KAPSIMANG KAPMA 3 - Kok Borok (Re-edited) Bible (BSI)

Sátokjakmani, bwkha kiphilmani tei khatungmani

¹ Ang’-no Kaitor bai jolijagwi sátokjakmano nuknaisa;

² bo ano rwkhlaiwi rohorwi pohor kwrwi mwnakma-o tubu kha;

³ ano sal sapung uái re uái bini yak koson kha.

⁴ Bo ani bahan tei bukurno rampra rw kha, tei ani bekrengrokno swbai kha;

⁵ bo ano swprakma bai tei tekto rwui sátok-pitok khlaima bai khe khobwi tong kha;

⁶ bo ano kwthwi kwcham hai khe mwnakma-o khiklaiwi ton kha.

⁷ Bo ano khárwi man ya tẃi khe chokdeual bai gerebwi ton kha; sorduk kotorma bai khe ano kha ka,

⁸ ang chubamung sanwi kap phano bo ani surimano khna ya khe tong kha.

⁹ Bo ani lamano holong bwklap lapsa bai khe muthubwi rw kha, ani lamano kokoi-mokoi khlai kha.

¹⁰ Bo ano uárna bagwi juntiui tongnai gong hai, tei huijagwi tongnai singho hai se;

¹¹ bo ano lamani tubu-ui phondrik-phandrak sichik kha; bo ano yakarwi klang kha;

¹² bo bini badukhungno thonwi ani bwkhak bini makal bai harwi chak kha

¹³ Bo bini makal bokhokni makal bai ano kok kha;

¹⁴ ang bebak bororokni thani mwnwijaknai se wng si-o, sapung bórokni thesra kariui rwchapjaknai rwchapmung se wng si-o.

¹⁵ Bo ani kháno hamya bai supung kha. Kwkha bwtwi máng kupulung khe bo ano khan kha.

¹⁶ Bo ano holongsiki se uákhrup rw si-o, tei thapla-o khe goirok rw kha;

¹⁷ khakchangma ang bai chal kha; ang tongthokmungno po se pok si-o;

¹⁸ hakhe ang “Subraiyungni thani khatungwi tongmarok tei ani chẃngsacharok kwrwi laha” hwnwi sa kha.

¹⁹ Ani dukhu kostono tei nok kwrwi wngmano naiwi nai khe abo le katswi bokhlo hai kwkha!

²⁰ Ang abono bwkha-o muitu man phlai máng tongo abo ani bwkhano swbai-o.

²¹ Tamo khe omorokno ang muitu manẃi ani khatungmung phai-o:

²² Kaitorni pái phlai ya khairokma tei páiwi tháng ya, bini khairokmabo tei pái phlai ya;

²³ abórok phung ai brúmno kwtal; nini kók narwkma wng kha kotor.

²⁴ “Subraiyung se ani man banta” hwnwi ang bwkha bising bising sa-o, “Aboni bagwi ang bini thani khatungwi tongnai.”

²⁵ Subraiyungno naisingwi tongnairok tei bono bwkha beraui tongnairokni bo kaham khlai-o.

²⁶ Kwchang kwchang khe Subraiyungni mwthangmungno naisingwi tongmani se kaham.

²⁷ Sikla phuruni simi sakni jual tisaui balmani se jotoni bagwi kaham,

²⁸ Subraiyung se bono abo rw-o, aboni bagwi bo siring siring khe achugwi tongthai,

²⁹ bo hadlwi-o bumkhang súkpáiwi tong thung hakhe aro khatungmung tongwi phano mano,

³⁰ bo bono bunaino khangar chagwi rw thung tei lachimung manmarok bai kupulung wng thung.

³¹ Tamni hwn ba Subraiyung le mol brúmni bagwi yakarwi rw ya,

³² tamo khe, bwkha dukhu nang rw phano bo bini pái phlai ya hamjakma bai khe hamjaknai;

³³ tamni hwn ba bo borokno muchungwi dukhu eba tekto rw ya.

