LEBI 11 - Kok Borok (Re-edited) Bible (BSI)

Chámainai mal-matarok

¹ Tei Subraiyung Musi bai Aronno hai hwnwi sa kha,

² “Israil bororokno sa di, ha saka-o tongnai bebak o mal-matarokno norok cháui mano.

³ Mal-matarokni bere yásku gwnang tei yásku khaknwi khe khakjak tei hanuaibo uár khe omorokno norok cháui mano.”

⁴ Hai phano mal-matarokni bere hanuai uár phano tei yásku khaknwi khe khakjak phano omorokno khe ta chá di; mangingang, omo hanuai le uáro tamo khe bini yásku khaknwi khe khakjak ya, nini bagwi abo le kwthar ya.

⁵ Hachukni pun, bo hanuai le uáro tamo khe bini yásku khaknwi khe khakjak ya, nini bagwi omo kwthar ya.

⁶ Kurkus, bo hanuai le uáro tamo khe bini yásku khaknwi khe khakjak ya, omo nini bagwi kwthar ya.

⁷ Uakni yásku tongo tei abo khakjakno tamo khe bo hanuai uár ya. Omo nini bagwi kwthar ya.

⁸ Omorokni bahanno norok ta chá di tei bórokni kwthwiroknobo ta tang di; omorok norokni bagwi kwthar ya.

⁹ Twi-o tongnairokni bere norok omorokno cháui mano: twi-o tongnairokni bere bwkar tei bophor gwnangrok abo twijlangrokni phano wng thung eba twimarokni phano wng thung, norok cháui mano.

¹⁰ Tamo khe twijlangrokni phano wng thung eba twimarokni phano wng thung bwkar tei bophor kwrwi hwn khe tei twi-o kuphungwi tongnai kwthang yóngsa kúksarok, norokni bagwi selengmasingcha.

¹¹ Omorok norokni bagwi selengmasingcha wngnai; norok omorokni bahan ta chá di tei bórokni kwthwirokno norok ma selengnai.

¹² Twi-o tongnai bebak bwkar tei bophor kwrwirok norokni bagwi selengmasingcha.

¹³ Phiya tokrokni bere omorokno norok ma selengnai, omorokno ta chá di, omorok wng kha selengmasingcha: toling, sikruk, toling kosom,

¹⁴ toling gudai, tolingsikari tei bebak tolingrokno

¹⁵ bebak tokharokno,

¹⁶ tok mangingang tokphua, duduma tei bebak horo birwi chánairokno

¹⁷ tákhuk, tokchiling, korua

¹⁸ twini takhumsa, pelikan, twini sikruk.

¹⁹ Boga kotor tei bebak bogarok, tokching tei tokbak.

²⁰ “Bebak bwkrang gwnang ha-o yakung kongbrwi bai malnairok norokni thani selengmasingcha.

²¹ Phiya ba yakung kongbrwi bai makhuknai bwkrang gwnang yóngsa-kuksarokni bere kuk hai ha-o baharnairokno abórokno khe norok cháui mannai.

²² Nwng kúkthora tei bono solnairok, kuyung tei bono solnairok kherambuk tei bono solnairok tei podrepot kúkrok khe norok cháui mano,

²³ phiya ba tei bwkrang bai yabrwi gwnang yóngsarok khe norokni bagwi selengmasingcha.

²⁴ “Phiya omorok bai bo kwthar ya wngnai; khoroksa swk omorokni kwthwino tang khe sal hap ya sak jora kwthar ya wngwi tongnai.

²⁵ Khoroksa swk abórokni kwthwino eba abórokni bwsakno bal khe, abo tẃi khe bo bini rí ma súnai tei sarik jora bo kwthar ya wngwi tongnai.

²⁶ Bebak mal-matarokni bisingo yásku tong phano bini yásku khaknwi ya hwn khe tei hanuai bo uár ya hwn khe borokno tang khe norok kwthar ya wngnai.

²⁷ Phiya yapha bai himnai mal-matarok bebakno norokni bagwi kwthar ya tei abórokni kwthwirokno tang khe sal hap ya sak jora kwthar ya wngwi tongnai.

