LAM RWMA 9 - Kok Borok (Re-edited) Bible (BSI)

Mal-matarok thwimani

¹ Subraiyung Musino hai hwnwi sa kha, “Pharaoni thani thángwi saui di, ‘Hibrurokni Kaitor, Subraiyung hai hwnwi sa-o, “Ani bororok Ano monwi manna tẃi khe bórokno yakarwi rohor di.

² Tumungno nwng tabukbo rwi rohorna soi ya wngwi, romwi narwk khe,

³ nai di, Subraiyungni yak harungo tongma nini mal-matarokni saka-o kutung khiklainai, korairok, korai chirkarok, mangingangrok, merarok, punrokni saka-o klainai.

⁴ Tamo khe, Subraiyung Israilrokni mal-mata bai Ijipsarokni mal-matano khagwi tonnai, hakhe Israilni mungsa mal-matarok thwi glak.” ’ ”

⁵ Subraiyung a jorano chongwi hai hwnwi sa kha, “Subraiyung khwna-o o ha-o omo hai kheno khlainai.”

⁶ Hakhe teini salo Subraiyung sama tẃi’-no khlai kha, Ijipsarokni bebak mal-matarok thwi kha, tamo khe Israilni khe masa phano thwi li ya.

⁷ Habugra bahai tamo wng kha hwnwi sẃng khe Israilni mal-matarok masa phano thwi ya hwnwi sajak kha. Tamo khe bo bwkha kwrak wng kha tei bo bororokno thángna rw li ya.

Kula kotorrok tháimani

⁸ Phiya Subraiyung Musi bai Aronno hai hwnwi sa kha, “Thapani mochomsa thapla na di tei abono Musi Pharaoni mokol bwskango a thaplano nokha bwkhak sarwi rw di.

⁹ Abo hadlwi kwsap hai khe Ijipni ha gwnangwi’-no pírjaknai tei abo ha Ijipni gwnangwi’-no bororokni sago tei mal-matarokni sago kula kotor tháiwi pekhogwi kwsa wngnai.”

¹⁰ Hakhe bórok thapla kisa na kha tei Pharaoni bwskango bachaui kha, hakhe Musi nokha bwkhak sarwi rw kha, abo bororok bai mal-matarokni sago kula kotor thái rwui koproi rw kha.

¹¹ Danda-baji kwrwngrok kulani bagwi Musini bwskango bachaui man li ya, Danda-baji kwrwngrok tei bebak Ijipsarokni sago kula thái kha.

¹² Tamo khe Subraiyung Pharaoni bwkhano rak rw kha tei bo bórokni kókrokno khna li ya; Subraiyung Musino sama haino wng kha.

Kothor klaimani

¹³ Hakhe Subraiyung Musino hai hwnwi sa kha, “Phung aidrop bachaui Pharaoni thani thángwi hai hwnwi saui di, ‘Ano Surina bagwi ani bororokno rwi rohor di,’ hwnwi Hibrurokni Subraiyung sa-o.”

¹⁴ Tabuk le ang nini bwkha-o tei nini selengrokni thani nini bororokni thani bebak kutungrokno rwi rohor sinai, hakhe o ha saka-o ang hai khoroksabo kwrwi hwnwi bebakno saui mannai.

¹⁵ ‘Tumungno ang yak tisaui nono tei nini bororokno kutung rohorwi swprak khe, norok komor súgwi tháng kha mun.’

¹⁶ ‘Ang nono ani phan phunuknai tei ha gwnangwi ani mung sajakna bagwi se ang nono kwthang tono.

¹⁷ Nwng tabukbo ani bororokni thani kung chugui bórokno yakarwi rwi rohor yaui tong kho.’

¹⁸ Nai di khwna-o omo hai jora-o ang belai khe kothor klai rwnai, Ijip ha-o yaphangni simi abo hai uáisa phano wng ya kho abo tẃi se wngnai.

¹⁹ Abo bai’-no tabuk norokni bebak mal-matarokno na rw horwi nok bisingo chop bai di. Kothor bororokni tei mal-matarokni tei tokrokni saka-o klai phainai, nogo chopjakyarok khe bebakno thwinai.”

²⁰ Aphuru Pharaoni bororokni bere Subraiyungni kókno kirinairok selengrokno tei mal-matarokno nogo tubu-ui ton phai lai kha.

²¹ Tamo khe Subraiyungni kókno sak nang yarok khe selengrokno tei mal-matarokno hapharo’-no ton kha.

²² Hakhe Subraiyung Musino hai hwnwi sa kha, “Ijip ha-o bororokni saka-o, mal-mata, buphang uáphang tei bebak hapharni jabra mai khulrokni saka-o Ijip ha gwnangwi kothor klai rw na bagwi nini yakno nokha saka bwkhak pholok di.”

²³ Hakhe Musi bini raidangno nokha bwkhak pholok kha; Subraiyung phirang bai kothor klai rw kha, ha saka-o hór klai phai kha. Tei Subraiyung Ijipni ha-o kothor klai rw kha.

²⁴ Kothor klai kha, kothor bising bising hór hai khe nokhabo philigo. Ijip dopha wng phuruni simi ha Ijibo abo hai belai khe kothor kw se klai ya kho.

²⁵ Ijipni bebak ha gwnangwi’-no bororokni saka-o, mal-matarokni saka-o kothor swprak kha. Hapharni bebak mai khulni saka-o tei bebak buphangrokni saka-o swprak kha, buphangrok bai kha.

²⁶ Israil bororok tongma ha Goseno simi kothor klai li ya.

²⁷ Hakhe Pharao Musino ring rw horwi hai hwnwi sa kha, “Ang o jora-o sumsokno khlai laha, Subraiyung le chama-o se tongo. Ang bai ani bororok se cha li ya.

²⁸ Subraiyungno suri si di. Tabuk o kothor bai phirang kokma aswk bai’-no belai se wng kha. Ang norokno yakarwi rohor sinai tei norok kwdwk tong laina nang lai glak kha.”

²⁹ Musi bono hai hwnwi sa kha, “Ang o kamiyungni tháng khe suriuinai. Phirang thaknai tei kothorbo klai glak, hakhe o ha Subraiyungni se hwnwi saui mannai.

³⁰ Tamo khe ang nono tei nini selengrokno si-o, hai phano nwng Subraiyung Kaitorno kiri glak.”

³¹ Khulrok, barlirok, komor bai kha, barli aphuru se bar kho tei khul khe nongkhordrop.

³² Tamo khe gom bai maiswi khe ulo se munma ba abo mungsabo hamya wng li ya.

³³ Musi Pharaoni aroni thángwi yak tisaui Subraiyungni thani suriui kha, phirang, kothor uatwi bebakno thak kha.

³⁴ Pharao a wngmarokno nuk kha tei haino hai sumsok khlai phi kha. Bo tei bini bororok haino hai kwrak wng lai phirwi tong kha.

³⁵ Tei Subraiyung Musini khúk tẃi sama haino bo Israilrokno thángna rw li ya.