LAM RWMA 8 - Kok Borok (Re-edited) Bible (BSI)

Yonglarok

¹ Hakhe Subraiyung Musino hai hwnwi sa kha, “Pharaono thángwi saui di, Subraiyung hai hwnwi sa-o, ‘Ano monna bagwi ani bororokno yakarwi rohor bai di.’

² Phiya nwng bórokno yakarwi rohor ya khe, nai di ang nini ha gwnangwi’-no yongla máng kupulung khe rwnai,

³ Nil twima yongla bai kupulung wngnai, abórok nini nogo thángnai nini thuma nogo thángnai, thuyamo kasauinai, nini selengrokni nokrogo tei nini bororokni thanibo thángnai thaparogo hapnai, kárairogo kasauinai;

⁴ yonglarok nini thani nini bororokni tei nini selengrokni thani phainai.’ ”

⁵ Tei Subraiyung Musino hai hwnwi sa kha. “Aronno sa di, bo bini raidangno twimarok, twisarok tei twidurok phaising phologwi yonglarokno ha Ijibo phai rw si thung.”

⁶ Hakhe Aron bini raidangno Ijipni bebak twi phaisingo tisaui pholok hor kha tei yonglarok phaiwi bebak ha Ijibo kupulung wng phai kha.

⁷ Tei danda-baji kwrwngrokbo bórokni kókmung bai khe yongla snamwi ha-o yonglarok tubu-ui phai kha.

⁸ Hakhe Pharao Musi bai Aronno ringwi hai hwnwi sa kha, “Yonglarokno ani oroni bororokni aroni tlang di hwnwi Subraiyungno suri si di; ang bororokno Subraiyungni thani ratharwi yapharna bagwi yakarwi rohor sinai.”

⁹ Musi Pharaono hai hwnwi sa kha, “Ang surina hwn khele chajago tamo khe chong si di, buphuru ang nini nokni, nini nokni bororokni tei nini selengrokni aroni yonglarok komor tháng si thung hwnwi surinai, phiya Nil twima-o simi se tong rwknai.”

¹⁰ Bo hai hwnwi sa kha, “Khwna’-no suri si di;” Musi hai hwnwi sa kha, “Chini Subraiyung Kaitor hai tei khoroksabo kwrwi hwnwi sina bagwi nwng sama tẃi’-no wng si thung.

¹¹ Nwng nini bororok tei nini selengrok yonglani yakni yók bainai. Nil twima-o karwi tei kwrẃngsa-obo tong rwk glak.”

¹² Hakhe Musi bai Aron Pharaoni aroni tháng lai kha, Pharaoni thani lonwi Phaima hai kheno Musi Subraiyungni thani yonglarokno tlang phi si di hwnwi suri kha.

¹³ Subraiyung Musi sama haino khlai kha, nogo yongla tongmarok, nokhla tongmarok, hapharo tongmarok thwi bai kha.

¹⁴ Bórok bebakno kwrẃngsa-o khe rúng lai kha tei ha gwnangwi mwnam kha.

¹⁵ Tamo khe Pharao a yonglarokno thwima nuk khe bo bini bwkha rak rw phi khua, bo bórokni kókno khna li ya, abo Subraiyung sama tẃi’-no wng kha.

Yóngsarok

¹⁶ Hakhe Subraiyung Musino hai hwnwi sa kha, “Aronno sa di, ‘Nini a raidangno tikhlaiwi pholok di tei ha Ijip gwnangwi’-no yóngsa kwsaprok wngna bagwi hadlwi-o swprak di.’ ”

¹⁷ Bórok haino khlai kha; Aron bini yak phologwi raidangno tisaui hadlwi-o khe swprak kha tei aro ha gwnangwi bórokni thani tei mal-matarokni saka-o sók phai kha; ha gwnangwini hadlwi yóngkha kwsap khaui ha Ijipno kupulung khlai kha.

¹⁸ Danda-baji phunuknairok bórokni kókthái bai abo hai yóngkha kwsap snamna nai lai kha, tamo khe bórok man lai li ya. Hakhe bororokni saka-o tei mal-matarokni saka-o yóngkha máng wng kha.

¹⁹ Hakhe a danda-baji kwrwngrok, Pharaono hai hwnwi sa kha, “Omo Kaitorni yasi se.” Tamo khe Pharaoni bwkha kwrak wng kha, Subraiyung sama haino bo bórokni kókno khna li ya.

Thampuimarok

²⁰ Subraiyung Musino hai hwnwi sa kha, “Phung aidrop bachaui Pharaono naisingwi tong di, bo twi bwkhak tháng phuru khe bono sa di, Subraiyung hai hwnwi sa-o, ano surina bagwi ani bororokno yakarwi rohor di.

²¹ Eba nwng ani bororokno yakarwi rohor ya hwn khe, nai di, ang nini thani nini selengrokni thani nini bororokni thani tei nini nokrogo thampui bodol rwi rohornai. Hakhe Ijipsarokni nok brúmno thampui kupulung wngnai tei bórok bachama-obo haino kupulung wngnai.

²² ‘Tamo khe a salo ang ani bororok tongma ha Gusenno khagwi tonnai, hakhe aro thampuini bodol tong glak; ha saka-o ang’-no Kaitor hwnwi omo hai khe nwng saui mannai.

²³ Omo hai khe ang ani bororok bai nini bororokno swkaknai khwnani bisingo’-no omo hai mari nuknai.’ ”

²⁴ Subraiyung omo hai’-no khlai kha, Pharaoni nogo tei bini selengrokni nogo tei bebak Ijip ha-o bodol kotor khe thampui hap rw kha. A thampuirokni tekto bai lengpro bai kha.

²⁵ Hakhe Pharao Musi bai Aronno ringwi hai hwnwi sa kha, “Tháng di, o ani ha-ono norokni Kaitorni thani ratharwi barogwi di.”

²⁶ Tamo khe Musi hai hwnwi sa kha, “Abo hai khlaima le cha glak, tamni hwn khe chwng ratharwi Subraiyung Kaitorno yaphar khe Ijipsarok abono selengjaknai, chwng Ijipsarokni mokol bwskango bórok chajak yano ratharwi barok khe bórok chwngno holong bai khitarwi buthar glak diba?

²⁷ Chwng bo bai chajakma hai kheno salthamni lama thángwi haphar bukcha-o ratharwi ma yapharwinai.”

²⁸ Hakhe Pharao hai hwnwi sa kha, “Ang norokno haphar bukcha-o thángwi ratharwi yapharna bagwi rwi rohornai, tamo khe norok belai hakchalo le ta tháng di. Ani bagwi suri di.”

²⁹ Musi hai hwnwi sa kha, “Nai di ang nini oroni ongkhorwi thángo tei ang Subraiyungni thani surinai, Pharaoni aroni bini selengrokni aroni tei bororokni aroni khwna’-ono thampui bodolrok tháng thung hwnwi surinai. Tamo khe Pharao haino hai tatal saui bororokni ratharwi yapharna bagwi rwi rohor yaui ta tong thung.”

³⁰ Hakhe Musi Pharaoni aroni thángwi Subraiyungni thani suri san kha.

³¹ Subraiyung Musi sama tẃi’-no khlai kha tei thampui bodolrokno Pharaoni aroni bini selengrokni aroni, bini bororokni aroni nor kha. Masa phano kwrwi kha.

³² Tamo khe tabukbo Pharao bini bwkhano kwrak khlai tong kha tei bororokno thángnani rw li ya.