LAM RWMA 18 - Kok Borok (Re-edited) Bible (BSI)

Jethro Musi bai malaimani

¹ Musini bwkra Jethro, Midianrokni ochai, Kaitor Musini bagwi tamo khlai kha tei bini borok Israilni bagwi tamo khlai kha phiya bahai khe Subraiyung Israilrokno ha Ijipni tikhlaiwi tubu kha abono khna kha.

² Hakhe Musini bwkra Jethro Musini bihik Jiporano tubu-ui phai kha, bo swkango kabu-ui phaijakmani

³ tei bini bwsa chwla khoroknwinobo tubujak kha, khoroksani mung khe Gersom (tamni hwn khe bo hai hwnwi sa kha, “Ang buini ha-o haino kobonwi ma tongmani”),

⁴ tei khoroksani mung khe Eliaser tamni hwn khe bo hai hwnwi sa kha, “Aphani Kaitor ano chuba kha tei Pharaoni sengnibo phiyók kha.”

⁵ Hakhe Musini bwkra Jethro Musini bwsarokno tei bihikno tubu-ui hasing haphar Kaitorni hathái-o Musi batham kha thani phai kha.

⁶ Tei aphuru Musino borok khoroksa hai hwnwi sa kha, “Naisik di, nwkra Jethro nihikno tei nwslasong khoroknwino tubu-ui phaiwi tongo.”

⁷ Musi bwkra bai malaina bagwi tháng kha, Musi khorok bomwi khulumui bono motom su kha; bórok khoroksa tei khoroksano bahai tong hwnwi sẃng lai kha tei ríni nok bisingo habwi lai kha.

⁸ Hakhe Musi bwkrano bebakno saui khwna rw kha, Subraiyung Israilrokni bagwi Pharaono tei Ijipsarokno tamo khlai kha tei bórok bwswk lama-o tong kesep man kha, phiya bahai khe Subraiyung bórokno phiyók kha saui khwna rw kha.

⁹ Israilrokni bagwi Subraiyung bebak kaham khlaimano tei bahai khe bo Ijipsarokni yakni phiyók kha, abono tẃiwi Jethro tongthokjak kha.

¹⁰ Hakhe Jethro hai hwnwi sa kha, “Ijipsarokni yakni tei Pharaoni yakni norokno phiyóknai Subraiyung hamchajak.

¹¹ Ang tabuk saui man kha, Subraiyung bebak mwtairokni slái kotor kuk, tamni hwn khe Ijipsarok bororokno hai’-no muchung tẃi thwng phuruno Subraiyung bórokno phiyók kha.”

¹² Hakhe Musini bwkra Jethro Kaitorni thani sógwi tei ratharwi barokmung yaphar kha tei Aron Israilni bebak okrarok bai khe Kaitorni bwskango Musini bwkra bai chána phai lai kha.

Buj thumnairokno chongmani

¹³ Teini salo Musi bororokno buj thumnani achuk kha, phiya bororok Musini samo phung aidropni simi sarik jora bachaui tong lai kha.

¹⁴ Musini bwkra bo bórokni bagwi tamo khlai bebak’-no nuk khe, bo hai hwnwi sa kha, “Nwng bororokni bagwi abo tamo khlai tong kha? Tamni nwng saichung ma achuk tei bororok nini bwskango phung aidropni simi sarik jora ma tong?”

¹⁵ Musi bwkrano hai hwnwi sa kha, “Tamni hwn khe bororok Kaitorni kók sina bagwi ani thani phai-o;

¹⁶ Bórok uálai lai khe, ani thani phai lai-o, ang bórokni saboni cha cha ya swbai rw-o tei ang Kaitorni raidano tei Kaitor naimano saui man rw-o.”

¹⁷ Musini bwkra bono hai hwnwi sa kha, “Nwng khlai tongmani abo cha ya kho.

¹⁸ Nwng tei nwng bai baksa bororok lengpranai, tamni hwn khe omo nini bagwi belaino hilik; nwng saichung omono khlai man ya.

¹⁹ Tabuk ang samano khna di; ang nono kókbiti sanai tei Kaitorbo nwng bai tongnai, nwng bororokni wngwi Kaitorni bwskango bacha di, bórokni kókmungrokno Kaitorni thani tubu di;

²⁰ hakhe nwng bórokno Kaitorni raidano phrwng di tei bini naimarokno sa di. Phiya bórok bu lama tẃi himnai tei tamo khlaithai abonobo phrwng di.

²¹ Aboni bisingo bebak borokni bisingni omo hai chúknai bororokno saiwi nai di, bórok Kaitorno kirinai ma wngnai, bwkha berai manjaknai borok, rang chámano selengnai borok, ma wngnai; abo hai bororokno borok khoroksaini, borok khoroksarani tei khorokbachini phiya khorokchini bokhorok khe chong di.

²² Bórok bororokno jora brúmno buj thum thung; bebak kók kutukrokno khe nini thani bórok tubu thung; hakhe nini bagwi kisa lainai tei bórok nwng bai baksa’-no poja tẃichrunai.

²³ Nwng omo hai khlai khe tei Kaitor nono daginai hakhe nwng soiwi mannai tei o bororokbo kwchang kwchang khe sak sakni nogo kiphilwi tháng anw.”

²⁴ Hakhe Musi bwkra samani kókno khna kha hakhe bo sama hai’-no khlai kha.

²⁵ Musi Israilrokni bisingni chúkjak bororokno saiwi na kha tei bórokni saka-o bokhorok chong kha, baksa khoroksaini bokhorok, baksa khoroksarani, baksa khorokbachini tei khorokchini, bokhorok wng kha.

²⁶ Hakhe bórok bororokno buj thum lai máng tong lai kha; kutukrokno khe Musini thani tubu kha tamo khe tuk yarokno khe bórok bai bórok’-no kók sachu lai kha.

²⁷ Aboni ulo khe Musi bwkrano thángna bagwi rwi rohor kha tei bo lam romwi sakni ha-o kiphilwi tháng kha.