LAM RWMA 11 - Kok Borok (Re-edited) Bible (BSI)

Swkang sakrarok thwinai hwnwi Musi sakhlaimani

¹ Subraiyung Musino hai hwnwi sa kha, “Ang tei Mungsa swprakmung Pharaoni saka-o tei Ijiprokni saka-o tubunai; aboni ulo khe bo norokno thángnani rw anw bo norokno rwi rohor phuru khe, norokno bebakno rwkhlaiwi se rohornai.

² Tabuk bororokno sa di, chwlarok tei bwrwirokbo bórokni nok arini rangchak tei rukphaini manwirok sanwi na thung.”

³ Subraiyung Ijipsarokno Israilrokni kókno khna rw kha. Aboni bere Musino Ijip hani Pharaoni selengrok tei bororok kotor khe nugo.

⁴ Hakhe Musi hai hwnwi sa kha, “Subraiyung hai hwnwi sa-o, ang hor kuthugo khe ha Ijip kwchar tẃi laiwi thángnai.

⁵ Ha Ijipni bebak swkang sakrarok thwi bainai, achukthayungo achuknai Pharaoni bwsa okrani simi mai súknaijwk selengjwkrokni nokni swkang sakrarok thwinai.

⁶ Ha Ijip gwnangwi’-no kap lai-kok lai wng lainai, abo hai uáisabo wng ya kho, phiya tei uáisa phanobo wng glak.

⁷ Tei Israilrokni khe borok tei mal-matarokni bere sẃirok suda sẃng glak, omo hai khe ang Israil bai Ijipsarokni bisingo khaknai, Israilrok khe mungsa wng glak.

⁸ Bebak nini selengrok ani thani phaiwi ano khulumui hai hwnwi ma sa phainai, ‘Nwng tei nini kók khnanairok nongkhor bai si di.’ Aboni ulo khe ang ongkhorwi thángnai.” Hakhe bo jolijagwi Pharaoni aroni ongkhorwi tháng kha.

⁹ Ulo khe Subraiyung Musino hai hwnwi sa kha, “Pharao nini kókno khna glak; hakhe ha Ijibo teibo kwbángma uanamasingcha samungrok tangjaknai.”

¹⁰ Musi bai Aron a bebak uanamasingcha samungrok Pharaoni bwskango khlai kha; tei Subraiyung Pharaoni bwkhano rak rw kha, bo Israil bororokno bini hani thángna rw li ya.