LEBI 10 - Kok Borok (Re-edited) Bible (BSI)

Nadab bai Abihuni sumsok

¹ Tabuk Aronni bwsarok Nadab bai Abihu kaisa kaisa dugol naui aro hór phnang kha tei aro satrai rwi Subraiyungni bwskango hór kwthar ya yaphar kha, Subraiyung bórokno abo hai khe dagima kwrwi.

² Aphuru khe Subraiyungni aroni hór ongkhorwi phaiwi monogwi pái kha tei bórok Subraiyungni bwskango thwi bai kha.

³ Aphuru Musi Aronno hai hwnwi sa kha, “Omo’-no Subraiyung samani, ‘Ani gana-o tongnairokno ang sakno kwthar khe phunuknai tei bebak borokrokni bwskango ang chẃngsacha khlaijaknai.’ ” Hakhe Aron aphuru siring siring khe tong kha.

⁴ Yagulo Musi, Aronni bukhra Ujielni bwsarok Misael bai Eljaphanno ringwi hai hwnwi sa kha, “Gana phai di, norokni takhukrokno háyá kwthar bwskangni bathamni phataro tikhlai tlang bai di.”

⁵ Aphuru khe bórok Musi dagima tẃi khe bórokno bathamni phataro tlangwi tháng kha, aphuru phano borokni sago chummung chumjak kho.

⁶ Tei Musi Aronni bwsarok Eliasar tei Ithamarno hai hwnwi sa kha, “Norokni khwnai ta khengsar di tei rírok ta sichik bai di, wng ya khe norok thwinai tei lukurokni saka-o jolimung sók phainai, phiya ba norokni takhukrok khe Kaitor bai sók prajakmano khá khamwi kap lai di.

⁷ Tei rínokni Phataro ta th áng lai di, hai ya khe norok thwinai; tamni hwn ba Subraiyungni chongmani thok norokni saka-o tongo.” Tei bórok Musi sama tẃi’-no khlai lai kha.

Ochairokni raidarok

⁸ Tei Subraiyung Aronno hai hwnwi sa kha,

⁹ “Chuak arak ta nung di, norok buya, nwsarok buya, hai ya khe norok thwinai; kusung kusung norokni bosongni bagwi raida wngwi tong thung.”

¹⁰ Kwthar bai borok bánglano tei kwthar kwthar yano sini di.

¹¹ Tei Subraiyung Musini bising tẃi samani-o raidarokno norokni Israil lukurokno ma phrwngnai.

¹² Tei Musi Aronno tei kwthang tong rwknai bwsarok Eliasar bai Ithamarno hai hwnwi sa kha, “Subraiyungni thani sógwi yapharmani bwthái bwchlwi yapharmung tong rwkmano na di tei chuan bul yaui háyáni samo chá di.

¹³ Tamni hwn ba ang dagijak kha, Subraiyungni thani sógwi yapharma bai, norok a kwthar thai-o thángwi norok tei norokni bwsarok cháthai klai-o.

¹⁴ Phiya ba Israil bororokni kwthamungni yapharmungni yapharmano sipjak khaklap tei norokni sajwk-sajlasong bai cháthai klai-o, tamni hwn ba norok tei norokni bwsarok khlaithai.

¹⁵ Subraiyung dagima hai kheno, yapharjak a biya tei sipmung yapharjak khaklap hóro sógwi yapharma bupham bai baksa Subraiyungni thani sipmungni yapharma sipna bagwi tubu di abo nini bagwi nwsarokni bagwi kusung kusungni bagwi wngnai.”

¹⁶ Musi sumsokni yapharmungni punno kaichomwi nai kha, nai ba abo khamwi pái kha tei Aronni kwthang tong rwknai bwsarok, Eliasar bai Ithamarno jolijagwi sa kha,

¹⁷ “Norok tamo wngwi kwthar háyá-o sumsokni yapharmungno chá ya wng? Subraiyungni bwskango norokno súchana bagwi lukurokni, cha yano ruju-ui manna tẃi khe omo norokno rwjakmani.

¹⁸ Nai di omoni bwthẃino nokthar bisingo tubujak li ya, ang dagima hai khe norok abono nokthar bisingo chána nangmani se.”

¹⁹ Tei Aron Musino hai hwnwi sa kha, “Nai di bórok Subraiyungni bwskango sumsokni yapharmung bai sógwi yapharmungno tubu kha; hai phano aboni saka-o omo hairok sók phai kha! Tumungno tini ang sumsokni yapharmungno chá kha hwn khe angbo Subraiyung bai ya da yachakjakno?”

²⁰ Musi abono khnaui bwkha kochomjak kha.