²⁸ Khoroksa swk abórokni kwthwino eba abórokni bwsakno bal khe, abo tẃi khe bo bini rí ma súnai tei sarik jora bo kwthar ya wngwi tongnai. Abórok norokni bagwi kwthar ya.

²⁹ “Ha saka-o khaklap bai malnairok norokni thani kwthar ya, makhuknai sinjo, bej, nobraisarok,

³⁰ tokke, muphuk champa, simlwkuaksa, swkal thẃi nungnai,

³¹ o malnai bebakno norokni bagwi kwthar ya. Bórokni kwthwi tang khe sal hap ya sak jora kwthar ya wngwi tongnai.

³² Mungsa swk manwini saka-o a kwthwi klai khe abo kwthar ya wngnai, a manwi buphangni phano wng thung abo rí-chum phano wng thung eba bukurni manwi phano wng thung, eba rí soroi phano wng thung samung thepajaknai manwirok phano wng thung abo sal hap ya sak jora kwthar ya wngwi tongnai aboni ulo se kwthar wngnai.

³³ Mungsa swk a kwthwirok hani manwi saka klai khe a hani manwi bisingo tongnai manwirokbo kwthar ya wngnai tei norok abono swbai ma páinai.

³⁴ A manwirokni bere mungsa swk chámungo klai khe a chámung kwthar ya wngnai tei a hani manwi-o bebak nang mung tongmarokbo kwthar ya wngnai.

³⁵ Mungsa swk a kwthwirok twgo klai khe a twk bisingo tongnai manwirokbo kwthar ya wngnai; tei thapa-o phano wng thung eba twgo phano wng thung, norok abono swbai ma páinai,

³⁶ hai phano a twi tongma gola eba twikhorni twi khe kwtharno tongnai; tamo khe a kwthwirokno tangnai khe kwthar ya wngnai.

³⁷ Tei borokni a kwthwirok hukbaro sarnani bagwi tonmani bwchlwirokni saka-o klai khe abo le kwtharno tongnai.

³⁸ Tamo khe twi-o chomjak bwchlwirokni saka-o kwthwini mang klai khe abo kwthar ya wngnai.

³⁹ “Tumungno norok cháui manma mal-matani kwthwi tang khe norok sal hap ya sak jora kwthar ya wngwi tongnai.

⁴⁰ Tei a kwthwini bahanno chánai borok bo bini rí-chumno ma súnai tei sal hap ya sak jora bo kwthar ya wngwi ma tongnai tei a kwthwino balnai borok bono bini rí-chumno ma súnai, sal hap ya sak jora kwthar ya wngwi tongnai.

⁴¹ “Ha-o malnai bebak manwirok’-no selengmasingcha abórokno ta chá di.

⁴² Khaklap bai malnairok tei bársaui himnairok eba yakung kwbángmarok bebak ha saka-o malnairokno norok ta chá di tamni hwn ba abórok selengmasingcha.

⁴³ Norok a malnairok bai gwdalwi selengmasingcha ta wng di tei norok abórok bai gwdalwi ta dera di hakhe norok kwthar ya wngnai.

⁴⁴ Tamni hwn ba ang norokni Subraiyung Kaitor. Norok sakno khal di tei kwthar wng di, tamni hwn khe ang wng kha kwthar. Norok ha saka-o malnai manwirok bai gwdalwi sakno ta dera rw di.

⁴⁵ Tamni hwn ba ang Subraiyung Kaitor norokni Kaitor wngna bagwi norokno ha Ijipni tikhlai tubu kha. Ang kwtharba norokbo kwthar wng di.”

⁴⁶ Omorok wng kha, mal-mata toksa toktẃirok tei twi-o tongnai bebak kwthang manwirok tei ha-o malnai bebak manwirok.

⁴⁷ Ha sakani kwthang manwirokni bisingo bubo ba kwthar bubo ba kwthar ya, bubo ba chámai bubo ba chámai ya abórokno saui man rwmani raida.