LAM RWMA 10 - Kok Borok (Re-edited) Bible (BSI)Kúkthora klaimani 1 Hakhe Subraiyung Musino hai hwnwi sa kha, “Pharaoni thani tháng di, ‘Ang bórokni thani kwmamsingcha samung khlai phunukna bagwi se bini bwkhano tei bini bororokni bwkhano rak rw kha.’ 2 Ano Subraiyung hwnwi norok saui manna bagwi norokni nwsarokno tei nusuksongno ang bahai khe Ijipsarokno thung kha tei kwmamsingcha samungrok khlai kha, saui khna rw thung hwnwi se omorok khlai-o.” 3 Musi bai Aron Pharaoni thani thángwi hai hwnwi saui lai kha, “Hibrurokni Subraiyung Kaitor hai hwnwi sa-o, ‘Nwng tei bwswk ani thani bom yaui tong sinai? Ano surina bagwi ani bororokno yakarwi rwi rohor si di. 4 Tumungno nwng ani bororokno thángnani rw ya hwn khe nai di, ang khwnano nini ha saka-o kúkthorano tubunai. 5 Abórok ha nukjak ya khe, ha gwnangwi’-no kobolnai kothorni yagulo tong rwkmarokno bórok cháui páinai tei hapharo wngma bebak norokni buphangrokno cháui páinai. 6 Tei norokni noksing kupulung khe hap phainai norokni selengrokni nogo kupulung wngnai tei Ijipni bebak bororokni nogo kupulung wngnai; nwphasong eba nuchusong abo hai uáisabo achai phuruni simi tabukbo nuk ya kho.’ ” Hakhe bo uphilwi Pharaoni aroni tháng kha. 7 Pharaoni selengrok bono hai hwnwi sẃng kha, “O borok tei bwswk chini bagwi busu hai wngwi tongnai? Bororokno bórokni Subraiyung Kaitorno surina bagwi rwi rohor si di; ha Ijip Komorwi tongmani nwng tamo saui man ya da?” 8 Hakhe Musi bai Aronno Pharaoni thani tubu lai kha; Pharao bórokno hai hwnwi sa kha, “Tháng di norokni Subraiyung Kaitorno suriui di; tamo khe sabo sabo tháng lainai?” 9 Musi hai hwnwi sa kha, “Chwng chini okra chwrai bebakno tháng lainai tei mal matarok bebak tlangwi thángnai. Chwng Subraiyungni panda manjakna nangnai.” 10 Tei bo bórokno hai hwnwi sa kha, “Subraiyungni mungwi sa-o, ang norokni bwrwirok bai chwrairokno le norok bai baksa rwi rohor ya. Omo hai khe ba norok mungsa swk ani bagwi hamya se chapma klai bla? 11 Tei norok chwlarok simi thángwi Subraiyungno suri lai di, norokbo haino nai lai di ta.” Ulo khe bórok Pharaoni aroni rwi rohorjak kha. 12 Aphuru khe Subraiyung Musino hai hwnwi sa kha, “Ijip ha gwnangwi, kúkthora phaiwi, kothor klai rwi klangma bebak mai khul jabrarok buphangrok chá phaina bagwi nwng nini yakno pholok di.” 13 Hakhe Musi ha Ijip phaising bini raidangno pholok kha, hakhe Subraiyung hor sal a ha saka-o salkabaini nokbar sipcha rw kha; hai khe salkabaini nokbar kúkthora tubu-ui phai kha. 14 Ijip ha gwnangwi kúkthora phaiwi sók phai kha tei Ijipni ha gwnangwi’-no tong phai kha, abo hai kúkthora bodol uáisabo aro sók phai ya kho, sobo sók phai glak. 15 Bórok ha gwnangwi’-no kobol kha. Ha se ma mwnak si-o tei ha gwnangwini jabra-bobra, buphang uáphang tei kothor bwtháirok karwi klangmano bebakno cháui pái kha, kwkhrang hwn khe mungsa se kwrwi kha, Ijip hani tamo sam tamo hapharni buphangrok mungsabo kwrwi kha. 16 Hakhe Pharao Musi bai Aronno doui ring rw horwi hai hwnwi sa kha, “Ang norokni Subraiyung Kaitorni thani tei nini thani sumsok khlai kha. 17 Abo bai’-no ano tabuk uáisa ani sumsok nakar ja di, ang nono koi ja-o tei nini Subraiyung Kaitorno, ani oroni o butharnaino rosaui tlang ja di hwnwi koi ja di.” 18 Musi Pharaoni aroni nongkhorwi thángwi Subraiyungni thani koiwi suri kha. 19 Hakhe Subraiyung salthángbaini belai khe nokbar sipcha rw kha, abo kúkthorarokno rosaui twijlang kwchago tlangwi tháng kha; kúkthora masa phano ha Ijibo tong rwk li ya. 20 Tamo khe Pharaoni bwkhano rak rw kha tei Israil bororokno thángna rw li ya. Ha gwnangwi mwnak rwmani 21 Aphuru khe Subraiyung Musino hai hwnwi sa kha, “Ijip ha gwnangwi mwnak rwna bagwi nini yakno nokha phaising pholok di.” 22 Hakhe Musi bini yakno nokha phaising pholok kha, saltham jora ha Ijip gwnangwi belai khe mwnagwi tong kha. 23 Bórok khoroksa bai tei khoroksa nuk lai li ya, khoroksa phano sak sakni tongthaini saltham jora kutul lai li ya, tamo khe Israil ha gwnangwini bororok bórokni tongthai-o chati mwchẃng laiwi tong lai kha. 24 Aphuru khe Pharao Musino ringwi hai hwnwi sa kha, “Tháng di Subraiyungno suriui di; norokni bwrwi bwsa tei chwrairokbo norok bai baksa tháng si thung; tamo khe norokni mal-matarok, pun tokrok simi klangwi tháng si di.” 25 Tamo khe Musi hai hwnwi sa kha, “Nwng chwngno ratharwi chini Subraiyung Kaitorno yapharma tei sógwi yapharmanobo ma khlai rwnai. 26 Chini mal-mata, pun tokrokbo chwng bai baksano ma tlangwi thángnai; mal-mata masa phano chwng karwi klangwi man ya, tamni hwn ba chwng abórokno tlangwi’-no chini Subraiyung Kaitorno ma khulumuinai, tamo bai khe Subraiyungno ma surinai aro sógwi ya sak saui man ya kho.” 27 Tamo khe Subraiyung Pharaoni bwkhano rak rw kha tei bórokno thángna rw li ya. 28 Hakhe Pharao bono hai hwnwi sa kha, “Ani oroni tháng di, nwng hus wng di tei ang bai tei ta malai phai di wng ya khe nwng ma thwinai.” 29 Musi hai hwnwi sa kha, “Nwng samani tẃi’-no wng si thung, ang nwng bai tei malai li ya.” |
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
Bible Society of India