³⁴ Swngcharni bebak alongo chopjakrok yakung bai káduljak phuru,

³⁵ bebakni slái Kuchugo tongnaini bwskango bororokni manthairok rwjak ya wng phuru,

³⁶ khoroksa swk bujsói khlaijak ya khe Subraiyung abono nuk glak diba?

³⁷ Subraiyung se dagi ya khe sabo búkhúk bai saui mungsa swk khlaiwi mannai?

³⁸ Kaitor kotorni búkhúkni se kaham tei hamya ongkhor ya diba?

³⁹ Sakni cha yarokni bagwi swprakjagwi ba tamo borok aboni bagwi tentai?

⁴⁰ Phai di, chwng bahai khe tong abono amjogwi nai lai anw tei Kaitorni thani kiphilwi tháng lai anw.

⁴¹ Phai di, chwng bwkhano tei chini yakrokno chuknohani Kaitorni phaising tisa lai anw.

⁴² “Chwng sumsok khlai kha tei nini kók khna ya wngmani bagwi nwng chwngno nakar li ya.

⁴³ “Nwng jolima kupulung khe chwngno riphrik kha, tei kisicha phano khairokma kwrwi khlaiwi buthar kha;

⁴⁴ suri sanjakmano khna ya khe tongna bagwi nwng sakno chumui bai khe ból kha.

⁴⁵ bororokni thani nwng chwngno selengmasingcha tei rí soroi hai snam kha.

⁴⁶ “Chini bebak kena arirok chwngno naisigwi mwnwi lai kha;

⁴⁷ chwng kirimasingcha-o, uarai-o, tei komormungo klai kha;

⁴⁸ ani borok komormani bagwi ani mokolni muktwi twimani twi yor tẃi khe kochok kha.

⁴⁹ “Ani mokolni muktwi chorom phlaiwi tongnai omo thák phlai glak,

⁵⁰ Subraiyung chukha saka-o tongwi nai khlai ya sak.

⁵¹ Kamiyungni bwrwirok tamo wng kha abórokno nugwi ani bwkha belai khe kham kha.

⁵² “Ano kebengnai arirok ano mungsa yaui’-no tóksano riphrigwi rom tẃi khe rom kha;

⁵³ bórok ano kwthangwi hakhor bisingo khiklaiwi holong bai khitar kha;

⁵⁴ ani bokhorok saka tẃi twi kochogwi tháng kha; ‘Ang pái laha’ hwnwi ang ma sa kha.

⁵⁵ “Hakhor bisingo tongwi ang chirigwi nini mungwi ring kha o Subraiyung;

⁵⁶ hakhe nwng ani koimano khna kha, ‘Chubamung sanwi chirigwi ring phuru khna ya ta wng di!’

⁵⁷ Ang ring phuru khe nwng ani gana-o phai kha, tei ‘Ta kiri di!’ hwnwi ano sa kha.

⁵⁸ “O Subraiyung, nwng ani wngwi sachrunai wng kha, tei ano phiyógwi mwthang kha.

⁵⁹ O Subraiyung ang cha ya khlaijakmano nwng nuk kha; o Subraiyung ani bagwi bujsói khlai si di.

⁶⁰ Bórok ani hamya khlaimano nwng tei ano kebengwi hamya chapmaroknobo nwng nuk kha.

⁶¹ “O Subraiyung bórok ano thesra kariui sa laimarokno tei ani hamya khlaina chapmarokno nwng khna kha.

⁶² Ani kena arirok sal brúmno ano kebengwi serek-serek khe sa lai-o.

⁶³ Bórok a phano achuk lai thung ba phano bacha lai thung ang bórokni henerwi thesra karijaknai se wng si-o.

⁶⁴ “O Subraiyung, bórokno bórokni samungrokni bagwi yagul su di!

⁶⁵ Bórokni bwkhano raksa rw di; bórokni saka-o nini bati klai jaba thung!

⁶⁶ Nwng joliui bórokno riphrik di tei o Subraiyung, nini nokha tolarokni sokomor di.”