni bagwi tei masa khe sógwi yapharna bagwi. Abo hai khe se ochai Subraiyungni bwskango a kwthar khlaijaknai barokmano súchanai.

³² Omono wng kha kwthar wngna bagwi yapharna chúk ya biyadi chájak borokni raida.”

Bakuma perjak nokrok

³³ Subraiyung Musi bai Aronno hai hwnwi sa kha,

³⁴ “Norokno rwna hwnmani Kanan ha-o hap phai phuru tei ang núkhung khungsa-o biyadi bemuk rohor phuru

³⁵ aphuru a nokphang bo phaiwi ochaino hai hwnwi ma sanai, ‘Ani núkhungo mungsa swk bemuk kwpha phai khna hwnwi ang chongo.’

³⁶ Aphuru khe ochai a bemukno amjogwi naina bagwi a nokno bukcha khlai di hwnwi daginai hai ya khe a nogo tongnai bebakno kwthar ya hwnwi sakhlaijaknai tei abo hai khlai bai khe se ochai a nokno naina bagwi thángnai.

³⁷ Tei bo a bemukno amjogwi nainai; Tumungno a nokni deualo khrangji-ji eba chaksru-sru mari nuk khe tei abo bemarno kuthugo nukjak khe,

³⁸ a ochai a nokni nongkhorwi nokha salsni jora a nokno kholobwi tonnai.

³⁹ Tei a ochai nokha salsni salo tei uáisa a nogo phainai tei bo kaichomwi nainai. Tei tumungno a bemuk a nokni berarogo koproi khe

⁴⁰ a ochai bórokno bemuk kwphajak holongrokno swkagwi kamiyungni phataro sitra khibima burungo khibiui rw di hwnwi ma daginai;

⁴¹ tei bo a nok bisingni bebakno kaham khe rokpraui swkak di hwnwi daginai tei rokprajak gungrarokno kamiyungni phataro sitra khibima burungo khibiui rwi di hwnwi daginai;

⁴² tei aboni yagulo bórok kubunni holongrok tubu-ui a holong sokokjakma jidolo beraui bo kwtal khe lepeui rwnai.

⁴³ “Tumungno bo nokni holongrok sokokna bagwi nokno rogwi lepeui páiwi bo a bemuk haino hai nukjak phi khe,

⁴⁴ a ochai a nokno haino hai thángwi naiwi nainai tei tumungno a bemuk a nogo koproi phi khe, a nogo solonai biyadi wng kha hwnwi sakhlaijaknai, abo kwthar ya.

⁴⁵ Tei aphuru khe bo a nokno swbaiwi, nokni holongrok buphangrok swbaiwi kamiyungni phataro sitra khibima burungo khibiui rwuinai.

⁴⁶ Khoroksa phano a nok kholopjago habwi khe bo sal hap ya sak jora kwthar ya wngwi tongnai;

⁴⁷ tei a nok bisingo thunai tei chánai bo’-bo bini rí-chumrokno ma sú bainai.

⁴⁸ “Phiya ba a nok kwtal khe lepejakma yagulo, a ochai phaiwi a nokno amjogwi naiwi bemuk koproijak nuk li ya hwn khe a nokno kwthar hwnwi sakhlainai, tamni hwn khe a bemuk ham kha.

⁴⁹ Phiya bo a nokno súchana bagwi toksa bwsa maknwi, sidar buphang tei chaksru-sru khutwng tei hisop bokong nanai,

⁵⁰ tei bo a toksa bwsa maknwirokni bere masano hani twgo twi kochokjak saka-o beraui ratharnai;

⁵¹ hakhe sidar buphang berechek, hisop bedek tei o chaksru-sru khutwng tei a toksa bwsa kwthang bai ako bai, twi kochokjago ratharjaknai a toksa bwsani thẃi-o chomsanai tei a nogo uáisni jora sarchanai.

⁵² Abo hai khe se bo a nokno toksa bwsani thẃi bai tei twi bai tei toksa kwthang bai tei sidar berechek, hisop bedek tei khutwng chaksru-sru bai khe a nokno kwthar khlainai

⁵³ Hakhe bo a toksa bwsa kwthangno kamiyungni phataro tlangwi abono phiyógwi rohornai, abo hai khe se bo a nokno súchanai tei abo kwthar wngnai.”

⁵⁴ Omorokno wng kha biyadi bemukni bagwi raida. Abo motókma bemuk phano wng thung.

⁵⁵ Rí-chumo biyadi bemuk eba khe nok,

⁵⁶ tei robonmani eba khe kwsa munui pekhakmani eba khe bukuro mari wngmani abórokno

⁵⁷ kwthar ya de eba kwthar phunukmani raida. Abo wng kha biyadi bemukni bagwi raida.