LAM RWMA 16 - Kok Borok (Re-edited) Bible (BSI)

Manna bai Tokru

¹ Bórok Elimni tháng lai kha tei Israilni bebak bororok hasinglwng haphar Sino sók phai kha, abo wng kha, Elim bai Sinaini kwcharo, omo bórok ha Ijipni ongkhorma nokha talnwini talni sal chibani sal klai-o.

² Israilrokni bebak bororok Musi bai Aronno hasing hapharo hamya hwnwi, hai hwnwi

³ sa lai kha, “Subraiyung chwngno Ijibo buthar kheno ham kha mun. Chwng aro kisa le achugwi muihanrok ma chá kha mun tei kubun chámungrokbo ok pungwi ma chá kha mun. Tamo khe nwng chwngno o hasing hapharo chá rw yaui ok khui rwui butharna bagwi tubu kha.”

⁴ Hakhe Subraiyung Musino hai hwnwi sa kha, “Nai di, ang norokni bagwi nokhani chámung uatwi hai khe ua rwnai; tei bororok sal brúmno ongkhorwi salsani bagwi nangmano khochaui ma narwknai. Omo hai kheno bórok ani dagima kók khw de khwna khna ya amjogwi mannai.

⁵ Saldokni salo khe bórok salsani bagwi khochamani slái tei baknwi ma khochaui tiyar ma wngnai.”

⁶ Hakhe Musi bai Aron bebak Israil bororokno hai hwnwi sa kha, “Sal tháng khe norok saui mannai Subraiyung se norokno ha Ijipni tikhlai tubu-o,

⁷ teini phungo khe norok Subraiyungni chẃngsachano nuknai, tamni hwn khe norok Subraiyungno hamya sa laimano bo khna kha, chwng ba sabo ba norok chwngno hamya hwn lai?”

⁸ Hakhe Musi hai hwnwi sa kha, “Subraiyung norokno sarigo muihan chána rw kha tei phungo ok pung rwui chámung rw kha, tamni hwn khe norok Kaitorno hamya khe kók sa laimano Subraiyung khna kha; chwng ba sabo ba? Norok hamya sama chwngno sama klai ya abo Subraiyungno se hamya sama klai-o.”

⁹ Musi Aronno hai hwnwi sa kha, Israilni bebak bororokno Subraiyungni samo phai di hwnwi sa di, tamni hwn khe bo norok hamya sa laimano khna kha.

¹⁰ Hakhe Aron Israilni bebak bororokno kók sa kheno bórok hasing haphar phaising naisik lai kha, hakhe nai di, Subraiyungni chẃngsacha chumui-o khe nukjak kha.

¹¹ Hakhe Subraiyung Musino hai hwnwi sa kha,

¹² “Ang Israil bororok hamya sa laimano khna kha, bórokno sa di, norok muphlik kaisani bisingo’-no muihan ma chá anw tei ai kheno norok chámung bai kupulung wngnai. Hakhe norok ano norokni Subraiyung Kaitor hwnwi sini anw.”

¹³ Sarik wng kheno tokru phaiwi batham kitingwi kupulung wng phai kha tei phungo khe bathamo pantwi kupulung wng kha.

¹⁴ A pantwini bepher ransaui tháng bai khe a hasing hapharo kahamma belep khe ha-o kothor kwsap hai klai tongo.

¹⁵ Israilrok abono nuk lai kheno bórok abo tamo sini lai li ya wngwi khoroksa tei khoroksano “Omo tamo?” hwnwi sẃng lai kha, Musi bórokno hai hwnwi sa kha, “O chámung wng kha, Subraiyung norokno chána bagwi rwmani.

¹⁶ Subraiyung hai hwnwi dagi kha, norok bebakno sak sakni nangma swkno ma khochanai, núkhung mareui khoroksa khoroksani bagwi litar kwnwi wngnai.”

¹⁷ Hakhe Israil bororokbo haino khlai lai kha; baksa khe kwbáng tei baksa khe kisa khocha lai kha.

¹⁸ Tamo khe bórok ulo bebaknino rwtaui nai lai kha, kwbáng thumnairoknibo bára wngwi tong rwk li ya; kisa thumnairoknibo biyal wng li ya; bebakno bórok cháui manma tẃi’-no khocha lai kha.

¹⁹ Hakhe Musi bórokno hai hwnwi sa kha, “Khoroksa phano abono phung jora narwgwi ta ton thung.”

²⁰ Tamo khe bórok Musini kókno khunju kan lai li ya; baksa baksa aboni bára phung jora ton lai kha, abo yóng kha ka tei sumwi pái kha; hakhe Musi bórokno jolijak kha.

²¹ Phung aisirisiri brúmno bórok abono cháui manma swkno khocha lai kha, tamo khe sal chugui tungwi phai khe abo kupru-ui thángo.

²² Sal dokni salo khe bórok teibo kwbáng bára khe thum lai kha, khoroksa khoroksani bagwi Omer kainwi wngnai. Dophani bebak tẃiphangrok phaiwi a kókno Musino saui khna rw kha.

²³ Hakhe bo bórokno hai hwnwi sa kha, “Subraiyung hai hwnwi dagi-o; khwna sói khe lenglanani sal, Subraiyungni bagwi kwthar lenglama sal; sóngwi narwkna tongmano sóng di, ruk di tei bebak bára tongmarok phung aima jora narwk di.”

²⁴ Hakhe Musi bórokno sama hai’-no phung jora ton kha, abo sum li ya tei yóngbo klai li ya.

²⁵ Musi hai hwnwi sa kha, “Tini omono chá di, tini Subraiyungni bagwi lenglamani sal; tini hapharo norok abono man glak;

²⁶ tamo khe saldok sal jora abono thum di, phiya salsnini salo abo khe sabat salo abo aro kisa phano tong glak.”

²⁷ Salsnini salo baksa bororok thumna bagwi tháng lai kha, tamo khe bórok kisabo manẃi li ya.

²⁸ Tei Subraiyung Musino hai hwnwi sa kha, “Norok tei bwswk sal ani dagimarokno tei kerongrokno tẃinani nai ya wngnai?

²⁹ Nai di, Subraiyung norokno sabat sal rw kha, aboni bagwino Subraiyung norokno saldokni salo salnwini bagwi chámung rw kha, bebak bororokno sak sakni nogono tong thung, salsnini salo khoroksa phano nokni ta nongkhor thung.”

³⁰ Hakhe bororok salsnini salo khe lengla lai kha.

³¹ Tabuk Israil bororok abono manna hwnwi mung phar lai kha; abo bwchlwi kuphur hai, abo piya bwtwi dalokjak biskut hai thogo.

³² Musi hai hwnwi sa kha, “Subraiyung hai hwnwi dagi kha, norokni ulni bebak bosongrokno phunukna bagwi omer kwnwi Manna narwgwi ton di. Ijip hani tikhlai tubu phuru ang norokno hasing hapharo chá rwma chámungno nuk thung.”

³³ Musi Aronno hai hwnwi sa kha, “Jari tháisa narwgwi aro kisa manna daui norokni bosong brúmni bagwi Subraiyungni bwskango khe ton di.”

³⁴ Subraiyung Musino dagima hai kheno Aron abono Swmai bokhokni bwskango khe beraui ton kha.

³⁵ Israil bororokno manna nokha bisi brwichi jora Kanan ha-o sók phai ya sakno chá rw kha; bórok Kanan hani páithak jora sók phai ya sakno ma chá kha.

³⁶ Omer kaisa khe abo kwranno rwtaui kilo kaisa tei charra gram bai baksa.